Kon Kinsa ang Tawagon sa Ginoo Siya Mopasarang

Kadaghanan sa mga miyembro sa Simbahan adunay daghang oportunidad nga makadawat og “calling”—usa ka buluhaton sa pagserbisyo. “Ang Ginoo naglaum nga ang matag usa nato anaay usa ka calling diha sa Iyang Simbahan aron ang uban mapanalanginan sa atong mga talento ug impluwensya,” miingon si Presidente Ezra Taft Benson (1899–1994).¹

Ang mga lider sa Simbahan, kinsa gitawag sa pagserbisyo, nagsalig sa ubang mga miyembro nga modawat ug mobuhat sa mga calling nga gihatag kanila. Ang matag bag-ong calling usa ka oportunidad sa pagserbisyo ug paglambo ug kinahanglang pagahimoon sa mapainubsanon ug mainampuong paagi. Ang mga calling sa pagserbisyo sa Simbahan ihatag pinaagi sa mga lider sa priesthood sa Simbahan human nila tinguhaa ang inspirasyon gikan sa Ginoo. “Kamo gitawag sa Dios,” gipasabut ni Presidente Henry B. Eyring, Unang Magtatambag sa Unang Kapangulohan. “Ang Ginoo nakaila ninyo. Siya nasayud kinsa ang gusto Niya nga paalagaron sa matag katungdanan sa Iyang Simbahan. Siya mipili kaninyo.”²

Sa atong mga calling kita nagrepresentar sa Manluluwas, ug ang atong buhat—bisan unsa pa kini kagamay—adunay mahangturong sangputanan. Ang impluwensya sa usa ka mapahinunguron nga magtutudlo sa Primary, sama pananglit, makadasig sa bata sa pagserbisyo og misyon. O ang mahigalaong pag-abi-abi sa usa ka usher makatabang sa nanlimbasug nga miyembro nga makomportable sa simbahan.

Ang Ginoo motabang nato sa atong mga calling, ilabi na kon kita nabug-atan sa atong mga responsibilidad. Kon kita mag-ampo sa Amahan sa Langit aron magiyahan, Siya mogiya kanato pinaagi sa inspirasyon ug mopanalangin kanato nga makaserbisyo og maayo. Ang Ginoo motabang niadtong nagserbisyo Kaniya ug modugang sa Iyang gahum ngadto sa ilang mga paningkamot (tan-awa sa D&P 84:88). Sama sa gisaad ni Presidente Thomas S. Monson, “Kon kita anaa sa buluhaton sa Ginoo, angay kita sa Iyang panabang. Hinumdumi nga kon kinsa ang tawagon sa Ginoo Siya mopasarang.”³

Samtang kita mosunod sa ehemplo sa Ginoo sa pagserbisyo ug masulundong mobuhat sa atong mga calling ug responsibilidad sa Simbahan, ang atong kinabuhi mapanalanginan ug mahimong mas mahisama sa Dios (tan-awa sa Moroni 7:48; D&P 106:3).

Kita makasiksik sa mga handbook, mga manwal, tambag sa mga lider sa Simbahan, ug uban pang mga kapanguhaan sa pagtudlo kanato sa atong mga reponsibilidad ug sa pagpangita og tubag sa atong mga pangutana.
Kita dili magtinguha og mga calling, ni mobalibad og mga calling gikan sa adunay hustong katungod sa priesthood. (tan-awa sa Moises 6:31–32).
Kon kita nagtabang sa buhat sa Ginoo, kita makaampo ug makadawat sa Iyang panabang (tan-awa sa D&P 84:88).
Ang pagbuhat sa atong mga calling makahatag og mga panalangin ug kalipay (tan-awa sa Mateo 25:23).
Ang tanang mga calling susama ra kaimportante; ang Simbahan nanginahanglan og mga nursery leader sama sa presidente sa Relief Society (tan-awa sa 1 Mga Taga-Corinto 12:14–18). Sa unsang paagi kita nagserbisyo mas importante kaysa kon asa kita nagserbisyo.

Pagtubag sa mga Pangutana

Ngano ang inyong Simbahan may mga lider nga walay bayad?

Gikan pa sa sinugdanan, ang Ginoo nagtawag sa Iyang mga disipulo gikan sa ordinaryong mga tawo nga lain-lain og mga background. Sila nagserbisyo tungod sa ilang gugma sa Manluluwas ug sa uban. Sa Basahon ni Mormon, sama pananglit, si propeta Alma mipili og mga lider sa priesthood ug “misugo kanila … [nga] maghago uban sa ilang kaugalingon nga mga kamot alang sa ilang panginabuhi. …

“Ug ang mga pari dili magsalig diha sa mga katawhan alang sa ilang panginabuhi; apan sa ilang paghago sila magdawat sa grasya sa Dios” (Mosiah 18:24, 26; tan-awa usab sa 2 Nephi 26:29–31; Mga Artikulo sa Hugot nga Pagtuo 1:5).

Susama sa atong panahon, ang panawagan sa pagserbisyo makahatag kanato og oportunidad sa pagtabang sa uban ug sa pagpalambo ug pagpaambit sa atong mga talento ug espiritwal nga mga gasa. Kita igong nabayaran sa atong pagserbisyo pinaagi sa mga panalangin gikan sa Ginoo.