Pagkamatinuoron ug Kaligdong

Ang pagkamatinuoron ug kaligdong “nagkinahanglan kini sa tawo nga kanunay nga mobuhat ug mosulti sa matarung nga butang bisan unsa pay sirkumstansya o unsay gihunahuna sa uban,” miingon si Elder Christoffel Golden Jr. sa Seventy diha sa artikulo sa mga pahina 48–49 niini nga isyu.

Ang artikulo naghisgot sa usa ka panghitabo sa kinabuhi ni Elder Joseph B. Wirthlin (1917–2008) sa Korum sa Napulog Duha ka mga Apostoles. Sa dihang estudyante pa siya sa kolehiyo, si Elder Wirthlin midula sa championship game sa American football. Gipasa ngadto kaniya ang bola, miambak paabante, apan nagkulang siya og duha ka pulgada (5 cm) ngadto sa goal line. Nadat-ugan sa ubang mga magdudula, imbis itulod ang bola sa goal line, siya nakahinumdom sa mga pulong sa iyang inahan nga kanunay niyang buhaton ang husto. Iyang gipasagdan ang bola kon asa kini nabutang.

Ang mosunod nga mga sugyot, uban sa inyong ehemplo, makatabang kaninyo sa pagtudlo sa inyong mga anak kabahin niining mga baruganan sa ebanghelyo.

Mga Sugyot sa Pagtudlo sa mga Batan-on

Basaha uban sa inyong mga batan-on ang seksyon sa pagkamatinuoron ug kaligdong diha sa Alang sa Kalig-on sa mga Kabatan-onan. Hisguti ang mga panalangin sa pagkamatinuoron ug kaligdong.
Ikonsiderar paghangyo sa mga batan-on sa pag-andam sa “Unsay Inyong Buhaton?” nga eksamin para sa family home evening. Gamita ang Alang sa Kalig-on sa mga Kabatan-onan isip giya ug paglista og mga sitwasyon nga makahatag sa tawo og oportunidad sa pagpakita og pagkamatinuoron ug kaligdong. Tubaga ang eksamin isip pamilya ug hisguti ang mga resulta.
Si Presidente Thomas S. Monson kadaghan namulong kabahin sa pagkamatinuoron. Pangitaa ang usa sa iyang mga mensahe ug ipakigbahin kini uban sa inyong pamilya. Sa ubos mao ang pipila:

“Si Propeta Joseph Smith: Magtutudlo pinaagi sa Ehemplo,” Liahona, Nob. 2005, 67.

“Happiness—the Universal Quest,” Liahona, Mar. 1996, 2.

“In Search of an Abundant Life,” Tambuli, Ago. 1988, 2.

Mga Sugyot sa Pagtudlo sa mga Bata

Ang kaligdong naglakip sa pagkamatinuoron sa kaugalingon. Sa pagpakita niini, ikonsiderar nga magtudlo sa family home evening nga may lamiang pagkaon atubangan sa mga bata. Ingna sila nga dili sila makakaon niini hangtud dili ka moingon. Dayon tap-tapi ang inyong mga mata ug mangutana, “Mahimo na ba ninyong kaunon ang lamiang mga pagkaon karon, tungod kay wala ko makakita?” Hisguti ang pipila ka matarung nga mga butang nga ilang mahimo kon walay magtan-aw, sama sa personal nga pag-ampo. Pahinumdumi sila nga ang Langitnong Amahan kanunay makakita kanila.
Ikonsiderar sa paggamit sa gihimong eksamin uban sa inyong mga batan-on (tan-awa sa ibabaw), o paghimo og eksamin nga ipahiangay sa gagmayng mga bata aron makatabang nila pag-ila unsa ang matinuoron ug dili matinuoron. Ipahisgut nila ang ilang mga tubag. Kon kamo adunay mga batan-on ug gagmayng mga bata, ikonsiderar nga patabangon ang mga batan-on sa gagmayng mga bata para sa eksamin.