Ngaahi Fehuʻi mo e Talí
“Naʻá ku lotomamahi ʻaupito ʻi ha taha ʻo hoku ngaahi kaungāmeʻá. ʻOku ou ʻiloʻi ʻoku totonu ke u faʻa fakamolemole, ka ʻe anga fēfē nai haʻaku ikunaʻi hoku mamahí?”
ʻE lava pē ke faingataʻa hano fakamolemoleʻi ho kaungāmeʻá mo hono fakangaloki hoʻo loto mamahí. ʻE fie maʻu ʻi he fakamolemolé mo e ikunaʻi hoʻo loto mamahí ʻa e manavaʻofá—ʻaʻau pea mo e ʻEikí. ʻOku ʻikai ko ho fatongiá ke feinga ke ngalo ʻa e mamahí ka ko e fakamolemoleʻi: ke fakahaaʻi ha manavaʻofa ki ho kaungāmeʻá (vakai, T&F 64:8–10). Ko e taimi te ke fai ai iá, kapau te ke kolea e tokoni ʻa e ʻEikí, ʻe ʻaloʻofa atu kiate koe. Ko hono ʻuhingá, te Ne lava ʻo fetongi hoʻo loto mamahí ʻaki ha ʻofa pea mo ha nonga.
Talanoa mo ho kaungāmeʻá. Feinga ke mo mahino ʻa e meʻa naʻe hokó. Te ke ala ʻilo ta naʻe ʻikai ko ha feinga ho kaungāmeʻá ke fakalotomamahiʻi koe, ʻa ia te ne ʻai ke faingofua ange ai hono fakamolemoleʻí mo ikunaʻi hoʻo loto mamahí.
Tatau ai pē kapau ʻoku faingataʻa ke fakamolemoleʻi pe ʻe taimi lōloa, feinga pē. ʻE fāifai pē peá ke loto ke ʻilo ʻe ho kaungāmeʻá kuó ke fakamolemoleʻi mo kei fie kaungāmeʻa pē mo ia. He ʻikai teitei lava ʻo fakaiku hano kukuta ia ʻo ha ʻita ʻi ha kaungāmeʻa ki he melino ko ē ʻoku maʻu ʻi he fakamolemoleʻi moʻoní.
Manatuʻi ʻoku tau fakafalala kotoa ki he Fakalelei ʻa e Fakamoʻuí ke fakamolemoleʻi ai ʻetau ngaahi angahalá. Lotu ke ke lava ʻo fakamolemoleʻi, pea tui ʻe tokoniʻi koe ʻe he ʻEikí. ʻOkú Ne maʻu ʻa e mālohi ke fakamoʻui e mamahi ʻi ho lotó.
Tuku e ʻEikí ke Fakamaau
Tuku e ʻEikí ke fakamaau ʻi he ngaahi tōʻonga kovi ne fai ʻe he kakai kehé. Manatuʻi ʻoku pehē ʻe he ʻEikí: “Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” (T&F 64:10). ʻOku faingataʻa ke fakangaloki ʻa e ngaahi ongo fakamamahí, ka kapau te ke lotua ha tokoni, te ke ʻilo ʻe lava ʻe he fakamolemolé ke fakamoʻui ʻa e ngaahi kafo lolotó mo fetongi ʻa e loto ʻitá ʻaki e nonga mo e ʻofa koē ko e ʻOtuá pē te Ne lava ʻo foakí.
Sēnesi H., taʻu 16, ʻAnitofakasitā, Silei
Fakamolemoleʻi ʻa e Taha Kotoa pē
Naʻe hanga ʻe he faingataʻaʻia ʻa e ʻEiki ko Sīsū Kalaisí ʻo ʻai ia ke tautaʻa ko e taʻataʻa ʻi he ava kotoa pē Hono kilí, ka naʻá Ne ikunaʻi ʻa e mamahí mo maʻu ha mālohi ke fakamolemoleʻi ʻi he lolotonga ʻo ʻEne ʻi he kolosí. Naʻe ʻikai ʻuhingá ko ha ʻikai ke Ne ongoʻi ʻa e mamahí ka koeʻuhí ko Ia, ko e meʻa pē taha naʻe mahuʻingá ko e finangalo ʻo e Tamaí. Ko e meʻa tatau pē mo kitautolu, ko e meʻa pē taha ʻoku totonu ke mahuʻingá ko e finangalo ʻo e ʻOtuá, pea ʻokú Ne fie maʻu kitautolu ke tau fakamolemoleʻi ʻa e taha kotoa. Tatau ai pē kapau ʻoku tuai e moʻui hotau ngaahi matakafó, ʻe lava pē ke tau ikunaʻi hotau mamahí tuʻunga ʻi he lotu mo e fakamolemoleʻi fakamātoato ʻo kinautolu ne faihala maí.
ʻAhou O., taʻu 17, ʻAivolī Kousi
Lotu ke ke Poto he Fakamolemolé
Kuo pau ke ke lotu ke ke poto he ʻofá mo e fakamolemoleʻi ʻo e niʻihi kehé. Neongo ʻe mātuʻaki faingataʻa he taimi ʻe niʻihi ʻa e fakamolemoleʻí, ka ʻoku hōifua maʻu pē ʻetau Tamai Hēvaní ke tokoni mai kiate kitautolu. Manatuʻi ʻa e sīpinga naʻe tā ʻe he Fakamoʻuí ʻaki ʻene fakamolemoleʻi e taha kotoá. ʻOku pehē ʻe he Kolose 3:13, “ʻO fetoutou fekātakiʻaki pē, mo fefakamolemoleʻaki pē, ʻo kapau ʻoku ai ha taha ʻoku koviʻia ia ki ha taha: ʻo hangē ko e fakamolemole ʻe Kalaisi ʻa kimoutolú, ke pehē pē ʻa kimoutolu.” Ko e fakamolemole moʻoní ko ha ngāue, pea ʻi he taimi ʻe niʻihi ʻoku fuʻu fuoloa. Ka ko e taimi ʻoku tau fakamolemoleʻi moʻoni aí, te tau ongoʻi ha fiemālie mo ha fiefia lahi. ʻOku ou ʻiloʻi te mou lava ʻi he founga ko iá ke huʻi atu meiate kimoutolu ʻa e mamahí mo maʻu ʻa e fiefia moʻoní.
