Te Ke Fie Maʻu ha Tāpuaki?
Lia Makalanaheni, ʻIutā, USA
ʻI he pongipongi ʻe taha ne u lue hake ai ʻi ha kiʻi tafungofunga naʻe tahifo lahi ʻi he tafaʻaki fakatonga ʻo e ʻUnivēsiti Pilikihami ʻIongí mo ʻeku fanongo ki he patō ha meʻa ʻi hoku tuʻá. Naʻá ku tafoki hake ʻo sio atu ki ha talavou ʻoku tokoto foʻohifo he ʻaluʻangá pea lī mamaʻo atu ʻene pasikalá kuo movete kongokonga. Ne u moʻutāfuʻua mo ʻene toki feinga ke ueʻi hake hono ulú. Ne u fakavave atu leva ki ai, fakataha mo ha toko fā kehe naʻe lue hake he tafungofungá.
Naʻe fakafoʻohakeʻi fakalelei hake ia ʻe he tamasiʻi ako naʻe ʻuluaki aʻu atu ki aí, pea naʻe lavelavea lalahi hono loungutú, ihú, kumukumú mo hono kemó. Naʻe tā mo e tamasiʻi ako ʻe taha ʻo kole tokoni. Naʻe ʻomai ʻe ha faʻē kei talavou naʻe tuʻu ʻi hoku tafaʻakí ha konga tupenu, pea naʻe holoholo ʻaki ia ʻe he tamasiʻi ako ʻuluakí ʻa hono loungutu kuo fetotoʻí. Naʻe tuʻu ai mo ha fefine ʻe toko taha ʻo tatali ke aʻu ange e kau ngāue fakafaitoʻó.
Naʻe ʻāʻā hake mata ʻo e tangata naʻe laveá, pea naʻá ne puputuʻu ʻi he ngaahi mata ʻo kinautolu naʻe tuʻu takai ʻiate iá.
Naʻá ne pehē: “ʻOku ou ʻi fē? Ko e hā e meʻa naʻe hokó?”
Naʻe tali ange ʻe he tamasiʻi ako naʻá ne pukepuke e konga tupenú ki hono ngutú, “ʻOkú ke ʻi he tafaʻaki fakatonga ʻo ʻapiakó. Naʻá ke tō ʻi hoʻo pasikalá.”
Ne toʻe e tangata heka pasikalá. Naʻá ne pehē ange, “ʻOku ou mamahiʻia. Tokoni mai muʻa!”
Naʻe talaange ʻe he tamasiʻi akó ʻoku lolotonga haʻu e tokoní peá ne ʻeke ange hono hingoá.
Naʻá ne mihimihi pē mo pehē ange, “Ko Tēvita.” Naʻá ne toe ʻeke ange pē, “ʻOku ou ʻi fē?”
Naʻe ʻalu ange ha tangata matuʻotuʻa ʻoku tui suti—mahalo pē ko ha palōfesa—ʻo fehuʻi kia Tēvita pe naʻá ne fie maʻu ha tāpuaki. Naʻá ne kamo hake ʻi he loto fakamālō.
Naʻe kiʻi tuʻu e palōfesá ʻo sio holo peá ne pehē ange, “Ka ʻoku ʻikai tama haʻaku lolo.” Ne kalokalo mo kinautolu naʻe tuʻu takaí. Naʻe toʻe ʻa e talavou naʻe laveá mo feinga ke tuhu ki hono kató. Naʻe ala hifo e tamasiʻi ako naʻe tuʻu hoko atu ki aí ʻo toʻo hake mei hono kató ha tautauʻanga kī ʻoku tautau ai ha kiʻi hina lolo tapu.
Naʻe kaila e tamasiʻi akó, “ʻOku ʻi ai ʻene lolo!”
Naʻe ongoʻi nonga e talavou heka pasikalá ʻi he hilifakinima ki hono ʻulú ʻa e palōfesá mo e fānau ako tangatá ʻo foaki hono tāpuakí. Ne u ongoʻi nonga foki mo au ʻi he palōmesi ange ʻa e palōfesá ki he talavoú te ne sai, te ne maʻu ʻa e nonga, pea te ne toe ofi ange ki he Fakamoʻuí ʻi he meʻa ko ʻeni naʻe hokó.
Taimi siʻi pē kuo aʻu ange ʻa e kau tokoni fakafaitoʻó ʻo ʻave ʻa e talavoú. ʻI heʻeku lue ki he kalasí, naʻá ku ʻiloʻi naʻá ne ʻalu holo mo e lolo tapú koeʻuhí ke ne lava ʻo fakaʻaongaʻi ʻa e lakanga fakataulaʻeikí ke tāpuakiʻi ha taha ʻe faingataʻaʻia. Neongo ia, ko ia ia naʻe tāpuakiʻi ʻi he ʻaho ko ʻení. Ne u mavahe mei ai mo ʻeku ongoʻi ʻa e ʻofa lahi ki he kau tangata faivelenga ʻoku nau moʻui mateuteu ke tāpuakiʻi ha niʻihi kehe, pea ki he ʻEikí ʻa ia ʻokú Ne tāpuakiʻi mo kinautolu foki.