Sunda ang Propeta

Luwasa Siya!

Ni Heidi S. Swinton

Kada summer ang pamilyang Monson mogahin og duha ka bulan sa kabin sa pamilya sa Provo River. Si Tommy Monson nakat-on sa paglangoy sa kusog nga sulog sa suba. Usa ka init nga kahapunon sa dihang si Tommy mga 13 anyos, mikuha siya og dako nga salbabida ug mipalutaw sa suba.

Nianang adlawa dakong grupo sa mga tawo ang nagpundok nga nagpiknik dapit sa suba nga nangaon ug nagdula. Si Tommy paingon na sa labing kusog nga dapit sa suba sa dihang nakadungog siya sa nataranta nga singgit, “Luwasa siya! Luwasa Siya!” Usa ka batang babaye gisuyop sa makuyaw nga lilo. Walay usa sa mga tawo diha sa daplin ang makalangoy aron sa pagluwas kaniya.

Mao usab ang pagtunga ni Tommy sa dapit ug nakita ang ulo sa batang babaye nga mitidlom na sa tubig. Gikab-ot ni Tommy ang batang babaye sa may buhok, ug mialsa niya diha sa ibabaw nga bahin sa salbabida. Dayon namugsay si Tommy padulong sa daplin. Una, gigakos sa pamilya ang batang babaye, mihalok kaniya ug naghilak. Dayon nagsugod sila sa paggakos ug paghalok ni Tommy. Gibati siyag kaulaw sa tanan, ug daling mibalik ngadto sa iyang salbabida.

Samtang nagpadayon si Tommy sa pagpalutaw sa suba, gibati niya ang mainit nga pagbati. Nakaamgo siya nga nakatabang siya sa pagluwas og kinabuhi. Nakadungog ang Langitnong Amahan sa singgit, “Luwasa siya! Luwasa Siya!” Iyang gihimo nga si Tommy mopalutaw sa eksaktong panahon nga siya gikinahanglan. Nianang adlawa si Tommy nakat-on nga ang labing nindot nga pagbati mao ang pagkahibalo nga ang Dios, ang atong Langitnong Amahan, nakaila sa kada usa nato ug motugot nato sa pagtabang Kaniya sa pagluwas sa uban.

Mga Pulong gikan ni Presidente Monson

“Ang atong mga oportunidad sa paghatag sa atong mga kaugalingon walay limit. … Adunay mga kasingkasing nga lipayon. Adunay mabination nga mga pulong nga isulti. Adunay mga gasa nga ihatag. Adunay mga buhat nga pagahimoon. Adunay mga kalag nga luwason.”

Gikan sa “Debosyonal sa Pasko sa Unang Kapangulohan,” Ensign, Peb. 2001, 73.

Buhata ang Inyong Katungdanan

Sa dihang 11 anyos pa si Tommy, siya adunay espesyal nga katungdanan sa pagtabang sa iyang mga kauban sa klase nga molabang sa dalan. Tan-awa ang litrato sa ubos. Makita ba ninyo ang duha ka butang nga gigamit ni Tommy sa pagtabang kaniya sa iyang katungdanan?

Sirkulo sa Kaluwasan

Samtang nagkat-on si Tommy sa paglangoy diha sa Provo River, ang iyang pamilya nagliyok kaniya aron nga kon magkinahanglan siya og tabang, anaay tawo sa duol. Mahimo kamong sama ni Tommy ug magdula sa Sirkulo sa Kaluwasan.

Magkinahanglan Kamo og:

Upat o daghan nga mga magdudula.

Hawan nga dapit

Unsaon sa Pagdula:

Pagsirkulo kamo ug pagginunitay sa inyong mga kamot. Usa ka magdudula magtindog sa tunga sa sirkulo. Ang magdudula nga anaa sa tunga taptapan ang mga mata ug hinay nga maglakaw sa lain-laing mga direksyon—bisan asa siya gusto nga moadto. Ang mga magdudula nga anaa sa sirkulo kinahanglang magginunitay sa mga kamot, apan maningkamot nga dili makahikap sa magdudula nga anaa sa tunga. Magpuli-puli sa pagtindog diha sa tunga.