Usa ka Dios sa mga Milagro Ang mga Santos sa Slovak sa Sheffield

Ni Elder Erich W. Kopischke

Sa Seventy

Isip mga lider sa priesthood, mga misyonaryo, ward council, ug mga miyembro sa Sheffield, England, nagkahiusa sa ilang mga paningkamot sa pagpalambo sa tinuod nga kalamboan, sila napanalanginan sa talagsaong mga paagi.

Atol sa usa ka gamhanan nga wali ngadto sa kongregasyon sa mga tumutuo, si propeta Mormon nangutana sa usa ka yano nga pangutana: “Ang mga milagro nahunong ba? Misunod diha-diha dayon ang iyang tubag: “Tan-awa ako moingon nganha kaninyo, Wala” (Moroni 7:29).

Si Mormon dayon mipasabut kon sa unsang paagi ang talagsaon nga buhat sa kaluwasan sa katapusang mga adlaw mapahinabo, maghunahuna sa mga relasyon ug pakig-uban tali sa Espiritu Santo, ang buhat sa mga anghel, sa atong mga pag-ampo, sa atong hugot nga pagtuo, ug sa mga milagro sa Ginoo (tan-awa sa Moroni 7:33–37, 48).

Sa tibuok mga kasulatan ang mga propeta nagpahinumdom nato nga ang Dios mao gihapon kagahapon, karon ug sa kahangturan (tan-awa sa 3 Nephi 24:6; D&P 20:12) Samtang kita maningkamot sa pagtuman sa sugo sa “panglakaw … ngadto sa tibuok kalibutan, … magbunyag diha sa ngalan sa Amahan, ug sa Anak, ug sa Espiritu Santo” (D&P 68:8), importante ang pagtuon ug paghinumdom sa mosunod nga mga baruganan:

Ang Dios dili mausab.
Ang Dios mao ang Dios sa mga milagro.
Ang labing dako nga milagro sa Dios mao ang paghatag og mahangturong kaluwasan sa Iyang mga anak.
Ang Dios mohimo og mga milagro sumala sa atong hugot nga pagtuo, nga atong ipakita sa atong mga buhat.
Ang Espiritu Santo adunay importanting bahin sa pagkakabig.

Andam nga Mosakripisyo

Samtang nagserbisyo sa Europe Area, duna koy pribilehiyo nga makakita sa mga baruganan nga inubanan sa aksyon isip milagro didto sa Sheffield, England. Sa katapusan sa 2008, si Bishop Mark Dundon sa Sheffield First Ward namalandong unsay iyang mahimo sa pagtabang sa iyang ward nga molambo. Sa pagbansay sa pagpangulo, ang iyang presidente sa stake nangutana sa mga bishop, “Unsay andam ninyong isakripisyo aron magmalampuson sa misyonaryo nga buhat?” Gikan sa mga pagtulun-an sa iyang mga lider, si Bishop Dundon nasayud nga ang usa ka maayo nga ward mission leader mao ang yawe, usa ka naglihok nga ward council mao ang mahinungdanon, ug kaandam sa pagpaminaw sa mga pag-aghat sa Espiritu importante kaayo.

Human sa tumang pagpamalandong ug pag-ampo, si Bishop Dundon migamit sa iyang mga yawe sa priesthood ug misunod sa aghat sa Espiritu sa pag-release sa iyang duha ka mga magtatambag, Gregory Nettleship ug Robert McEwen. Gitawag dayon ni Bishop Dundon si Brother Nettleship nga bag-ong ward mission leader ug si Brother McEwen nga mahimong assistant ward mission leader. Ang mga sakop sa bishopric suod kaayo, mao nga kini nga kausaban dili sayon alang nila. Apan si Bishop Dundon nasayud nga sa niining sitwasyona ang desisyon eksakto, ug ang duha ka mga magtatambag mapainubsanong midawat sa ilang bag-ong mga calling.

Ang bishop, uban sa iyang bag-ong ward mission leader ug ward council, mainampoong naghimo og mga plano ug naghimo og mga tumong alang sa pagpalambo sa ward. Samtang ilang giimplemintar ang ilang mga plano, nagsugod sila sa pagkakita og dakong kalampusan. Daghan ang nabunyagan, ug daghang mga tawo nga mibalik sa pagkaaktibo sa Simbahan. Bisan pa niana, gamay ra ang nahibaloan sa mga lider sa ward nga ang ilang hugot nga pagtuo ug mga binuhatan pagagantihan nga wala nila hunahunaa nga posible.

