Sureta Mai na iVakabula
“Raica kau sa tu e mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua” (Ai Vakatakila 3:20)
Niu se cauravou lailai, a kauta mai o tinaqu ena Siganisucu e dua na iyaloyalo ni iVakabula ni tukituki tiko ena dua na katuba. Keitou se bera kina ni lewe ni Lotu, kau dau vakataroga tiko, “Na cava e tukutuki tiko kina o Jisu e katuba? O cei e tiko mai yasana kadua?”
Ni oti e vica na yabaki au qai raica ni sega ni dua na itautauri ni idola e tiko e tautuba ni katuba a tukituki tiko kina na iVakabula. O koya e tiko mai loma e dodonu me dolava na katuba. Ia oqo au sa kila o cei e tiko mai yasana ka dua ni katuba. Oi keda! Sa tukituki tiko na iVakabula, ka sa dodonu vei keda kece meda dolava na katuba ka sureti Koya me lako mai ki na noda bula.
Niu se cauravou lailai, sa lomaqu meu na sureta na iVakabula ki na noqu bula ena noqu sa papitaiso ka yaco meu lewe ni Lotu. Era a ivakaraitaki vinaka vei au na noqu itokani. Sa vakakina o buqu. E cakacaka o koya ena Valetabu e Los Angeles California. E dau biubiu yani ena 4:00 ena mataka lailai me laki qarava na Turaga e valetabu.
Ni oti toka ga e rua na yabaki na noqu papitaiso, sa lomaqu sara meu sa qarava na Turaga meu laki daukaulotu tudei. Niu sa kaulotu tiko, au a vukea e vuqa na tamata mera vulica na iVakabula me rawa ni ra sureti Koya ki na nodra bula.
E muri, au a qai laki peresitedi ni kaulotu e Samoa. Au dau tarogi ira na daukaulotu vou se gauna cava sara mada a lomadra kina mera mai kaulotu. E vuqa vei ira era kaya ni ra se tiko ena Lalai sa lomadra mai kina mera mai kaulotu!
Ena vukei iko na Lalai mo vakavakarau ki na veiqaravi ni kaulotu. Vuli sara ena kena o rawata rawa. Mo inakinaki mo veiqaravi ena kaulotu. Sa na rawa talega mo vukei ira na tamata mera sureta mai na iVakabula ki na nodra bula. Ni ko kaulotu ena veisautaka na nomu bula—a veisautaka na noqu bula.
Droini mai vei Jennifer tolman