Ko e Meʻa Ne u Ako Mei he Kakaú
Ne akoʻi au ʻe he kakaú ke u ʻiloʻi naʻe ʻikai kovi ʻa e mālohi fakatoʻú. ʻOku faʻa tokoni ia he taimi ʻe niʻihi ke ke lavameʻa.
Naʻá ku taʻu fitu pea naʻe ʻikai ke u poto he kakaú, ko ia naʻe fakahū au ʻe heʻeku faʻeé ki ha kalasi ako kakau mo hoku kaungāmeʻa ko ʻEnisií ʻi he taimi hoʻataá. ʻI he fakaʻosinga ʻo e lēsoni kotoa pē, naʻe ʻave kimaua ʻe heʻema faiakó ki loto-mālie he vai kaukaú ke ako ʻema kakaú. Naʻá ma malu maʻu pē ʻi loto-mālie he naʻe pukepuke hake kimaua ʻe heʻema faiakó ʻi homa keté pea tui ʻi homa tuʻá ʻa e leta kakaú.
Mālohi Fakatoʻú ʻi he Vai Kaukaú
ʻI he ʻaho ʻe taha naʻe ʻikai ke ma tui ai mo ʻEnisī homa leta kakaú, ko ia naʻá ma pikipiki pē ki he tafaʻaki ʻo e vai kaukaú. Naʻe fakakaukau ʻa ʻEnisī ke ne ʻahiʻahi kakau ki he tafaʻaki ʻe tahá ʻa ia naʻe fute ʻe fā (1.2 m) hono mamaʻó. Ne u kiʻi momou he kamataʻangá, ka naʻá ne fakaʻaiʻai au ke ma kakau. Pea neongo naʻá ku ilifia, ka naʻe ʻai ʻeku fuʻu mānava loloa peá u ʻalu hifo ʻi he vaí mo e ʻamanaki te u aʻu ki he tafaʻaki ʻe tahá. Naʻe ʻikai ke faingofua ʻeku tēteé ʻo hangē ne hoko ʻi heʻeku tui hoku leta kakaú, kae kamata ia ke u ngoto ki lalo. Ne u ilifia. Naʻá ku ʻiloʻi te u melemo. Naʻá ku manatuʻi hake leva e meʻa naʻe talamai ʻe heʻeku faiakó ʻi he ngaahi uike siʻi kimuʻá: “Kapau ʻe hoko ha meʻa lolotonga hoʻo kakaú, hiki hangatonu hake pē hao nima ʻe taha ki ʻolunga pea ʻe ʻalu atu ha taha ʻo tokoniʻi koe.”
ʻI heʻeku manatuʻi ʻení, ne u hiki hake hoku nimá ki he feituʻu ne u fakakaukau ko ʻolunga iá. Naʻe ʻikai ke u ongoʻi ha ʻea. Naʻá ku lī takai holo hoku nimá ʻo ʻikai pē ke u ʻiloʻi pe ko e fē ʻa ʻolunga. ʻOhovale pē kuo tau hoku ʻulú he tafaʻaki ʻo e vai kaukaú he taimi ko iá. Naʻe talitali mai ai ʻa ʻEnisī kiate au. Mahalo naʻe ʻikai ke ne ʻiloʻi ʻe ia ʻeku “melemó.”
Hili pē mei ai ha ngaahi uike siʻi, naʻa mau ō mo hoku fāmilí ki ha anovai. Naʻá ku aʻa holo pē ʻi he feituʻu naʻe mamahá he naʻe teʻeki ai pē ke u poto he kakaú. Naʻá ku ʻi ai ʻi ha miniti nai ʻe 10 mo ʻeku sio atu ki he haʻu ha taha ʻo hoku ngaahi kaungāmeʻá ki he anovaí. Naʻá ku manavasiʻi. Ne u fakakaukau, “Fēfē ka ʻilo ʻe Sitefinī ʻoku ʻikai te u poto he kakaú?” ʻE mate hoku maá. Ko ia ne u peluki hoku ongo tuí ʻo ʻai pē ke pehē ʻoku ou kakau—ne u ʻalu ʻaki pē hoku nimá kae tātā hoku ongo vaʻé. Naʻe hopo ʻa Sitefinī ki he vaí ʻo kamata kakau. Ne toe ʻāsili ai pē ʻeku maá. Taimi siʻi pē naʻá ne haʻu ʻo talanoa mai kiate au. Hili pē iá naʻá ne kakau ki ha feituʻu kehe, ka u sio atu pē ki heʻene poto lelei he kakaú. Naʻe toe hoko atu ʻeku kakau fakangalingalí, mo ʻeku ongoʻi ngalivalé.
Hili ha ngaahi miniti siʻi, ne u fakakaukau ke tuku ʻeku ilifiá ka u kiʻi ʻahiʻahi kakau. Naʻá ku ʻi he feituʻu naʻe ʻikai ke loloto, ko ia ne u toʻo hake hoku nimá ʻo kamata ke u kakau fakakulī. Naʻe lava. Naʻá ku tētē. Neongo ko ha lau sekoni pē ka naʻá ku tētē. Ne u toutou fai ʻeni he efiafí kotoa. ʻI he taimi ne mau ʻalu aí, kuó u ʻosi lava ʻo kakau fakakulī holo ʻi he anovaí.
