Pagpasaylo sa Atong Kaugalingon
Kon kita naghinulsol ug mibati nga ang Ginoo mipasaylo nato, nganong lisud usahay ang pagpasaylo sa atong mga kaugalingon?
Pagpalambo Usa ka Lakang Kada Higayon
Alang sa daghang mga tawo nga nagpuyo sa modernong panahon, lisud hunahunaon ang kinabuhi nga walay elektrik nga suga. Ang ngitngit nga kwarto malukop dayon sa kahayag inig pislit sa switch. Ang yanong mga buluhaton kaniadto nga kinahanglang ihulat sa kaadlawon o himoon sa hinay nga siga sa kandila karon sayon nang buhaton uban sa tabang sa imbensyon nga lisud kaayo himoon.
Si Thomas Edison nagtrabaho sulod sa daghang mga tuig ug misulay og sobra sa 1,000 ka lain-laing mga materyal sa wala pa niya makit-i ang angay nga gamiton (ang nipis nga alambre diha sa tunga-tunga sa bombilya) nga molungtad og dugay, dili mahal nga suga. Kanunayng malaumon, si Edison mikonsiderar sa kada materyal nga wala magamit isip paagi sa pagkaplag sa materyal nga magamit. Ug sa dihang nahimo na niya, nausab na ang kalibutan.
Pagtan-aw sa Kaugalingon
Adunay daghang makadasig nga mga istorya mahitungod sa mga atleta, mga tighunahuna, mga artist, ug daghan pa kinsa nakahibalo unsaon sa pagkat-on gikan sa ilang mga sayop ug pagpadayon sa pagpaningkamot. Sulay, sulay, sulay, ug dayon magmalampuson—linya kini sa istorya nga ingon og dili kita kapuyon sa pagpaminaw. Gawas, hinoon, kon ang bayani niana nga istorya mao ang atong kaugalingon.
Kabahin sa pagsunod sa mga sugo, daghan kaayo nato gusto nga dili maputol ang pagkahingpit sa atong mga kaugalingon. Sama kini sa paglaum nga makahimo sa sunod nga minilyon ka dolyar nga imbensyon nga dili na kinahanglang mousab sa orihinal nga konsepto sa desinyo o naglaum nga mahimong tsampyon nga walay pilde-pilde panahon sa panagdula. Kon kita makasala ug masayop, sa kasagaran mapakyas kita sa pagpasaylo sa atong mga kaugalingon ug pagpadayon sa pagpaningkamot.
Si Presidente Dieter F. Uchtdorf, Ikaduhang Magtatambag sa Unang Kapangulohan, mitudlo: “Sa dihang ang Ginoo gusto nga kita mopasaylo sa tanang mga tawo, naglakip kana sa pagpasaylo sa atong mga kaugalingon. Usahay, sa tanang tawo sa kalibutan, ang pinakalisud nga pasayloon—ingon man ang labing nagkinahanglan tingali sa atong pagpasaylo—mao ang atong kaugalingon.”1
Usa ka Tawo nga Nausab
Apan unsaon nato sa pagbuhat niana? Ang pagtuon sa kinabuhi ni Ammon, propeta sa Basahon ni Mormon, makadugang sa panglantaw.
Ang misyonaryo nga mga kasinatin ni Ammon diha sa mga Lamanite usa ka milagro sama nga kini makadasig. Gikan sa pagpanalipod sa karnero sa hari, ngadto sa pagsangyaw ni Haring Lamoni, sa pagtabang sa pagdala sa ebanghelyo ngadto sa tibuok nasud, ang kinabuhi ug pangalagad ni Ammon nagpabilin nga labing makapadasig nga mga istorya sa tibuok kasulatan.
Apan si Ammon kaniadto dili kanunay matarung, dili kanunay nga dunay hugot nga pagtuo nga misangyaw uban sa gahum ngadto sa mga Lamanite. Nakahimo siya og mga sayop—grabe nga mga sayop. Isip usa sa anak nga mga lalaki ni Mosiah, si Ammon apil niadtong kinsa “nagtinguha sa paglaglag sa simbahan, ug sa pagdala nga mahisalaag ang mga katawhan sa Ginoo” (Mosiah 27:10).
Si Ammon, uban sa iyang mga igsoong lalaki ug ni Alma ang batan-on, nakasamok kaayo sa buhat sa Dios nga usa ka anghel sa Ginoo ang nagpakita ngadto nila, namulong “ingon uban sa usa ka tingog sa dugdog, diin nakahimo sa yuta sa pag-uyog diha diin sila nagbarug” (Mosiah 27:11), nanawagan nila sa paghinulsol.
