Faʻu ha Fakamatala Fakafoʻituitui ʻi he Mormon.org
ʻE lava ke vahevahe atu ʻa e ongoongoleleí ʻe he kāingalotu ʻo e Siasí he māmaní ʻaki ʻenau faʻu ha fakamatala fakafoʻituitui ʻi he Mormon.org. ʻOku fakaʻaongaʻi ʻe kinautolu ʻoku hū ki he saití ʻa e ngaahi fakamatala fakafoʻituituí ni ke ako fakahangatonu ai pē mei he kāingalotú ʻo kau ki he Siasí. Faʻu hao fakamatala fakafoʻituitui pea vahevahe hoʻo fakamoʻoní mo ha niʻihi kehe ʻaki hoʻo muimui ʻi he ngaahi sitepu ko ʻení:
-
Hū ki he mormon.org/create. Sign in ʻo fakaʻaongaʻi hoʻo ʻakauni LDS. Kapau ʻoku ʻikai ke ʻi ai haʻo ʻakauni LDS, lesisita ke maʻu hao hingoa ngāue ki he polokalamá mo haʻo lea fufū ʻaki haʻo fakahā ho fika lekooti mēmipasipí mo ho ʻaho fāʻeleʻí. Maʻu ho fika mēmipasipí mei hoʻo lekomeni temipalé pe ko haʻo fetuʻutaki ki he kalake mēmipasipi ʻi homou uōtí pe koló.
-
Fakahū ha fakamatala ʻi he ngaahi tafaʻaki ko ʻení: “Fekauʻaki Mo Au,” “Ko e ʻUhinga ʻo ʻEku Hoko ko ha Māmongá,” “Founga Hono Moʻui ʻAki ʻEku Tuí,” “Ngaahi Fehuʻi ʻOku Lahi Hono ʻEké,” “Ngaahi Talanoa Fakatāutahá,” mo e “Fakamatala Kehé.”
-
ʻI hoʻo faʻu hoʻo fakamatala fakafoʻituituí, manatuʻi ko hoʻo talanoá ki ha kakai ʻoku ʻikai ke nau Siasi. Fakaʻehiʻehi mei he ngaahi kupuʻi lea ʻoku ʻikai ke nau maheni mo iá. Hangē ko ʻení, ʻe lava ke ke pehē ange, “ʻOku ou akoʻi tuʻo taha he māhina ha kalasi ʻa ha kakai fefine lalahi mei he ngaahi lea ʻa e kau palōfita moʻuí,” kae ʻoua ʻe pehē ange, “Ko e faiako au ʻo e Ngaahi Akonaki maʻa Hotau Kuongá ʻi he Fineʻofá.”
-
ʻAve hao tā, ho hingoa ʻuluakí, mo ha kiʻi fakafeʻiloaki nounou pē. ʻE toe lava foki ke fakafehokotaki hoʻo fakamatala fakafoʻituituí ki hoʻo blog, hoʻo ʻakauni ʻi he Facebook, pe Twitter neongo ʻoku ʻikai fie maʻu ia. Fakaʻehiʻehi mei hano fai ʻo ha fakamatala fakatāutaha fakaʻāuliliki, hangē ko ho hingoa fakaʻosí pe feituʻu ʻokú ke nofo aí.
Ko ʻene kakato pē hoʻo fakamatala fakafoʻituituí, ʻe ʻave leva ia ki he niʻihi ʻoku nau tokangaʻí ke fakangofua mai. Ko hono fakangofua pē ʻo e fakamatala fakafoʻituituí, ʻe lava leva ke lau ʻe kinautolu ʻoku hū ki he saití ʻa hoʻo fakamoʻoní pea nau fetuʻutaki atu ke maʻu ha fakamatala lahi ange kau ki he Siasí.