Pagdala sa Primary ngadto sa Panimalay

Ang mga Pamilya Usa ka Bahin sa Plano sa Langitnong Amahan

Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Ang Basahon ni Mormon naghisgot sa dautan nga tawo nga ginganlan og Amalickiah. Gusto niyang gub-on ang Simbahan ug momando sa mga Nephite isip ilang hari.

Si Kapitan Moroni usa ka kusgan ug matarung nga lider sa mga kasundalohan nga Nephite. Gusto ni Kapitan Moroni nga pahinumduman ang mga katawhan kon unsa ka importante ang pagpanalipod sa ilang mga pamilya ug sa ilang tinuohan. Gigisi niya ang iyang kupo ug gihimo kini nga bandila, o bandera. Gisulatan niya kini niini nga mga pulong:

“Agi og paghinumdom sa atong Dios, sa atong tinuohan, ug kagawasan, ug sa atong kalinaw, sa atong mga asawa, ug sa atong mga anak.”

Iyang gitawag ang iyang bandera nga “bandila sa kalingkawasan,” ug gihigot kini sa tumoy sa usa ka tukon. Dayon miluhod siya ug nag-ampo nga ang mga katawhan magpabilin nga gawasnon aron sila makasimba sa Dios ug makadawat sa Iyang mga panalangin. (Tan-awa sa Alma 46:3–18.)

Karon kita dunay butang nga mopahinumdom nato kon unsa kaimportante ang atong mga pamilya ug ang atong tinuohan. Kini mao ang “Ang Pamilya: Usa ka Pamahayag ngadto sa Kalibutan.” Ania ang pipila sa mga pulong niini.

“Ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak. … Ang pamilya gi-orden sa Dios.”

Mga Ideya alang sa Panag-istorya sa Pamilya

Uban sa inyong pamilya, kamo mahimong mobasa sa “Ang Pamilya: Usa ka Pamahayag ngadto sa Kalibutan.” Makaistorya usab kamo og mga paagi nga kamo magtambayayong sa paghimo sa inyong pamilya nga lig-on. Dayon makapili kamo og usa niini nga mga paagi ug maghimo og plano sa pagbuhat niini.

Kanta ug Kasulatan

• “Mga Pamilya Mahimong Manag-uban sa Kahangturan” [Families Can Be Together Forever] Children’s Songbook, 188

• Alma 46:3–18

Kalihokan sa Bandila sa Pamilya

Paggamit og usa ka piraso sa papel o panapton aron maghimo og bandila nga nagrepresentar sa inyong pamilya. Paggamit og mga marker o mga krayola sa pagdrawing og mga butang nga importante sa inyong pamilya. Pagdugang og usa ka kinutlo o usa ka panultihon nga nagpadayag kon unsay gibati sa mga sakop sa inyong pamilya mahitungod sa ilang pagtuo ni Jesukristo ug sa Langitnong Amahan o mahitungod sa mga panalangin sa usa ka pamilya.