Leonato L., taʻu 20, Puenosi ʻAealesi, ʻĀsenitina
ʻOfa ʻIate Kinautolu
Kuó u maʻu ko e founga lelei taha ke fakaleleiʻi ai ʻa e tāufehiʻá ke ʻofa ʻi he taha naʻá ne fakalotomamahiʻi koé. Ko e hili pē hano fakalotomamahiʻi au ʻe ha taha, ʻoku ou feinga ke fakahīkihikiʻi kinautolu mo angaʻofa lahi ange kiate kinautolu ki he lahi taha ʻe lavá. ʻI hoʻo fai ʻení, he ʻikai toe tafunaki ʻa e ʻitá ʻi ho lotó. Ka ʻoku mole fakaʻāufuli leva. Te ke ala maʻu ha vā toe lelei ange mo ha taha pē te ne fakaloto mamahiʻi koe.
Keiti A., taʻu 18, ʻIutā, USA
Vakai Kiate Kinautolu ʻAki e Fofonga ʻo e ʻEikí
Naʻe ongoʻi ʻe Sīsū Kalaisi hoʻo mamahí koeʻuhí kae lava ʻo fakamolemoleʻi koe ʻi hoʻo ngaahi angahalá pea mo ke lava foki ʻo fakamolemoleʻi ʻa e niʻihi kehé. Ko e taimi te ke lotua ai ke ke lava ʻo vakai ki ha taha ʻi Hono fofongá, te ke fakatokangaʻi ʻe mahino lelei ange kiate koe ʻa kinautolu. Pea ʻi he fakalau atu ʻa e ngaahi uiké, te ke fakatokangaʻi ʻe mōlia atu hoʻo loto ʻitá.
Kimipelī B., taʻu 18, Nepulasikā, USA
Lotu ke ke Ongoʻi Fakamolemole
Lotu ki heʻetau Tamai Hēvani ʻofá ke ke maʻu mo ho ngaahi kaungāmeʻá ha toʻa ke fefakamolemoleʻaki. Ko ha anga faka-Kalaisi hono fakamolemoleʻi ko ia ha taha naʻá ne fakalotomamahiʻi koé. ʻOku fakamoʻui ʻe he fakamolemolé ʻo aʻu ki he loto mamahi tahá.
Līhai E., taʻu 16, ʻApu Tapi, Ngaahi Fonua ʻAlepea Fakatahatahá
Manatuʻi e ʻOfá
Naʻe akoʻi ʻe Nīfai, “Kuo fai ai ʻe he ʻEiki ko e ʻOtuá ha fekau ke maʻu ʻe he kakai kotoa pē ʻa e manavaʻofá, pea ko e manavaʻofa ko iá ʻa e ʻofá” (2 Nīfai 26:30). Ko e ʻofá ia kiate au, ko e founga lelei taha ia ke ikunaʻi ʻaki e mamahí ʻi ha taimi ne fakaloto-mamahiʻi ai au ʻe ha taha ʻo hoku ngaahi kaungāmeʻá. ʻOku ʻuhinga ʻa e ʻofá ke tali e ngaahi vaivai ʻo ha taha; ke kātakiʻi ha taha ne ne fakamaaʻi kitautolu; pea mo tekeʻi ʻa e ongoʻi ʻita ʻi he taimi ʻoku ʻikai fakahoko ai ʻe ha taha ha meʻa ʻi he founga ne tau ʻamanaki ki aí. Kapau ʻoku tau ʻofa ki hotau ngaahi kaungāmeʻá, ʻe tāpuakiʻi kitautolu.
Lieseli V., taʻu 21, Nikolo ʻOkisitenitolo, ʻOtu Filipainí
Falala ki he Fakaleleí
ʻOku fakafonu ʻaki hoku lotó ʻa e fiefiá ʻi he taimi ʻoku ou manatuʻi ai ʻe lava ʻe he mālohi fakalelei ʻo Sīsū Kalaisí ke toʻo atu ʻetau mamahí. ʻOku tau foua kotoa ha ngaahi meʻa fakamamahi mei he taimi ki he taimi, ka ʻi heʻetau pīkitai ki he folofola ʻa e Tamai Hēvaní, te tau lava ai ke maʻu ʻa e ivi ko ia ʻoku fie maʻu ke tau kātakí. Naʻa mo e taimi naʻe tukifaʻo ai Ia ʻe he kau sōtiá ki he kolosí, naʻe kei kole pē ʻa Sīsū Kalaisi ki he Tamaí ke fakamolemoleʻi kinautolu. Naʻe fonu hono lotó ʻi he ʻofa mo e ʻaloʻofa ki he faʻahinga kotoa ʻo e tangatá. ʻOku ou ʻilo kapau te tau omi kiate Ia ʻo kole tokoni, ʻe ʻōʻōfaki kitautolu ʻe Heʻene ʻofa taʻefakangatangatá.
Veisinia M., taʻu 20, Pelū