Pagtudlo ug Pagkat-on sa Ebanghelyo

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi. Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

Si Jesuskristo mao ang gamhanan nga magtutudlo. Iyang gipakita kanato ang ehemplo samtang Siya “nagtudlo sa mga babaye sa dinaghang pundok ug sa tinagsa, sa karsada ug sa baybayon, duol sa atabay ug sa ilang mga panimalay. Gipakita Niya ngadto kanila ang mapinanggaon nga pagbati ug miayo kanila ug sa mga sakop sa ilang pamilya.”¹

Iyang gitudloan sila si Marta ug Maria ug “midapit kanila nga mamahimo nga Iyang mga disipulo ug makaambit sa kaluwasan, ‘kana nga maayo nga bahin’ [Lucas 10:42] nga dili gayud kuhaon gikan kanila.”²

Sa atong mga kasulatan karon, ang Ginoo nagmando kanato nga “motudlo sa usag usa sa doktrina sa gingharian” (D&P 88:77). Kabahin sa pagtudlo ug pagkat-on sa doktrina, si Cheryl A. Esplin, ikaduhang magtatambag sa kinatibuk-ang kapangulohan sa Primary, miingon, “Ang pagkat-on aron hingpit nga masabtan ang mga doktrina sa ebanghelyo usa ka proseso sa tibuok kinabuhi ug moabut ‘pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto’ (2 Nephi 28:30).”³

Samtang kita magkat-on, magtuon, ug mag-ampo, kita motudlo uban sa gahum sa Espiritu Santo, kinsa modala sa mensahe “ngadto sa mga kasingkasing sa mga katawhan” (2 Nephi 33:1).

Gikan sa mga Kasulatan

Alma 17:2–3; 31:5; Doktrina ug mga Pakigsaad 42:12–13; 84:85

Gikan sa Atong Kasaysayan

Ang nangaging mga propeta mipahinumdom kanatong mga babaye nga kita adunay mahinungdanong tahas isip mga magtutudlo sa panimalay ug Simbahan. Niadtong Septyembre 1979, si Presidente Spencer W. Kimball (1895–1985) mihangyo kanato nga mahimong “mga sister nga batid sa kasulatan [sister scriptorians].” Siya miingon: “Pagkahimo nga batid sa mga kasulatan—dili aron mopaubos sa uban, kondili aron mobayaw kanila! Sa katapusan, kinsa man ang adunay mas labaw nga panginahanglan nga ‘moamping’ sa mga kamatuoran sa ebanghelyo (nga ilang kadaganan panahon sa panginahanglan) kaysa mga babaye ug mga inahan kinsa mihimo og tumang mga pag-amuma ug pagpanudlo?”⁴

Kitang tanan mga magtutudlo ug tigkat-on. Kon kita motudlo gikan sa mga kasulatan ug sa mga pulong sa atong buhing mga propeta, kita makatabang sa uban sa pagduol ngadto kang Kristo. Kon kita moapil sa proseso sa pagkat-on pinaagi sa pagpangutana og makahuluganong mga pangutana ug dayon maminaw, atong makaplagan ang mga tubag nga mohaum sa atong personal nga mga panginahanglan.