Dili Ka Makasulod Dinhi

Bonnie Marshall, Utah, USA

Ang akong bana, si John, dako nga tawo. Siya may gitas-ong unom ka pye upat ka pulgadas (1.9 m) ug motimbang og sobra sa 200 ka libras (90.9 kg). Alang kaniya, ang pagbiyahe sakay sa economy class sa eroplano dili komportable, ang pinakagrabe kay sakit sa iyang panglawas.

Niadtong Agosto 2006 kami gitawag sa pagserbisyo sa Church educational service mission sa Brigham Young University–Hawaii. Sa panahon na sa among pagpamauli, kami nabalaka sa iyang agwantahon atol sa flight pabalik sa mainland. Atol sa pag-check-in kami nalipay nga adunay usa ka bakanteng lingkuranan sa first class, busa among gipa-upgrade iyang tiket. Siya komportabling makalingkod nga may igong lugar para sa iyang taas nga mga paa.

Mga tunga-tunga sa flight, mihukom ko nga adtoon siya aron susihon. Sa duol nako sa first-class area, usa ka flight attendant mibarug sa may pultahan aron sa paghunong nako.

“Unsay akong matabang nimo?” nangutana siya.

“Oo, gusto nakong makita akong bana og kadiyot,” mitubag ko.

“Pasensya kaayo,” mabination siyang misulti apan higpit, “dili ka makasulod dinhi.”

“Apan ako siyang bana, ug gusto lang kong makakita niya og kadiyot.”

Gialihan gihapon ang pultahan, siya misulti pag-usab, “Pasensya kaayo, pero dili ka makasulod dinhi. Akong sultihan ang imong bana, ug kon ganahan siya, siya makaadto nimo. Apan ang polisiya kay bugtong mga pasahero sa first-class ang makasulod niining dapita.”

Nasagmuyo ko sa makadiyot, apan nakakita sa iyang pagkamanunuton, hinay-hinay kong mibalik sa akong lingkuranan sa economy class.

Nagsugod ko sa paghunahuna sa tulo ka ang-ang sa himaya nga gihisgutan diha sa kasulatan ug sa mga propeta. Atong mabasa nga si Kristo mobisita sa terrestrial nga gingharian (tan-awa sa D&P 76:77), ug ang mga anghel sa pagpangalagad mobisita sa telestial nga gingharian (tan-awa sa D&P 76:88), apan kadtong naa sa mas ubos nga gingharian dili gayud makasulod sa celestial nga gingharian (tan-awa sa D&P 76:112; tan-awa usab sa D&P 88:22–24). Namalandong sa akong kasinatian, daklit kong nakasinati nga daw unsa nga maanaa sa mas ubos nga mga gingharian. Unsay ilang bation kon makadungog sa mga pulong “Pasensya kaayo, dili ka makasulod dinhi”?

Mga lima ka bulan ang milabay namatay akong bana tungod sa kanser. Ang akong kasinatian sa eroplano nakadasig nako nga magpakabuhi aron dili na makadungog niadtong mga pulonga pag-usab—dili gayud sa sunod nga kinabuhi.