Alang sa Kalig-on sa mga Kabatan-onan
Pagkamatinuoron ug Kaligdong
Isip usa ka tinun-an ni Kristo, kining personal nga mga hiyas mao ang nagpakita kon kinsa gayud mo.
Sa dula sa pagkatsampyon sa usa ka komperensya sa American football, si Joseph B. Wirthlin dunay gitawag nga “usa ka importante nga kasinatian” atol sa kritikal nga dula.
Paghulagway pinaagi ni Ben Sowards
“Kinahanglan nakong idagan ang bola ngadto sa tunga aron maka-score sa panglabaw nga touchdown,” miingon siya. “Gidawat nako ang bola ug gidagan ngadto sa linya. Nasayud kong duol na ako sa dag-anan apan wala ko masayud unsa ka duol. Bisan napiit ko sa kinailawman sa mga patong, gikab-ot nako ang akong mga tudlo mga duha ka pulgada ug mahikap na nako kini. Ang dag-anan duha na lang ka pulgada (5 cm) ang gilay-on.
“Nianang higayona natintal ko sa pagtulod sa bola ngadto sa unahan.Mahimo unta kaayo to nako. … Apan akong nahinumduman ang mga pulong sa akong mama. ‘Joseph’ kanunay siyang moingon kanako, ‘buhata ang matarung, bisan unsa pay mahitabo. Buhata ang matarung ug ang tanang butang mamaayo ra.’
Gusto na gayud kaayo kong makapuntos. Apan sobra pa kay sa pagka-hero sa mga mata sa akong kahigalaan, gusto kong ma hero sa mga mata ni mama. Ug mao nga akong gipasagdan ang bola kon asa kini nahimutang—duha ka pulgada gikan sa goal line.”1 Si Elder Wirthlin (1917–2008) sa wala madugay nagserbisyo isip sakop sa Korum sa Napulog Duha ka mga Apostoles.
Buhata Unsa ang Matarung
Ang desisyon ni Elder Wirthlin usa ka maayo kaayo nga ehemplo sa usa ka tawo nga dili ikompromiso ang iyang kaligdong. Ang pagkamatinuoron ug kaligdong mosulay sa atong kinaiya. Nagkinahanglan kini sa tawo nga kanunay nga mobuhat ug mosulti sa matarung nga butang bisan unsa pay sirkumstansya o unsay gihunahuna sa uban.
Usa sa mga sumbanan sa Alang sa Kalig-on sa mga Kabatan-onan mao ang pagkamatinuoron ug kaligdong. Isip mga Santos sa Ulahing mga Adlaw ug mga sumusunod ni Kristo, gipaabut kamo nga “magmatinuoron sa inyong kaugalingon ug sa Dios sa tanang higayon. Ang pagkamatinuoron nagpasabut sa dili pagpamakak, pagpangawat, pagpanglimbong, o pagpangilad sa bisan unsang paagi. …
Ang duol nga may kalambigitan sa pagkamatinuoron mao ang kaligdong. Ang kaligdong nagpasabut sa paghunahuna ug pagbuhat sa unsay matarung sa tanang panahon, bisan unsa pa ang mga sangputanan. Kon kamo adunay kaligdong, andam kamo nga mosunod sa inyong mga sumbanan ug mga gituohan bisan kon walay nagtan-aw.”2
Pagkahimong usa ka Disipulo
Ang atong katuyoan niining kahimtang sa pagsulay sa mortal nga kinabuhi mao nga mahimong “usa ka santos pinaagi sa pag-ula ni Kristo” (Mosiah 3:19). Ang pagkahimong usa ka santos mao ang pagkahimong usa ka tinuod nga disipulo ni Kristo. Dili kini sama ka lisud sa inyong pagtuo; nakahibalo na tingali kamo unsaon sa pagbuhat niini. Hinoon, nagkinahanglan kini og paningkamot, ug usahay kini nga paningkamot nagkinahanglan og panglimbasug gikan nato. Apan mahimo kini.
Ang Basahon ni Mormon nagtudlo, “Kay tan-awa, ang Espiritu ni Kristo gihatag ngadto sa matag tawo, siya masayud sa maayo gikan sa dautan; busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios” (Moroni 7:16).
Isip usa ka disipulo ni Kristo inyong madiskobrehan unsaon sa pagsulti ug paglihok pinaagi sa pagpangutana sa inyong kaugalingon, “Unsa ang buhaton ni Jesus?” Ang mga impresyon mosunod, ug kon inyong sundon kini nga mga impresyon, makadawat kamo og saksi alang sa inyong kaugalingon nga eksakto ang inyong gibuhat. Hinoon, tinuod usab nga usahay kinahanglan kamong mohulat og kadiyot aron makita ang tinuod nga mga sangputanan ug mga panalangin sa inyong matinuoron nga mga lihok.
Pagkahingpit nga Matinuoron
Ang Alang sa Kalig-on sa mga Kabatan-onan nagpahinumdom nato: “Ang pagkadili matinuoron makadaut kaninyo ug sa uban. Kon kamo mamakak, mangawat, mag-shoplift, o manikas, kamo nakahimo og kadaut sa inyong espiritu ug sa inyong mga relasyon sa uban. Ang pagkamatinuoron mopalambo sa inyong umaabut nga mga oportunidad ug sa inyong abilidad nga magiyahan sa Espiritu Santo.”3
Ang tinuod nga sukod sa sinsero nga kaligdong ug hingpit nga pagkamatinuoron mao ang unsay inyong buhaton kon walay tawo nga makahibalo unsay inyong gihunahuna, gisulti, o gibuhat. Isip tinuod nga mga disipulo sa Ginoong Jesukristo, dili kita mamahimo o makabuhat og ubos kay sa gipakita sa Manluluwas nato. Kita adunay dili matandi nga gasa sa Espiritu Santo. Ang Manluluwas mitudlo “Apan ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo” (Juan 14:26).
Gihatagan usab kita sa atong Manluluwas og dakong gahum nga moabut gikan sa kada adlaw nga pag-ampo, pagtuon sa kasulatan, ug pagbasa sa mga pulong sa buhi nga mga propeta ug mga apostoles. Kining positibo nga inadlaw nga mga buluhaton makapalig-on sa pagkamatinuoron ug kaligdong nga ania nato. Hinumdumi, isip usa ka disipulo ni Kristo ug usa ka miyembro sa Ang Simbahan ni Jesukristo sa mga Santos sa Ulahing mga Adlaw, ang inyong pagkamatinuoron usa ka ekspresyon sa inyong kaligdong ug kinsa gayud kamo.