Tukufolau ʻo Hao Lelei ki ʻApí
Neongo ʻe ʻi ai e taimi ʻe hou ai e tahi ʻo e moʻuí, ka ʻoku ʻiloʻi ʻe he toʻu tupu Siasi ʻi Visakapanami ʻi ʻInitiá ko e taulanga ʻo ʻapí ko ha hūfangaʻanga ia ʻo e nongá.
ʻOku ʻalu ki tahi ʻa e kau tangata toutai ʻo Visakapanami ʻi ʻInitiá ʻi he ʻaho kotoa pē. ʻI he ngaahi ʻaho lahi, ʻoku aake vaivai e ngaahi peaú pea nonga mo e tahí, pea foki mai e ʻū vaká kuo fonu ʻi he iká. Ka ʻoku faʻa ʻi ai e taimi kuo hou ai e tahí. ʻOku fakapōpōʻuli ʻa e langí, lalahi e ngaahi peaú, pea fiefia pē e kau toutaí ke nau foki hao mai ki honau taulangá.
ʻOku ʻalu atu e toʻu tupu ʻo Visakapanamí ki māmani ʻi he ʻaho kotoa pē. ʻI he ngaahi ʻaho lahi ʻoku lelei ai e moʻuí kiate kinautolu. ʻOku nau maʻu ʻa e ʻiló, fakakaungāmeʻa, pea nau foki ki ʻapi kuo fakafonu ʻaki kinautolu ʻa e fiefia ʻo e moʻuí. Neongo ia, ʻoku ʻai pē pea kiʻi houhou ʻa māmani. ʻOku hoko mai ʻa e loto-foʻí ʻo hangē ha peaú, ʻoku haʻu māʻolunga mo fakamanavahē ʻa e ʻahiʻahí, pea ʻai ʻe he loto-veiveiuá ke fakapoʻuli ʻa e langi fakalaumālié. ʻOku nau fiefia he ngaahi ʻaho ko iá ʻi heʻenau foki hao ki honau hūfangaʻanga ʻo e melinó, ʻa e ngaahi taulanga ko ia ʻoku nau ui ko ʻapí.
Ngaahi Fakatātā he Holisí
ʻOku nofo ha toko ua ʻo e toʻu tupu Siasi ko iá, ʻa Naka Pusani Latinami mo Pavani Kotala Latinami, mo ʻena ongomātuʻá ʻi ha kiʻi fale nofo totongi naʻe mamaʻo mei kolo kae ofi ki ha fale ngaohiʻanga ukamea naʻe ngāue ai ʻena tamaí. Te ke lava pē ʻo tala ʻi he ngaahi fakatātā he falé ʻa e ngaahi meʻa naʻe mahuʻingá. Naʻe fonu e funga laupapa he veʻe matapā ki muʻá ʻi he ngaahi tā fakafāmilí, pea ʻi he holisi ʻo e ʻū loki mohé ʻa e ngaahi fakatātā ʻo e Fakamoʻuí, temipalé, mo e Kau Palesitenisī ʻUluakí.
ʻOku pehē ʻe Pavani, “ʻI heʻeku ʻā haké, ko e ngaahi fakatātā pē ko iá ʻoku ou ʻuluaki sio ki aí. Ko e ngaahi meʻa fakamuimuitaha pē ia ʻoku ou sio ki ai peá u mohe he poʻulí.”
ʻOku tui ʻa Pavani te tau lava kotoa pē ʻo faʻu ha ngaahi taulanga ū ʻo e nongá ʻi hotau ngaahi ʻapí. ʻOkú ne pehē, “Ko hono ʻuhinga ia ʻoku ou tauhi ai ke maʻa e ʻū meʻá. Ko e founga ia ʻe taha ke ongoʻi ai ʻe he Laumālié ʻokú ne fiemālie ke ʻi heni.” Pea ʻi ʻapiakó, “ʻOku faʻo maʻu pē ʻa e Ki Hono Fakamālohia ʻo e Toʻu Tupú ʻi heʻeku kato akó, koeʻuhí ke u sio ki ai he taimi kotoa pē ʻoku ou toʻo ai ha tohi mei aí.”
Naʻe ongoʻi ʻe Naka hono ʻomi ʻo e melinó kiate ia ʻi heʻena ngaahi fepōtalanoaʻaki mo hono tuofefiné. ʻOkú ne pehē, “ʻOkú ma talanoa mo ʻema mātuʻá pea maʻu faleʻi meiate kinaua ʻi he ngaahi meʻa lahi. Ko ʻema tamaí ʻoku palesiteni fakavahefonuá, ko ia ʻokú ma talanoa mo ia he taimi kotoa pē, ko e palesiteni fakavahefonua mo e tamai. Pea ʻokú ma saiʻia he talanoa mo ʻema faʻeé. Ka ʻoku ʻi ai e meʻa makehe ia ʻi heʻeku lava ke talanoa mo hoku tuofefiné.” ʻI he taimi ʻoku loto mamahi ai ʻa Naká, ʻoku fakafiemālieʻi ia ʻe Pavani. Ko e tokotaha fakalongolongo ʻa Naka, ko ia ai ʻoku tokoni ʻa Pavani ke ne toe feohi ange mo e niʻihi kehé.