Natandog pinaagi sa Gugma

Niadtong Marso 2011 ang usa ka batan-ong misyonaryo ug ang iyang kompanyon makig-istorya sa mga tawo diha sa dalan sa Sheffield. Si Elder Nicholas Pass nakakita og lalaki ug sa iyang asawa nga milabay ug gibati og kusog nga pagbati nga kinahanglan siyang makigsulti kanila. Si Elder Pass ug ang iyang kompanyon miagpas sa magtiayon. Ang pakig-istorya lisud—ang magtiayon gikan sa Slovakia ug dili makasulti og Iningles—apan usa ka higala nga kauban mitabang sa paghubad. Sa pag-istoryahay diha sa dalan, ang mga misyonaryo migamit og mga litrato sa pagpaila sa Unang Panan-awon ug sa mensahe sa Pagpahiuli. Ang magtiayon miuyon sa sabut nga ang mga misyonaryo mosugod sa pagtudlo nila.

Si Ludovit Kandrac, ang amahan sa pamilya, nagsugod sa pagbasa sa Basahon ni Mormon. Sa wala madugay siya mihunong sa pagpanigarilyo. Sa proseso sa pagtudlo, ang mga misyonaryo kinahanglang mogamit og daghang tighubad ug gani nakakat-on sila og gamay nga Slovak. Niadtong Mayo 14, 2011, si Ludovit, usa sa iyang mga anak nga babaye, ug duha ka mga paryente nabunyagan.

Sa iyang bunyag, si Brother Kandrac mihatag sa iyang pagpamatuod. Pinaagi sa usa ka tighubad, iyang gisaysay ang iyang kasinatian sa pakighimamat sa mga misyonaryo.Sa dihang iyang naagian si Elder Pass ug ang iyang kompanyon sa sentro sa siyudad sa Sheffield, siya adunay usa ka mainit nga pagbati sa iyang dughan. Iyang gibaliwala ang pagbati ug nagpadayon sa paglakaw, apan samtang siya mipasiplat sa mga misyonaryo pag-usab, siya natandog pinaagi sa gugma nga ilang gipakita samtang sila nagsulti sa mga tawo. Bisan og gusto siya nga moduol kanila, si Brother Kandrac nagpadayon sa paglakaw. Nakuratan siyag kadiyot sa dihang ang mga misyonaryo miduol kaniya.

Uban sa laing pamilyang Slovak nga nagpamiyembro sa Simbahan usa ka tuig na ang milabay, kining mga bunyag nagtimaan sa sinugdanan sa modernong milagro sa pagkakabig sa populasyon sa Slovak sa Sheffield, England. Kining bag-ong mga miyembro mosimba kanunay matag semana, magdala og laing mga sakop ug higala sa pamilya. Ilang giablihan ang ilang mga panimalay ngadto sa mga misyonaryo ug midapit sa uban sa ilang komunidad sa pagpaminaw sa ebanghelyo.

Si Elder Pass ug ang iyang bag-ong kompanyon, si Elder Joseph McKay, mibisita kanunay niini nga mga pamilya. Mitudlo sila kanila, miserbisyo kanila, nangalagad kanila, ug mipanalangin kanila. Talagsaon kadto nga panahon sa pagtudlo, pagkat-on, ug pagdawat sa gasa sa Espiritu alang sa mga investigator, kinabig, misyonaryo, mga lider sa stake ug ward, ug sa mga miyembro.

“Magpaduol ug Maglig-on Kanila”

Sa tibuok ting-init ug tinglarag sa 2011, mas daghang mga taga-Slovak ang nagpamiyembro sa Simbahan. Ang nagtubo nga gidaghanon nakahatag og kalisud alang sa lokal nga mga miyembro sa pagpadayon sa paghatag og transportasyon padulong ug gikan sa meetinghouse. Sulod sa daghang mga semana ang matinud-anong mga Santos sa Slovak naglakaw og lima ka milya (walo kilometro) aron makatambong sa mga tulumanon sa Dominggo sa pinulongan nga ilang masabtan.

Niadtong Septyembre 2011 ang kapangulohan sa stake sa Sheffield na-organisar pag-usab, si Bishop Dundon gitawag isip bag-ong presidente sa stake. Paglabay sa usa ka bulan dunay fireside nga gipahigayon alang sa English ug Slovak nga mga Santos nga dihay mga tighubad.

Samtang naglingkod sa atubangan, si Presidente Dundon nadasig nga ang grupo sa Slovak kinahanglang maporma nga apil sa Sheffield First Ward apan magmiting sa pasilidad sa kasilinganan sa Slovak. Ang angay nga dapit sa wala madugay nakit-an ug miabang og mga kwarto.Niadtong Disyembre 11, 2011, ang unang hut-ong sa mga miting gipahigayon sa bag-ong pasilidad. Ang mga lider sa Sheffield First Ward malaumon nga 50 ka mga tawo ang motambong. Hinoon, 84 ka mga tawo—lakip ang 63 ka mga Slovaks—ang mitambong.

