Tokāteline mo e Ngaahi Fuakava 121:41–43

Naʻe akoʻi ʻe Siosefa Sāmita ʻa e founga ʻa e ʻEikí ki hono fakaʻaongaʻi e mafai ʻo e lakanga fakataulaʻeikí.

41 ʻOku ʻikai lava, pe ʻoku ʻikai totonu, ke ngāue ʻaki ha mālohi pe ivi ʻi he mafai ʻo e lakanga fakataulaʻeikí, kae ngata pē ʻi he feifeingaʻi, ʻi he faʻa kātaki fuoloa, ʻi he angavaivai mo e angamalū pea mo e ʻofa taʻemālualoi;

42 ʻI he angaʻofa, mo e ʻilo haohaoa, ʻa ia ʻe fuʻu fakafuofuolahi ʻa e laumālié taʻe ʻi ai ha mālualoi pea taʻe-ha-kākā—

43 Pea valokiʻi ʻi hono taimí, ʻi he lea māsila, ʻo ka ueʻi ke fai pehē ʻe he Laumālie Māʻoniʻoní; pea hili iá ke toki fakahā ange ʻa e ʻofa lahi ange kiate ia kuó ke valokiʻí, telia naʻá ne lau koe ko hono fili.

Feifeingaʻi

Feifeingaʻí—ko hono fakalotolahiʻi ha niʻihi kehe ke tui pe fai ha faʻahinga meʻa ʻi he fakaʻuhinga pe fakakolekole kinautolu.

Kātaki Fuoloá

Kātaki fuoloá—faʻa kātakí.

“Koeʻuhí ʻoku faʻa kātakiʻi kitautolu ʻe he ʻEikí, tau faʻa kātakiʻi ʻa kinautolu ʻoku tau tokoniʻí. ʻAi ke mahino kiate koe ʻoku ʻikai ke nau haohaoa, ʻo hangē pē ko kitautolú. ʻOku nau fehālaaki pē ʻo hangē ko kitautolú. ʻOku nau fie maʻu ke fakakaukau lelei ange ʻa e niʻihi kehé kiate kinautolu ʻo hangē pē ko kitautolú.

“ʻOua naʻá ke teitei foʻi ʻi hono tokoniʻi ha tahá. Pea ʻoua naʻá ke foʻi ʻi ha meʻa ʻokú ke fai.”

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Fai Atu Ai Pē ʻi he Faʻa Kātaki,” Liahona, Mē 2010, 58.

Angavaivai mo e Angamalū

Ko e niʻihi ʻeni ʻo e ngaahi meʻa ʻoku akoʻi mai ʻe he folofolá fekauʻaki mo e angavaivaí mo e angamaluú:

ʻOkú na kau ʻi he ngaahi ʻuluaki fua ʻo e Laumālié (vakai, Kalētia 5:22–23).
Ko e angavaivaí ko ha fakaʻilonga ia ʻo e kau tamaioʻeiki ʻa e ʻEikí (vakai, 1 Tesalonaika 2:7; 2 Tīmote 2:24).
ʻE maʻu ʻe he angamaluú ʻa e fonuá (vakai, Saame 37:11; Mātiu 5:5).
Ko e angamaluú ko ha fakaʻilonga ia ʻo e tui kia Kalaisí (vakai, Molonai 7:39).
ʻOku tupu mei he angamaluú ʻa e ʻaʻahi mai ʻa e Laumālie Māʻoniʻoní (vakai, Molonai 8:26).

ʻOfa Taʻemālualoí

Taʻemālualoí—moʻoni; ʻikai ko e loi pe fakangalingali.

Kuo fakahā atu ʻe ha taha ʻa e ʻofa moʻoní kimuí ni mai? Te ke lava fēfē ʻo fakahā ʻa e faʻahinga ʻofa ko iá ki he niʻihi kehé? Hiki ia ʻi hoʻo tohinoá.

Taʻe ʻi ai ha Mālualoi pea taʻe-ha-Kākā

Mālualoí—fakangalingali ko koe ia ka ʻoku ʻikai.

Kākā—anga kākā; olopoto.

Valokiʻi ʻi Hono Taimí ʻi he Lea Māsila

Valokiʻí—tafuluʻi pe fakatonutonu fakalelei; fakahā ʻo e loto taʻefiemālié.

Taimi totonú—vave; kei taimi; kimuʻa pea tōmui.

Lea māsilá—lea mahinó.

ʻO ka Ueʻi ke Fai Pehē ʻe he Laumālie Māʻoniʻoní

“ʻE lava ke hoko ha valoki ʻoku fai ʻi he ʻofa pea fakatatau mo e ueʻi ʻa e Laumālié, ko ha fakaafe ki he uouangatahá. Kapau he ʻikai ke fai ia ʻi he taimi ʻoku ueʻi ai kitautolu ʻe he Laumālie Māʻoniʻoní, ʻe tupu ai ha moveuveu.”

Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ke Mou Taha Pē,” Liahona, Sepitema 2008, 6.

Ko Siosefa Sāmita ʻi he Fale Fakapōpula Lipetií, tā ʻe Greg Olsen