ʻOku pehē ʻe Naka, “Ka ko e meʻa tēpuú ʻa ʻema fefakamālohiaʻaki ʻi hono tauhi ʻo e ngaahi tuʻunga moʻuí.” Hangē ko ʻení, ʻe kole faleʻi ʻa Pavani kia Naka fekauʻaki mo e teunga tāú. “Kapau ʻoku ʻikai te ne pehē ʻoku taau mo e ngaahi tuʻunga moʻui ʻo e Siasí, pea he ʻikai ke u tui ia.” Pea naʻá na faʻa talanoa kau ki he ngāue tokoní, ʻi he Siasí pea ʻi he tukui koló. Mahalo ʻoku tupu mei he ngaahi talanoa pehení ʻa e fakaʻānaua ʻa Naka ke ne hoko ko ha toketā mafú. ʻOkú ne pehē, “ʻOku ou loto ke hoko ʻeku ngāue maʻuʻanga moʻuí ko ha toe founga pē ia ʻo hono fakahoko ʻo ha ngāue tokoní.”
ʻOku fakamatala ʻa e ongo fānau Latanamí ʻo pehē ʻoku toe lelei ange foki honau fāmilí ʻi he ʻi ai ʻa e lakanga fakataulaʻeikí. ʻOkú na manatu loto ki hono taki ʻe heʻenau tamaí ʻa e toenga ʻo e fāmilí ki he lotú ʻi he taʻu ʻe valu kuo hilí, neongo naʻa nau fononga ki heʻenau ngaahi fakatahaʻangá—ʻa kinautolu toko fā—ʻi he kilomita ʻe 40 (maile ʻe 25) pea toe foki, ʻi ha motopaiki pē ʻe taha. Naʻá na talanoa ki he ngaahi lotu naʻe fai ʻi he tuí maʻa Pavani he taimi naʻe puke ai he ʻaho naʻe papitaiso ai ʻa e tangataʻeikí, ki he tāpuaki ʻo e lakanga fakataulaʻeikí naʻe foaki kia Naka ʻi heʻene puke lahi lolotonga e ngaahi sivi ʻi ʻapiakó, mo e feongoongoi maʻu pē ʻa e tangataʻeikí mo e fineʻeikí, mo kinaua, mo lotu ki he Tamai Hēvaní ʻi he taimi naʻa nau fai ai ha ngaahi fili lalahí.
ʻOku pehē ʻe Pavani, “Kuó u mamata ʻi he ngaahi liliu ki he leleí ʻi he tupulaki homau fāmilí ʻi he ongoongoleleí. Kuo tataki au, ko e siʻi taha ʻi he fāmilí, ʻi he hoko ʻeku ongomātuʻá mo hoku tuongaʻané ko e faʻifaʻitakiʻangá. ʻOku ou ʻiloʻi naʻe tokoniʻi au ʻe Sīsū Kalaisi ʻi he tafaʻaki kotoa ʻo ʻeku moʻuí. ʻOku ʻākilotoa au ʻe ha kakai ʻoku nau tokoniʻi mo ʻofa ʻiate au, pea ʻoku ʻofa foki mo e Fakamoʻuí ʻiate au. ʻOku mahuʻinga ange ʻa e ʻofa ko iá kiate au ʻi ha toe meʻa.”
Naʻe fakamoʻoniʻi ʻa e ʻofa ko iá ʻi he taimi naʻe fononga atu ai e fāmilí ke silaʻi kinautolu ʻi he Temipale Hongo Kongo Siainá. ʻOku pehē ʻe Naka ko e temipalé ʻa e taulanga malu taha ʻi he māmaní: “Ko ha feituʻu ʻo e māʻoniʻoni. ʻOkú ne ʻomi ʻa e māʻoniʻoní ki homau ʻapí ʻi heʻemau fakakaukau ʻataʻatā pē ki aí.” Pea ʻoku hoko ai ʻa e fale ʻo e fāmili Latanamí ko ha feituʻu ʻoku fakafiefia e nofo aí.
Malu ʻi he Folofolá
ʻOku pehē ʻe Hepisipa, Senitipi, mo Siutiti Peta, ʻa ia ʻoku nau nofo mo ʻenau mātuʻá ʻi he loto kolo ʻo Vaisá (ko hono ui ia ʻo e koló ʻe he kakai aí), ʻoku hoko ʻa e folofolá ko ha taula ʻi honau taulanga ʻo e melinó. Naʻe pehē ʻe Hepisipa, “ʻI heʻemau lau e folofolá, ʻoku mau fakaafeʻi ai e Laumālié ke tataki kimautolu ʻi he hala totonú, ke mau fai ha ngaahi fili ʻoku leleí ʻi heʻemau moʻuí. ʻOku mau fakaafeʻi foki ʻa e Laumālié ki homau ʻapí ʻi heʻemau fai ʻa e efiafi fakafāmili ʻi ʻapí mo e lotu fakafāmilí.”