Klaro, nga si Ammon adunay seryoso nga kalapasan nga kinahanglan niyang hinulsulan, ug siya naghinulsol. Apan unsa kaha kon napakyas siya sa pagpasaylo sa iyang kaugalingon? Unsa kaha kon wala siya magmisyon, nagtuo nga ulahi na alang niya nga magmisyon? Kon wala pa siya magmisyon, wala unta siya malipay uban sa iyang mga kaigsoonan human sa mga katuigan sa ilang kalampusan diha sa mga Lamanite. “Karon tan-awa, kita makatan-aw ug makakita sa mga bunga sa atong mga kahago; ug sila diyutay ba?” Nangutana si Ammon sa iyang mga igsoon. Ako moingon nganha kaninyo, Dili, sila daghan, oo, ug kita makasaksi sa ilang pagkatiunay, tungod sa ilang gugma ngadto sa ilang mga kaigsoonan ug usab ngari kanato” (Alma 26:31). Liboan ang midawat sa kamatuoran isip resulta sa ilang misyonaryo nga mga paningkamot.
Detalye gikan sa The Lost Lamb, ni Del Parson, dili mahimong pakopyahan
Ang Kakuyaw nga Mawad-an sa Kadasig
Bisan sa klaro nga tambag gikan sa atong mga lider sa Simbahan ug mga ehemplo gikan sa mga kasulatan, pipila nato nagtuo gihapon nga kita wala maapil sa Pag-ula, nga kita dili na maluwas. Dili kita makahimo sa pagbutang sa bug-at nga salagubangon sa atong kaugalingon nga sala, bisan human sa sinsero nga paghinulsol. Ang uban gani mohunong sa pagsulay.
Human sa tanan, nganong mobarug pa man ka gikan sa pagkatumba kon matumba ra gihapon ka pag-usab? Sa pinakaminus, kana maoy gusto sa kaaway nga inyong hunahunaon. Ang maong matang sa panghunahuna dili lamang makapiang sa espirituhanon ug sa emosyon apan hingpit nga bakak.
Ang mga kasulatan nagtudlo nato nga ang Pag-ula sa Manluluwas walay katapusan ug magamit sa tanan. “Umari kamo karon, ug usahan ta paghusay, nag-ingon ang Ginoo: bisan pa ang inyong mga sala mapula, sila pagapution ingon sa nieve; bisan pa sila lubos mapula, sila mahimong sama sa maputing balhibo sa karnero” (Isaias 1:18). Kita mahimong magmalampuson. Makasulay kita pag-usab. Ug tabangan kita sa Ginoo sa tanang higayon.
Dili Pa Gayud Ulahi Kaayo
Si Elder Jeffrey R. Holland sa Korum sa Napulog Duha ka mga Apostoles mihatag og klarong tambag batok nianang pag-undang sa atong mga kaugalingon. “Bisan pila pa ka mga oportunidad wala ninyo mapahimusli, mga sayop nga inyong nahimo o mga talento nga wala ninyo, o unsa ka kalayo sa panimalay ug pamilya ug sa Dios, mopamatuod ko nga wala pa kamo malayo sa balaanong gugma. Imposible nga ang mahangturong kahayag sa Pag-ula ni Kristo dili moabut kaninyo.”2
Si Elder Holland dugang nga nagtudlo kanato sa pagtan-aw ngadto sa kaayo sa Dios: “Ang pagpalig-on sa pagtuo mao ang pagpadayon, pagtrabaho, paglahutay, ug ang mga kabalaka—tinuod o sa hunahuna lang—mawala tungod sa kaabunda sa katapusang ganti.”3
Napuno sa Paglaum
Samtang dili mabasta-basta ang sala, ang paghinulsol tinuod. Ang kapasayloan tinuod. Ang Pag-ula sa Manluluwas naghatag nato og kahigayunan sa pagsugod pag-usab. Sama ni Ammon nga napasaylo, kamo usab mapasaylo.
Makalaum gyud kita sa mahayag nga mga adlaw. Gitudlo ni Apostol Pablo, “Hinaut ang Dios sa paglaum magapuno kaninyo sa tumang kalipay ug kalinaw tungod sa inyong pagtuo, aron nga pinaagi sa gahum sa Espiritu Santo magmadagayaon kamo sa paglaum” (Mga Taga-Roma 15:13).
Tungod sa gasa sa paghinulsol, mahimong motuo kita pag-usab sa atong mga kaugalingon.