ʻOku Mālohi e Fusi Fakatoʻú
ʻI heʻeku fakakaukau atu ki he ongo meʻa ko ʻeni naʻe hokó, ne u ofo ʻi he mālohi ʻo e fusi fakatoʻú. Naʻá ne meimei ʻai au ke u melemo ʻi he ʻaho ʻe taha; pea ʻi he ʻaho ʻe taha naʻá ne fakaʻaiʻai au ke u lava ʻo kakau. ʻOku anga pehē ʻa e mālohi fakatoʻú—ʻe lava pē ke kovi pe lelei, ka ʻoku mālohi maʻu pē.
Ko e ʻuhinga ia ʻe taha naʻe ʻikai tui ai e kau Fālesí ki he ngaahi folofola ʻa Kalaisí, ko e mālohi fakatoʻú. “He naʻe lahi ʻenau manako ki he fakamālō ʻa e tangatá ʻi he fakamālō ʻa e ʻOtuá” (Sione 12:43). Naʻe mamata ʻa Līhai ʻi heʻene misí ki he kakai naʻa nau maaʻi e ʻEikí koeʻuhí ko kinautolu naʻe manuki mo tuhu mai mei he fuʻu fale lahi mo ʻataʻataá (vakai, 1 Nīfai 8:26–28).
ʻOku ou maheni mo e tafaʻaki ko ʻeni ʻoku kovi ai ʻa e mālohi fakatoʻú—ʻa e tafaʻaki ʻokú ne ʻai e kakaí ke nau tafoki mei he meʻa ʻoku nau ʻiloʻi ʻoku totonú. Naʻe manukia au koeʻuhí ko e ngaahi tuʻunga moʻui ʻa e Siasí. Naʻe ʻi ai haku ngaahi kaungāmeʻa naʻa nau loto ke u kaihaʻa vala mei falekoloa, kākā he siví, mo anga kovi ki he kakai kehé. Naʻe ʻikai ke nau loto ke u tētē mo lava ʻo kakau, ka naʻa nau hangē ha ngaahi taula ke nau fusi hifo au ki lalo mo feinga ke u melemo.
Ka ne ʻi ai pē foki mo hoku ngaahi kaungāmeʻa naʻa nau fakaʻaiʻai au ke u fai ha ngaahi meʻa naʻe lelei—ha ngaahi meʻa naʻe lelei ange ai ʻeku moʻuí, kae ʻikai kovi ange. ʻI heʻeku ʻi he kalasi valú, naʻe fakalotoʻi au ʻe hoku kaungāmeʻa ko ʻAlí ke u ʻahiʻahi ke kau ʻi he timi laka ʻa e akó ki he taʻu hoko maí. Naʻe ʻikai ko ha meʻa faingofua ʻeni, he naʻá ku ilifia ke fakakaukau atu ki haʻaku feinga ke kau ʻi ha faʻahinga meʻa ʻi hoku ʻuluaki taʻu ʻi ha fuʻu akoʻanga māʻolunga lahi pehē. Naʻe fakalotoʻi au ʻe ʻAli ke fai ha meʻa ʻaonga ʻa ia naʻe ʻikai ke u mei lava taʻe kau ai ʻa e fakalotolahi mei haku kaungāmeʻa. Pea tupu mei he mālohi fakatoʻu ko ʻeni ʻi he anga fakakaumeʻá, naʻe faingofua ange ai ʻeku fetongi ki he faʻahinga moʻui ʻi he akoʻanga māʻolungá.
Ne fakaʻaiʻai au ʻe haku ngaahi kaungāmeʻa lelei ʻi he akoʻanga māʻolungá ʻo aʻu ki heʻeku hū ki he kolisí, peá u maʻu ai ha loto-toʻa ke u feinga ke kau ʻi he fakataha alēlea ʻa e fānau akó, ngāue ke lelei hoku māká, pea fakatupulaki ha fakamoʻoni ki he ongoongoleleí. Ko ha ngaahi ivi tākiena ki he leleí e ngaahi kaungāmeʻa ko ʻení ʻi heʻeku moʻuí. Naʻa nau fie maʻu ke u lavameʻa, pea naʻa nau tokoniʻi au ke u tupulaki.
Kuo akoʻi au ʻe he ngaahi meʻa ko ʻeni naʻe hokó ke u ʻilo ʻoku ʻikai kovi kotoa ʻa e ngaahi mālohi fakatoʻú, ʻo hangē ko e fakakaukau ʻa e tokolahi. ʻOku fakafalala pē ia ki he faʻahinga mālohi fakatoʻú pea mo e feituʻu ʻoku haʻu mei aí. Kuó u ʻiloʻi ko e taimi ʻoku ou feohi ai mo e ngaahi ivi tākiekina totonú, he ʻikai ke maʻu au ʻe he ngaahi founga ʻa e māmaní. Kuo hangē ʻa e ngaahi mālohi lelei mei he Siasí mo hoku ngaahi kaungāmeʻa ʻoku māʻolunga ʻenau tuʻunga moʻuí ko ha leta kakau ki heʻeku moʻuí, ʻo ne ʻai au ke u tētē.
Ngaahi tā fakatātā ʻa Steve Kropp