Ko e Meʻa ʻOku Tau Tui Ki Aí

Ko e Lakanga Fakataulaʻeikí ʻa e Mafai ke Ngāue ʻi he Huafa ʻo e ʻOtuá

ʻOku puleʻi ʻe heʻetau Tamai ʻi Hēvaní ʻa e langí mo māmani. ʻOku fokotuʻutuʻu maau ʻa e ʻunivēsí ʻaki Hono mālohi taʻengatá. ʻOkú Ne vahe atu ha konga ʻo Hono mālohí mo e mafaí ki he kakai tangata moʻui taau ʻo e Siasí ke puleʻi ʻaki Hono Siasí ʻi he māmaní. ʻOku ui ʻa e mafai ko ʻeni kuo vahe atú ko e lakanga fakataulaʻeikí. ʻOku tau mamata ʻi he Fuakava Foʻoú ki he founga ko ʻeni hono vahe ʻo e fatongiá ʻi he taimi naʻe fakamafaiʻi ai ʻe Sīsū Kalaisi ʻEne Kau ʻAposetoló ke ngāue ʻi Hono huafá (vakai, Mātiu 16:19).

Ko e sīpinga ʻeni ʻo e puleʻanga ʻo e ʻOtuá. ʻOku lolotonga fokotuʻu ia ʻi māmani he ngaahi ʻahó ni. ʻOku fakamafaiʻi ʻa kinautolu ʻoku maʻu lakanga fakataulaʻeikí ke ngāue ʻi he huafa ʻo e ʻOtuá ʻi hono tataki Hono Siasí mo fakahoko ʻa e ngaahi ouau toputapu ʻoku fie maʻu ki he fakamoʻuí, hangē ko e papitaisó, hilifakinimá, tāpuakiʻi mo tufa ʻo e sākalamēnití, mo e mali temipalé. ʻOku fie maʻu ʻe he tangata, fefine, mo e fānau Siasi faivelenga kotoa pē ʻa e ngaahi ouau ʻo e lakanga fakataulaʻeikí pea ʻoku faitāpuekina kinautolu ʻi heʻenau maʻu iá.

Ngaahi Tuʻunga ʻo e Lakanga Fakataulaʻeikí

ʻOku konga ‘e ua ‘a e lakanga fakataulaʻeikí: Ko e Melekisēteki mo e ʻĒloné. Ko e mafai ʻoku ʻi he Lakanga Taulaʻeiki Faka-Melekisētekí ‘oku lahi ange ia ʻi he Lakanga Taulaʻeiki Faka-ʻĒloné.

ʻOku ʻi ai e ngaahi tuʻunga pau, pe ngaahi fatongia ʻi he ongo vahevahe ko ʻení. Ko e ngaahi tuʻunga ʻi he Lakanga Taulaʻeiki Faka-ʻĒloné ko e tīkoni, akonaki, taulaʻeiki, mo e pīsope. Ko e ngaahi tuʻunga ʻi he Lakanga Taulaʻeiki Faka-Melekisētekí ko e kaumātuʻa, taulaʻeiki lahi, pēteliake, Fitungofulu, mo e ʻAposetolo. ʻOku fokotuʻutuʻu ʻa kinautolu ʻoku nau maʻu e ngaahi tuʻunga ko ʻení ki ha ngaahi kōlomu pe ngaahi kulupu. ʻOku ʻi ai ʻa e ngaahi fatongia pau ʻoku vahe ki he tuʻunga takitaha.

Ngaahi Kī ʻo e Lakanga Fakataulaʻeikí

ʻOku ʻuhinga ʻa e lea ngaahi kií ki he mafai ke puleʻi ha ngaahi ʻiuniti pe vāhenga pau ʻo e Siasí. Hangē ko ʻení, ko e palesiteni fakasiteikí pē, pīsopé, mo e kau palesiteni ʻo e kōlomú ʻoku nau maʻu e ngaahi kī ʻo e lakanga fakataulaʻeikí ʻi he ngaahi siteikí mo e uōtí. ʻOku foaki e ngaahi kií ʻi he hilifaki ʻo e nimá ʻe ha taha maʻu lakanga fakataulaʻeiki kuo ʻosi fakamafaiʻi ke foaki ia.

