Me Yacova ni da Qai Sota Tale
AU SA YALATAKA …
Na vosa ca sa kabita tu ga na yamequ me vaka na co drega ni kabita na vuti ni koli.
E mosi sara ga na yaloqu niu raica na irairai ni matai tinaqu. Kurabui. Lomaleqa. Rarawa. Sa vakaraitaki kece oqo mai na matai tinaqu Ka ra mai umani vata kece ena nona mai kila ni sa—lawakitaki.
E dina ga ni a vakavulici au ena 15 na yabaki ni noqu bula o ya meu doka na Tamada Vakalomalagi ena vosa kei na cakacaka, ia au sa tucake tu e kea, kila niu sa cala ena kena sa cawadru mai tebe ni gusuqu e dua na vosa qeleqelewa.
Au a sega ni nakita meu vosa ca. Ni bera na yabaki o ya, au se bera mada ni dau cavuta na vosa vakatani. Ia ena vula ikatakata o ya au a cakacaka tiko ena Tabacakacaka ni Qoli kei na Qito e Utah kau a tomika cake mai kina na ivakarau o ya mai vei ira na cauravou keimami cakacaka vata tiko.
Na neimami cakacaka sara ga o ya na kena wereci laivi na co drega ena veibati ni gaunisala ni matanitu. Keimami sa kila sara ni co oqo na Arctium minus e dua dina ni co vakatani. E dau tubu tu vakalevu sara ena veisaqata cava ga, ka dau solegi ira yani na veitubua tale eso. Na kena drega e kabita ga na veika e toka tikiva.
Keimami sa vakaisivi, ka valuta yani na meca oqo ena vula ikatakata taucoko ka keimami sa oca sara ga—vakakina na vosavosa ca. Au raica ena imatai ni gauna ni rui ca na nodra ivosavosa na noqu itokani vakacakacaka. Au sa vakamatautaki au kina. Kena itinitini, au sa tekivutaka. Ni qai cava na vula ikatakata, na vosa ca sa kabita tu ga na yamequ me vaka na co drega ni kabita na vuti ni koli.
Na sauvuki mai nei tinaqu niu sa vosa ca, sa vakadeitaki au kina ni sa dodonu meu sa na veisau
E sega ni ka rawarawa. Na vosa ca e sega walega ni kena digitaki na vosa. Sa ivakarau talega ni vakanananu. Na mataqali veivosaki eda vakatara ki na noda bula, na vosa eda wilika, kei na iyaloyalo eda sarava ena bulia na noda vakanananu. Au sa mai vulica ni sa dodonu meu veisautaka na veika au a sureta ki na noqu vakasama kevaka au gadreva meu veisautaka na vosa meu vakayagataka.
Au vakavinavinaka kina, niu a lako tikoga ki lotu kei na semineri. Na vosavosa ca e dau kauta laivi na vakasama cecere, ia niu tiko ena vanua sa dau yaco kina na vakasama cecere sa yaco tale me kaukauwa cake tale mai. Au sa vakatabakidua ga ena wili ivolanikalou ena veisiga ka masumasu. Au sa sega tale ni sarava na iyaloyalo se parokaramu ni tivi e vakavurea tale mai na vakasama butobuto.
Sa tekivu tale, meu raica ni sa savasava mai na noqu ivosavosa. Ni qai cava na yabaki, au sa galala vakadua mai na noqu itovo vosavosa ca.
Vakatekivu mai na gauna o ya, au sa vulica kina na kaukauwa ni vosa. Na vosa e rawa ni veibuli se veivakarusai. E rawa ni ra veivakararawataki, se rawa ni ra veivakabulai. E rawa ni ra musuka sobu na tamata, se rawa ni ra teivaka na sorenikau ni inuinui kei na loloma.
E ka veivakurabuitaki vei au ni iVakabula Vakai Koya, na Dauveibuli ni lomalagi kei vuravura, e vakatokai mo o koya na Vosa (raica na Joni 1:1–4; V&V 93:6–11).
Au sa vulica ni vosa-bubului e dauvakayaco-ka vakakina ena kena veibasai. Eda vosa-bubului meda tukuna na ka dina ena mataveilewai. Eda yalataka vakalou, se bubului, meda maroroya na ivakaro ni Kalou ena gauna eda papitaiso kina. Sa vakakina, eda vakayacora na yalayala tabu meda maroroya na noda veiyalayalati ni valetabu me rawa ni da ciqoma kina na veivakalougatataki cecere duadua nei Tamada Vakalomalagi.
Na kena iusutu oqo: Eda na yaco meda na vakataki Koya na Vosa ena gauna eda vosa dokai Koya kina ka vakacaucautaka na Nona lagilagi.
iTaba mai vei Anna Laurent