Ang usa ka pakigsaad mao ang usa ka saad, ug daghan pa ang ipasabut niini.
Kon makadungog kamo sa pulong pakigsaad, unsay inyong mahunahuna? Kon moingon mo nga, “Usa ka sinaaran uban sa Dios,” eksakto kamo.
Apan ang usa ka pakigsaad uban sa atong Langitnong Amahan mas labaw pa. Nianang sagrado nga saad, adunay gahum, kalig-on, kahilwasan, ug kalinaw. Kon mogahin kamo og panahon sa paghunahuna mahitungod sa mga pakigsaad nga inyong gihimo ug himoon sa inyong kinabuhi ug kon inyong tumanon ang inyong bahin, magsugod kamo sa pagbati ug pagpuyo nga lahi. Ang mga pakigsaad makaimpluwensya sa paagi nga kamo maglihok ug modasig ninyo sa inyong mga pagpili.
Ania kon sa unsa nga paagi nga ang mga pakigsaad nakahimo og kalainan sa mga kinabuhi sa pipila ka mga batan-on.
“Ang usa ka pakigsaad mobutang ninyo diha sa higpit ug pig-ot nga dalan, motabang ninyo sa pagpakabuhi nga mas maayo, ug mohatag ninyo og mas maayo nga pagsabut.”
Marcus A., edad 17, Utah, USA
“Ang kamatuoran nga ako nakahimo og mga pakigsaad uban sa Langitnong Amahan nakahatag nako og mga oportunidad sa pagtubo sa espirituhanong paagi ug mahimong mas matinud-anon nga miyembro. Kada higayon nga ako mobuhat og butang, akong hunahunaon ang mga pakigsaad nga akong gihimo uban sa Langitnong Amahan ug pangutan-on ang akong kaugalingon kon ako nagtuman ba sa mga saad nga gihimo uban Kaniya sa dihang ako gibunyagan ug sa dihang ako nakadawat sa priesthood. Ang mga pakigsaad nga akong gihimo uban sa atong Langitnong Amahan nakatabang nako nga magpabilin nga lig-on diha sa ebanghelyo ug makabalik ngadto Kaniya sa umaabut nga adlaw.”
Efraín V., edad 14, New Zealand
Imahe
“Nahinumdom ko sa dihang ako gibunyagan—mao kadto ang pinakalipay nga akong gibati tungod kay mao kadto ang akong unang pakigsaad. Sunod sa dihang akong nadawat ang priesthood. Pareha kadto nga kalipay. Duna koy dako nga pahiyom sa akong nawong sa dihang nakaamgo ko nga ako naghimo og pakigsaad uban sa Dios. Kon ako makadungog sa mga bata nga magyaga-yaga sa Simbahan, makahinumdom ko sa kalipay ug makahinumdom ko nga pakigsaad kini sa Dios ug dili sa tawo.”
Bradford A., edad 16, Arizona, USA
“Ang paghimo og mga pakigsaad makahatag nato ug sa atong mga pamilya og daghan kaayo nga mga panalangin. Pananglit, ang pagpabunyag makahatag nato og abilidad sa pag-usab, nga mahimong mas maayo. Ang mga pakigsaad nga atong gihimo uban sa atong Langitnong Amahan makapalig-on sa pagtuo nga atong gikinahanglan aron magpabilin nga matinud-anon sa ebanghelyo.”
Naomi A., edad 15, Guadalajara, Mexico
“Niining miaging ting-init miadto ko sa templo kanunay aron sa paghimo og mga bunyag alang sa mga patay. Pinaagi sa pagtuman sa akong mga pakigsaad pinaagi sa pag-adto sa templo ug pagbuhat unsay matarung, napanalanginan ko. Gikapoy kaayo ko sa final exams. Miadto ko sa templo, ug nahimong maayo ang tanan. Ang pagtuman og mga pakigsaad mas makapasayon ug mas malipayon ang kinabuhi.
McKenna M., edad 18, California, USA
Imahe
“Sa akong unang adlaw isip usa ka deacon nga nagpaambit sa sakrament, gikulbaan kaayo ko. Dayon nakahinumdom ko sa adlaw nga ako nabunyagan, ug akong gibati ang Espiritu Santo. Awtomatik akong mibati nga kalma ug maayo ang pagkahimo niini.”
Seth A., edad 12, Mexico City, Mexico
“Nakadawat ko og daghang mga panalangin tungod sa pagtuman sa akong mga pakigsaad. Tungod sa akong mga pakigsaad sa bunyag, ang Espiritu Santo nakatabang nako sa paghimo og mga desisyon. Ang pakigsaad kon kamo makadawat sa priesthood mao ang pasalig nga gamiton ang priesthood sa pagtabang sa uban ug sa pagserbisyo. Makatabang kini nga motubo ang inyong pagpamatuod kon kamo moserbisyo.”
Erik N., edad 15, Alberta, Canada
“Dili kamo makahimo og bisan unsa nga inyong gusto ug magpaabut sa Dios nga motuman sa Iyang bahin sa saad. Daghan ang Iyang gilauman gikan kaninyo tungod kay nasayud Siya sa potensyal nga anaa kaninyo. Nakadala gyud ni nako ngadto sa mas taas nga level.”