ʻOku pehē ʻe Senitipi, ko e moʻoni ʻoku fakamanatu ange ʻe heʻene faʻeé ke nau “lotu ʻi he ʻaho kotoa pē ʻi heʻenau mavahe atu mei ʻapí mo ʻenau foki maí. ʻI he taimi ʻokú ne talamai ai, ‘Kātaki ka mou maʻu ʻa e loto fakafetaʻí,’ ʻokú ne ngaohi au ke u fie fakamālō ʻi he meʻa kotoa pē.”
ʻOku pehē ʻe Siutiti ia ʻoku toe ʻi ai mo ha feituʻu ʻo e melinó, makehe mei honau ʻapí, ʻa ia ko e ngaahi fakatahaʻanga ʻa e koló, ʻoku ako fakataha ai ʻe he kāingalotú ʻa e ongoongoleleí pea ʻoku talitali lelei ʻa e kakai kotoa pē ke nau lotu ai, pea ʻi ai mo e ngaahi ʻekitivitī ʻe lava ke fefakamālohiaʻaki mo fepoupouaki ai ʻa e toʻu tupu ʻoku tatau ʻenau ngaahi tuʻunga moʻuí. “ʻOku folofola mai e ʻEikí ko e maama kitautolu ʻo māmaní” (vakai, Mātiu 5:14). “ʻI heʻemau fakatahataha maí, ʻoku mau tuku ke ulo lahi ʻa e maama ko iá pea ʻoku mau ongoʻi fiemālie ange ʻi heʻemau ʻinasi fakataha aí.”
Fiefia ʻi ʻApi
Ko e faʻahinga feʻinasiʻaki ia naʻá ne ʻomi ʻa e ongoongoleleí ki he fāmili Patí. Naʻe ʻikai faʻa taʻofi e malimali ʻa e ongo tautehina ko Senihaia mo Suta Patí mo ʻena faʻeé mo e tamaí—ʻoku nau vēkeveke ke fakamatala ki he anga ʻenau kau ki he Siasí.
Ko e fakamatala ʻeni ʻa Senihaiá, “Naʻe kau fakataha mai homau fāmilí ki he Siasí. Kuo fuoloa ʻemau fekumi ki he siasi totonú. Naʻa mau ʻiloʻi ʻa e fie maʻu ko ia ke papitaiso kimautolú. Pea ʻi he ʻaho ʻe taha naʻe sio ai ʻema tamaí ki ha ongo ʻeletā. Naʻe tuʻu ʻi hona pine hingoá ʻa e ‘Siasi ʻo Sīsū Kalaisí,’ peá ne ʻiloʻi naʻe pau ke ne talanoa mo kinaua.”
Naʻe kamata ke nau fai ha ngaahi fealēleaʻaki fakamātoato. ʻOku pehē ʻe Suta, “Naʻa mau ako ʻo ʻiloʻi naʻe mamahi ʻa Sīsū Kalaisi maʻatautolu ke fakahoko ʻa e finangalo ʻo e Tamaí, ʻo Ne fakakakato ʻa e Fakaleleí ʻo lava ai ke tau toe foki ki he Tamai Hēvaní ʻaki ʻetau muimui ʻiate Iá.” ʻI he maʻu ʻe he fāmili Patí ʻa e fakamoʻoni mālohi ko iá, naʻe hangē ʻenau kau ki he Siasí ko haʻanau tukufolau ki ʻapi ʻi ha tahi nongá, pea talu mei ai mo ʻenau fiefia ʻi he fili naʻa nau faí.
ʻOku folau atu ʻa e ngaahi vaka toutaí mei Visakapanami ʻi he ʻaho kotoa pē. ʻOku ʻalu atu ki māmani ʻa e toʻu tupu ʻo e Kolo Visakapanami ʻUluakí, Uá, mo e Kolo Kauvaká ʻi he ʻaho kotoa pē. ʻOku lava ke nau foki kotoa mai pē ki ha taulanga malu ʻoku nau maheni ki ai. Ka ki he Kāingalotú, ʻoku ʻikai ko ha taulanga ʻeni ʻoku malu ʻi he taimí ni pē ka ʻoku malu foki ʻo aʻu ki ʻitāniti.
ʻŪ taá naʻe fai ʻe Richard M. Romney
ʻOku ʻomai ʻe he Siasí mo e fāmilí ha ngaahi taulanga malu maʻá e fāmili Latinamí (peesi ki muʻá) pea mo (takai fakatoʻomataʻu mei ʻolunga taha he toʻohemá) Siutiti, Senitipi, mo Hepisipa Peta; Pavani mo Naka Latanami; ko e fāmili Patí; mo e toʻu tupu kehe mei Visakapanami, ʻa ia ʻoku ʻi ai ha kolo ʻe tolu.