Pōpoaki ʻa e Faiako ʻAʻahí

Ului ki he ʻEikí

Ako ʻi he faʻa lotu ʻa e fakamatala ko ʻení, pea aleaʻi ia mo e kau fafine ʻokú ke ʻaʻahi ki aí ʻo ka feʻunga ke fakahoko. Fakaʻaongaʻi e ngaahi fehuʻí ke tokoni atu ki hono fakamālohia e kau fafiné pea ʻai ke hoko ʻa e Fineʻofá ko ha konga longomoʻui ʻo hoʻo moʻuí. Ke maʻu ha fakamatala lahi ange, ʻalu ki he reliefsociety.lds.org.

Tuí, Fāmilí, Fakafiemālié

ʻOku fie maʻu ʻe he kakai fefine foʻou ʻo e Siasí—kau ai mo e kau Finemui ʻoku hū ki he Fineʻofá, kau fafine ʻoku foki mai ʻo mālohí, pea mo e kau ului foʻoú—ʻa e poupou mo e anga fakakaumeʻa ʻa e kau faiakoʻaʻahí. Naʻe pehē ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, “[‘Oku] mahuʻinga ʻo e kau mai ʻa e kāingalotú ki he fakauluí mo e pukepuké pea mo hono fakamālohia mai ʻo e kau māmālohí ke nau mālohi moʻoní. “[Puke ʻa e vīsone ko ia ʻe lava ʻa e Fineʻofá … ʻo hoko [ko e taha] ʻo e ngaahi maʻuʻanga feohiʻanga lelei taha ʻoku tau maʻu he Siasí. Tokoni kei taimi kiate kinautolu naʻe akoʻi mo fakamālohia maí, pea ʻofaʻi mai kinautolu ki he Siasí ʻo fou ʻi hoʻomou houalotú].”¹

ʻI heʻetau hoko ko e kau mēmipa ʻo e Fineʻofá, te tau lava ʻo tokoniʻi ʻa e kau mēmipa foʻoú ke nau ako ʻa e ngaahi tefitoʻi angafai faka-Siasí, hangē ko e:

• Fai ʻo ha malangá.

• Ko hono fai ʻo e fakamoʻoní.

• Ko hono moʻui ʻaki e fono ʻo e ʻaukaí.

• Totongi vahehongofulú mo e ngaahi foakí.

• Kau ʻi he ngāue hisitōlia fakafāmilí.

• Fakahoko e papitaiso mo e hilifaki nima maʻa ʻenau ngaahi kui kuo pekiá.

Naʻe pehē ʻe ʻEletā Pālati, “Ko e ngaahi kaungāmeʻa tokangá ʻoku nau ʻai e kau mēmipa foʻoú ke nau ongoʻi fiemālie mo talitali lelei ʻi he lotú.”² ʻOku tau maʻu kotoa, tautautefito ki he kau faiako ʻaʻahí, ʻa e ngaahi fatongia mahuʻinga ke ʻai ʻa e fakakaungāmeʻa ki he kau mēmipa foʻoú ke hoko ko ha founga hono tokoniʻi kinautolu ke nau “ului moʻoni ki he ʻEikí” (ʻAlamā 23:6).

Mei he Folofolá

2 Nīfai 31:19–20; Molonai 6:4

Mei Hotau Hisitōliá

Naʻe pehē ʻe Palesiteni Kōtoni B. Hingikelī (1910–2008), “ʻI he fakautuutu ange ko ia ʻo e tokolahi ʻa e kau uluí, kuo pau ke fakalahi ange maʻu pē ʻetau feinga ke tokoniʻi kinautolu ʻi heʻenau kumi honau halá. “ʻOku fie maʻu ʻe he [tokotaha papi ului] kotoa pē ha meʻa ʻe tolu: ha kaumeʻa, ha fatongia, pea fafanga ʻaki e “folofola lelei ʻa e ʻOtuá” (Molonai 6:4).³

Ko e kau faiako ʻaʻahí ʻoku nau ʻi ha tuʻunga ke tokoniʻi kinautolu ʻoku nau tokangaʻí. ʻOku faʻa muʻomuʻa maʻu pē ʻa e anga fakakaumeʻá, ʻo hangē ko ia ʻoku fai ki ha fefine kei siʻi he Fineʻofá naʻe hoko ko ha faiako ʻaʻahi ki ha fefine matuʻotuʻa ange. ʻOku tuai maʻu pē ke na kaungāmeʻa kae ʻoua kuó na ngāue fakataha ʻi ha ngāue tokoni fakamaʻa ha feituʻu. ʻOkú na hoko ko ha kaungāmeʻa, peá na talanoa ki he Pōpoaki ʻo e Faiako ʻAʻahí, ʻoku fakatou fafangaʻi kinaua ʻaki e “folofola lelei ʻa e ʻOtuá.”

Naʻe pehē ʻe Palesiteni Siosefa Filitingi Sāmita (1876–1972) ko e Fineʻofá “ko ha konga mahuʻinga ʻi he puleʻanga ʻo e ʻOtuá he māmaní pea … tokoni ki hono kau mēmipa faivelengá ke nau maʻu ʻa e moʻui taʻengatá ʻi he puleʻanga ʻo ʻetau Tamaí.”⁴

Maʻuʻanga Fakamatalá

1. M. Russell Ballard, “Ko e Kií ʻa e Kāingalotú,” Liahona, Sepitema 2000, 12.

2. M. Russell Ballard, Liahona, Sepitema 2000, 13.

3. Gordon B. Hinckley, “ʻOku Mahuʻinga Lahi ʻa e Tokotaha Papi Ului Kotoa Pē,” Liahona, Fēpueli 1999, 8.

4. Joseph Fielding Smith, ʻi he Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá (2011), 111.

Ko e Hā Te u Lava ʻo Faí?

1. Te u lotua hoku hoá ʻo kole ke fakahinohino kimaua ʻe he Laumālié ʻi heʻema ngāue ki heʻema kau fafiné?

2. Ko e hā ha ngaahi founga te tau tokoniʻi ai ʻa e fefine takitaha ʻoku tau tokangaʻi koeʻuhí ke ne ʻiloʻi ʻoku tau tokanga moʻoni ki ai?

Tā fakatātaaʻi ʻo e ʻatá ʻe Matthew Reier