Falala ki he ʻEikí
“Falala ki [he ʻEikí] ʻaki ho lotó kotoa” (Lea Fakatātā 3:5).
ʻI heʻeku kei siʻí ne u muimui ʻi heʻeku tamaí ʻi he feituʻu kotoa pē naʻá ne ʻalu ki aí. Naʻá ku saiʻia maʻu pē ʻi heʻene moʻui līʻoa maʻá e ʻEikí. Naʻá ne fokotuʻu ha tuʻunga moʻui māʻolunga ʻo e ngāue taʻesiokitá maʻaku. ʻI he taʻu kotoa pē naʻá ne mālōlō ai mei he ngāué ʻi ha uike ʻe taha. Naʻe ʻikai ke ʻalu ia ai ʻo mālōlō ʻeveʻeva, ka naʻá ne kole ki hoku fāmilí ke tokoni ange ʻi hono vali e fale ʻo e uitou hoko ange ki ʻapí. Ko ha fakatātā pē ʻeni ʻe taha ʻo e ngaahi ngāue tokoni lahi naʻá ne faí. Naʻá ne fakakaukauʻi maʻu pē ʻa e niʻihi kehé.
Naʻe puke lahi ʻeku tamaí lolotonga ʻeku ʻi he akoʻanga māʻolungá. Naʻá ku lotua maʻu pē ʻo kole ki he Tamai Hēvaní ke tāpuakiʻi ʻeku tamaí ke ne sai. Naʻá ne ʻi falemahaki ʻi ha māhina ʻe taha peá ne toki mālōlō.
Ko ha meʻa fakamamahi ʻeni ki homau fāmilí. Naʻe ʻikai ʻuhingamālie ʻeni kiate kimautolu he naʻa mau fie maʻu ʻemau tamaí. Naʻá ku lotua ke mahino kiate au hono ʻuhinga naʻe hoko ai ʻení mo hono ʻuhinga naʻe ʻikai tali ai ʻe he Tamai Hēvaní ʻeku ngaahi lotú. Hangē kiate au naʻe fakalongolongo pē ʻa langí he naʻe ʻikai tali mai ʻeku ngaahi lotú. Naʻá ku ongoʻi kuo tuku au ʻe he Tamai Hēvaní ke u tuēnoa. Ka naʻe kei hokohoko atu pē ʻeku lotú.
Hili mei ai ha taʻu ʻe taha, naʻá ku ʻi ha houalotu sākalamēniti ʻa ia naʻe lau ai ʻa e tokotaha naʻe leá mei he tohi Lea Fakatātaá:
“Falala ki [he ʻEikí] ʻaki ho lotó kotoa, pea ʻoua naʻá ke faʻaki ki ho poto ʻoʻoú.
“Ke ke fakaongoongo kiate ia ʻi ho hala kotoa pē, pea ʻe fakatonutonu ʻe ia ʻa ho ngaahi ʻalungá.” Lea Fakatātā 3:5–6
Naʻe fakamoʻoni kiate au ʻe he Laumālié ko e tali ʻeni ki heʻeku lotú! Naʻe fie maʻu ke u falala ki he ʻEikí. Naʻe ʻosi ha taimi fuoloa peá u toki maʻu ʻa e tali ko iá, pea naʻe ʻikai ko e tali ia ne u fie maʻú, ka ko e tali fakaʻofoʻofa taha ia ki ha lotu. Naʻe ʻikai fie maʻu ia ke mahino kiate au hono ʻuhinga naʻe hoko ai ʻení. Naʻe fie maʻú ke u falala ki he ʻEikí.
Te ke lava ʻo fai ha faʻahinga meʻa pē ʻi he taimi ʻokú ke falala ai ki he ʻEikí—ʻo aʻu pē ki he taimi ʻe fuʻu faingataʻa moʻoni aí—he ʻokú Ne fakatonutonu ho halá. Te Ne ʻi ho tafaʻakí. Te Ne pukepuke ho nimá. Te Ne fekauʻi mai ʻEne kau ʻāngeló ke takatakai ʻiate koe. Ko ʻeku fakamoʻoní ia. Pea ʻoku moʻoni ia kiate kitautolu hono kotoa.
Tā ʻo Sisitā Dalton naʻe fai ʻe he Busath Photography; tā ʻo e kahoá naʻe fai ʻe Robert Casey; ʻū tā fakafāmilí ʻi he angalelei ʻa Sisitā Dalton