• ʻOku maʻu ʻe he kau palesiteni ʻo e ngaahi kōlomu ʻo e Lakanga Taulaʻeiki Faka-Melekisētekí ʻa e ngaahi kī ʻo e kau palesitenisií mo hono puleʻi ʻo e ngaahi meʻa fakalaumālié (vakai, T&F 107:10, 18–19).

• ʻOku maʻu ʻe he kau palesiteni ʻo e ngaahi kōlomu ʻo e Lakanga Taulaʻeiki Faka-ʻĒloné ʻa e ngaahi kī ʻo e tauhi mai ʻa e kau ʻāngeló mo hono fakahoko ʻo e ngaahi ouau hangē ko e papitaisó mo e sākalamēnití (vakai, T&F 107:20).

• ʻOku maʻu ʻe he Palesiteni ʻo e Siasí ʻa e ngaahi kī kotoa ʻo e lakanga fakataulaʻeikí maʻá e Siasí fakakātoa (vakai, T&F 81:1–2).

Ko e ngaahi tuʻunga mo e ngaahi fatongia ʻe niʻihi ʻo e Lakanga Taulaʻeiki Faka-Melekisētekí:

1. ʻOku “fakamaʻu [ʻe he Kaumātuʻá] ʻa kinautolu kuo papitaiso ki he siasí, ʻi he hilifaki ʻo e nimá ki he papitaiso ʻo e afí mo e Laumālie Māʻoniʻoní” (T&F 20:41).

2. ʻOku “fakahoko [ʻe he kau Taulaʻeiki Lahí] ʻa e ngaahi meʻa fakalaumālié” pea ʻoku nau maʻu “ha totonu ke ngāue ʻi he” ngaahi tuʻunga ʻo e kaumātuʻá, taulaʻeikí, akonakí, mo e tīkoní (T&F 107:12).

3. ʻOku foaki ʻe he kau pēteliaké ʻa e ngaahi tāpuaki fakapēteliaké (vakai, T&F 107:53; 124:91–93).

4. ʻOku malanga ʻaki ʻe he Kau Fitungofulú ʻa e ongoongoleleí pea ko e kau fakamoʻoni makehe ʻa kinautolu ʻo Sīsū Kalaisi ‘o fakatatau mo e fakahinohino ʻa e Kōlomu ʻo e Kau ʻAposetolo ʻe Toko Hongofulu Mā Uá (vakai, T&F 107:25, 34).

5. ʻOku hoko e Kau ʻAposetoló ko e “kau fakamoʻoni makehe ki he huafa ʻo Kalaisí ʻi he māmaní kotoa” (T&F 107:23).

Ko e ngaahi tuʻunga mo e ngaahi fatongia ʻe niʻihi ʻo e Lakanga Taulaʻeiki Faka-ʻĒloné:

1. ʻOku tufa ʻe he Kau Tīkoní ʻa e sākalamēnití.

2. Ko e kau akonakí ʻoku nau “leʻohi ʻa e siasí maʻu ai pē, pea ke [nau] ʻiate kinautolu mo fakamālohi ʻa kinautolu” (T&F 20:53).

3. Ko e kau taulaʻeikí ʻoku nau “akonaki, … fai papitaiso, pea ʻoatu ʻa e sākalamēnití, pea ʻaʻahi ki he fale ʻo e kāingalotú takitaha” (T&F 20:46–47).

4. Ko e kau pīsopé ko e kau palesiteni kinautolu ʻo e kōlomu ʻo e kau taulaʻeikí, pea ʻoku nau puleʻi ʻa e kāingalotu kātoa ʻi ha uooti ʻi heʻenau hoko ko e kau taulaʻeiki lahí, (vakai, T&F 107:87–88).

Ki ha fakamatala lahi angé, vakai, Ngaahi Tefitoʻi Moʻoni ʻo e Ongoongoleleí (2009), 77–82; Tuʻu Maʻu ʻi he Tuí (2004), 91–99; mo e T&F 20:38–79; 84:1–44; 107.

“Pea ʻi he ʻikai ke ʻi ai hono ngaahi ouaú, mo e mafai ʻo e lakanga fakataulaʻeikí, ʻoku ʻikai ke fakahā ʻa e mālohi ʻo e anga faka-ʻOtuá ki he tangata ʻi he kakanó” (T&F 84:21).

Ta fakatātaaʻi ʻo e ngaahi ʻatá ʻe Hyun-Gyu Lee, Welden C. Andersen, Matthew Reier, Ruth Sipus, Craig Dimond, mo John Luke