Human pag-organisar pag-usab sa stake sa Sheffield, si Robert McEwen gitawag isip bishop sa Sheffield First Ward. Si Brother Nettleship nagpadayon sa pag-alagad isip ward mission leader. Ubos niining duha ka bishop, ang ward mission leader ug ang ward council mihimo og talagsaong trabaho sa pagpangulo sa ward nga “magpaduol ug maglig-on” sa mga Santos sa Slovak (D&P 20:53).

Ang ward council naghisgot sa mga isyu sama sa unsaon sa pagtabang sa mga panginahanglan sa bag-ong miyembro, unsaon sa pagtabang kanila nga moapil gayud sa mga kalihokan sa ward, unsaon sa pag-amuma nila sa ebanghelyo, ug unsaon sa pagsulbad ang problema sa pinulongan. Ang mga miyembro sa council nagpuasa ug nag-ampo alang sa balaanong tabang ug dayon naningkamot og maayo. Ilang gibisitahan ang bag-ong mga miyembro ug miapil sa pagtudlo sa mga appointment sa mga full-time nga misyonaryo. Mihatag sila og transportasyon. Nag-order sila og mga materyal nga Slovak. Ilang gidala ang bag-ong nabunyagan nga mga miyembro sa templo aron mopahigayon og mga bunyag alang sa mga patay.

Ang mga lider sa ward miorganisar usab og proyekto sa pagserbisyo atol sa Pasko. Ang mga miyembro sa ward midonar og kwarta ug nangolekta og mga dulaan, mga sinina ug ubang mga regalo. Dagkong mga bag sa regalo sa Pasko nga naglakip sa mga pagkaon alang sa panihapon sa Pasko giapud-apod sa Bisperas sa Pasko ngadto sa mga Santos sa Slovak ug ubang mga pamilya diha sa mga utlanan sa ward.

Ang dugay na nga mga miyembro ug bag-ong mga miyembro gamay ray masabtan sa pinulongan sa usag usa, apan silang tanan mibati sa kainit sa pinulongan sa tinuod nga gugma. Usa ka talagsaong pagbati sa hingpit nga kalipay, kamaya, ug kahinam milukop sa mga miyembro ug sa mga investigator.

Sa misunod nga tuig kining gamay nga grupo milambo ngadto sa usa ka lig-on nga mga unit sa Simbahan, tibuok pamilya nga mabunyagan ug naghiusa sa simbahan. Ang mga amahan gi-ordinahan sa Aaronic ug Melchizedek Priesthood, ang mga anak nga lalaki gi-ordinahan sa Aaronic Priesthood, ang Primary nga dunay kapin 20 ka mga bata na-establisar ug mga programa sa Young Men ug Young Women giorganisar nga dunay kapin sa 25 ka kabatan-onan nga motambong matag semana. Ang Ginoo mihatag og usa ka full-time nga misyonaryo gikan sa Czech Republic kinsa makasulti sa pinulongan ug nakadugang sa suporta ngadto sa grupo. Sa samang higayon, kining mga pamilya mihatag og mga referral ngadto sa ilang yutang natawhan.

Usa ka Dios sa mga Milagro

Nganong nahitabo man kini? Tungod kay ang Dios wala mohunong sa pagka-Dios sa mga milagro. Tungod kay ang matinud-anong mga misyonaryo makugihong nangita niadtong andam nga modawat sa ebanghelyo. Tungod kay ang presidente sa stake ug bishop milihok pinaagi sa hugot nga pagtuo ug misunod sa giya sa Espiritu Santo. Tungod kay ang ward council miangkon sa responsibilidad ug naningkamot sa panaghiusa. Tungod kay ang mga miyembro nakakat-on sa pinulongan sa gugma ug misunod sa imbitasyon gikan sa ilang mga lider, nga magbaton og hugot nga pagtuo ug pagsalig sa Dios sa Iyang gisulti: “Ako usa ka Dios sa mga milagro; ug ako mopakita ngadto sa kalibutan nga ako sama kagahapon, karon ug sa kahangturan” (2 Nephi 27: 23).

Ang kalampusan sa Sheffield dili usa lang ka panghitabo. Kini nagpahinumdom nato sa mga saad nga gihatag pinaagi sa mga propeta ug makapalig-on sa atong pagtuo ug tinguha nga mahimong instrumento sa mga kamot sa Dios pinaagi sa pagdapit sa mga tawo nga naglibut nato sa pagduol ngadto kang Kristo. Kon buhaton nato kini, atong gibutang ang atong kaugalingon sa usa ka posisyon diin ang Ginoo makapanalangin nato og oportunidad sa pagtudlo, pagpaaktibo, ug pag-amuma sa uban. Ug atong makita ang ebidensya nga Siya nagpadayon nga usa ka Dios sa mga milagro.