Mga Istorya gikan sa Komperensya
Pagkat-on nga Magmasulundon
Gikan sa “Ang Pagkamasulundon Makahatag og Panalangin,” Liahona, Mayo 2013, 89–90.
Sa nagtubo pa ako, kada summer gikan sa Hulyo hangtud sa Septyembre, ang akong pamilya mopuyo sa among payag sa Vivian Park sa Provo Canyon sa Utah.
Usa sa akong suod nga higala niadtong mga panahona sa canyon mao si Danny Larsen, kansang pamilya nanag-iya usab og payag sa Vivian Park. Kada adlaw siya ug ako mosuroy niining nindot nga lugar, mangisda sa sapa, mangolekta og mga bato ug ubang mga butang, mag-hike, mangatkat, ug maglingaw-lingaw sa kada minuto sa kada oras kada adlaw.
Usa ka buntag niana si Danny ug ako nakahukom nga mag-campfire inig kagabii uban sa tanang namong higala. Nagkinahanglan lang mi og hawan nga lugar sa duol nga among kapundukan. Ang mga sagbut sa bulan sa Hunyo nga anaa sa yuta uga ug manusok, nga dili angay sa among katuyoan. Among gipangibut ang tag-as nga sagbut, nagplano nga maghawan og dako nga lingin nga lugar. Nangibut kami pag-ayo, apan gamay ra ang among naibut sa gahi nga mga sagbut. Among nakita nga dangtan mi og usa ka adlaw niini, ug nagkahinay na ang among mga lihok ug kahinam sa pagtrabaho.
Ug dayon misulod sa akong otso anyos nga hunahuna ang hingpit nga sulbad. Akong giingnan si Danny, “Ang atong gikinahanglan mao ang pagsunog niini nga mga sagbut. Linginon lang nato sa pagsunog diha sa mga sagbut!” Miuyon siya, ug midagan ko ngadto sa among payag sa pagkuha og posporo.
Basin maghunahuna mo nga ang otso anyos gitugutan sa paggamit og posporo, akong klarohon nga kami ni Danny gidid-an sa paggamit niini nga walay dagko nga magdumala. Kaming duha gipasidan-an na sa kakuyaw sa kalayo. Bisan pa niana, nakahibalo ko diin tagoi ang posporo, ug kinahanglan namong limpyohan ang maong lugar. Sa walay pagduhaduha midagan ko paingon sa payag ug mikuha og pipila ka posporo, naniguro nga walay makakita. Gitagoan dayon nako kini sa akong bulsa.
Midagan ko balik ni Danny, nalipay nga sa akong bulsa anaa ang sulbad sa among problema. Nahinumdom ko nga naghunahuna nga ang kalayo mosunog lang sa among gusto ug mapalong ra kini og iyaha.
Akong gikadlit ang posporo ug misunog sa bulan sa Hunyo nga kasagbutan. Misilaob kini ingon sa giyab-an og gasolina. Sa sinugdanan si Danny ug ako nalipay samtang nagtan-aw sa mga sagbut nangahanaw, apan sa wala madugay naklaro nga ang kalayo dili diay mapalong nga siya ra. Natarantar kami sa dihang nakaamgo mi nga wala nay mahimo sa pagpahunong niini. Ang nagsilaob nga kayo misubay sa sagbut padulong sa bukid, maapil na ang mga kahoy nga aguho ug tanan nga maagian niini.
Wala na kami laing mahimo gawas sa pagpangayo og tabang. Sa wala madugay ang tanan nga mga lalaki ug babaye sa Vivian Park nagdinaganay na nga nagdala og basa nga panapton, mihapak sa kalayo sa pagpaningkamot sa pagpalong niini. Human sa daghang mga oras ang katapusang baga napalong. Ang guwang na kaayo nga mga kahoy nga aguho naluwas, ingon usab sa mga balay nga maabtan unta sa kalayo.
Si Danny ug ako nakat-on og daghang lisud apan importante nga mga leksyon nianang adlawa—ang kaimportante sa pagkamasulundon.
Adunay mga lagda ug balaod nga makapasiguro sa atong pisikal nga kasiguroan. Sama usab, ang Ginoo mihatag og mga sumbanan ug mga sugo aron sa pagsiguro sa atong espirituhanon nga kasiguroan aron kita malampusong makapadayon niining maliputon nga mortal nga kinabuhi ug makabalik sa atong Langitnong Amahan.