ʻI he Ongoongó
Maʻu e Tohi ʻa Molomoná he Lea Faka-Laosí he Taimí ni
ʻOku laka hake he kāingalotu ʻo e Siasí ʻe toko 4,500 ʻi Laosi, Taileni, mo e fanga kiʻi kulupu iiki ange ʻi he ʻIunaiteti Siteití ʻoku nau maʻu kakato e Tohi ʻa Molomoná ʻi he lea faka-Laosí.
ʻOku maʻu e liliu foʻou he lea fakafonuá ʻi he takafi molū mei he ngaahi senitā tufakiʻanga nāunau fakalotofonua ʻa e Siasí pea ʻi he ʻinitanetí he store.lds.org (nāunau fika 35607331) mo e LDS.org.
Tokoni e Laipeli Ako Fakatakimuʻá ki he Kāingalotú ʻi he Ngaahi Uiuiʻi Foʻoú
Kuo laka hake he taʻu ʻe tahá talu mei hono kamata ʻo e Leadershiplibrary.lds.org mo ʻene kei hokohoko atu pē ko ha maʻuʻanga tokoni mahuʻinga maʻá e kāingalotú—ʻa ia ʻoku ʻi ai ha foʻi vitiō ʻe 100 nai ʻi he lea fakafonua ʻe 11 pea ʻoku tokoni ia ki he ngaahi uiuiʻi faka-Siasi kehekehe lahi.
ʻOku kau ʻi he ngaahi vitioó ha ngaahi meʻa ʻoku hoko moʻoni ʻi he ngaahi uooti mo e ngaahi kolo ʻi ha ngaahi fonua kehekehe ʻo ʻikai ke tohi e ngaahi meʻa ke lea ʻakí. ʻI hono ʻiloʻi pē ʻe he Kau Palesitenisī Fakaʻēliá ʻoku toe ʻi ai ha ngaahi fie maʻu fakaako kehe, ʻoku tānaki fakakuata atu leva e ngaahi nāunau foʻou ki he laipelí.
Naʻe pehē ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e taumuʻa ʻo e (Laipeli Ako Fakatakimuʻá] ke tokoniʻi e kau taki fakalotofonuá ke nau ako, akoʻi, pea fakaʻaongaʻi e ngaahi tefitoʻi moʻoni mo e ngaahi tuʻutuʻuni mei he tohi tuʻutuʻuní.”
Fokotuʻu ʻe he Kau Takí ʻa e Siteiki hono Ua ʻi Lūsiá, ko hono Valu ia ʻi ʻĪtalí
ʻI he ʻaho 9 ʻo Sepitema 2012, ko e ʻaho ia ne hoko ai e taʻu 88 ʻo ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá ne fokotuʻu ai e Siteiki Seni Pitasipeeki Lūsiá—ko e siteiki hono ua ʻi Lūsiá.
Hili mei ai ha ʻaho ʻe fitu, naʻe vaeua ʻe ʻEletā Ronald A. Rasband ʻo e Kau Palesitenisī ʻo e Kau Fitungofulú ʻa e Siteiki Mīlani ʻĪtalí ke fokotuʻu e Siteiki Mīlani ʻĪtali Hahake foʻoú. Ne toe fakahingoa e Siteiki Mīlani ʻĪtalí ko e Siteiki Mīlani ʻĪtali Hihifó.
ʻAʻahi e Kau Taki ʻo e Siasí ki he Kau Taki Fakapuleʻanga ʻi Koloēsia mo Posiniá
Naʻe fakataha ʻa ʻEletā Lōnolo A. Lasipani ʻo e Kau Palesitenisī ʻo e Kau Fitungofulú mo ʻEletā Keni F. Lisiate, ko e Tokoni Ua ʻi he Kau Palesitenisī ʻo e ʻĒlia ʻIulopé, mo e kau taki ʻo e puleʻangá ʻi Koloēsia mo Posinia mo Hesekoviná lolotonga ʻa Sepitema ʻo e 2012.
Naʻe feʻiloaki ʻa ʻEletā Lasipani mo Palesiteni Ivo Sosipoviki ʻi Koloēsia ʻo fakapapauʻi ʻa e kei hokohoko atu ʻo e tukupā ʻa e Siasí ke fakamālohia e fāmilí.
ʻI he ʻaho 12 ʻo Sepitemá, ne fakataha ʻa ʻEletā Lasipani mo Željko Komšić, ko e taha ʻo e kau palesitenisī ʻe toko tolu ʻo Posinia mo Hesekoviná, ʻa ia ko e ʻuluaki fakataha ʻeni ha taki ʻo e Siasí mo ha taki ʻo e puleʻangá mei Posinia.
Naʻe fakamatalaʻi ʻe Palesiteni Komšić ʻa e ngaahi tui fakalotu kehekehe ʻi Posiniá peá ne tali lelei e Siasí ko ha mēmipa ʻo e kolo ko iá. Naʻe fakamatalaʻi ange ʻe ʻEletā Lasipani ʻoku fakamuʻomuʻa ʻaupito e fāmilí ʻi he Siasí pea ʻoku hanganaki atu hono kāingalotú ke poupouʻi e taumuʻa ko ʻeni ʻoku nau ʻinasi ai ʻi Posinia mo Hesekoviná.
ʻOku tuʻu e kau tāutaha kei talavoú ke fai honau tā mo ʻEletā Lāsolo M. Nalesoni pea mo Sisitā Nalesoni ʻi he Ngoue Fakafaʻahitaʻu-māfana ʻi Seni Pitasipēkí, ʻi Lūsia.
© IRI