Yaco mo Daukaulotu ni Vunautaka Noqu Kosipeli

Okotova 2013

Moyaco mo Daukaulotu ni, Vunautaka na Noqu Kosipeli

Mai vei Elder David A. Bednar

Ena Kuoramu ni iApositolo Le Tinikarua

Ena dua na vosa ka tauca ena Koronivuli ni Kaulotu e Provo ena 24 ni June, 2011.

E rawa mo ni cakava oqori! E kila tu na Turaga o ni matataka ka veiqaravi tiko ena vukuna ni rawa ni o ni cakava na ka oqo. Au kila ni rawa ni o ni cakava.

E dua na iApositolo, sa taumada, ka bibi duadua, ni daukaulotu. Ena vuku ni ka oqori, sa ka taleitaki sara vei au meu vosa vei kemuni me vaka ni o ni noqu itokani dauveiqaravi ena cakacaka vakasakiti oqo ni gauna oqo.

Elder missionaries teaching people outdoors.

Na Cava ni naDaukaulotu VUNAUTAKA NA NOQU KOSIPELI?

Na Daukaulotu ni Vunautaka na Noqu Kosipel i e dua na dauveiqaravi ni Turaga, kacivi ena parofisai, vakadonui ena veitabaki ni liga, ka vunautaka na kosipeli tawamudu vakalesuimai ni iVakabula ena Nona lako voli (raica na V&V 50:13–14, 17–24; V&V 68:1).

Na nona inaki raraba e dua na daukaulotu ka vakamacalataki ena Vunautaka na Noqu Kosipeli sai koya me “sureti ira na tani me ra lako mai vei Karisito ena nomu vukei ira me ra ciqoma na kosipeli vakalesui mai, ena nodra vakabauti Jisu Karisito kei na Nona veisorovaki, veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti.”¹

Na itavi tabu me vunautaki ena dodonu na kosipeli ka qaravi na veicakacaka vakalotu ni veivakabulai sa vakayacori tu me tekivu mai na gauna sa vakasevi tani kina ko Atama mai na Were ko Iteni ka na tomani tiko me yacova ni sa “qai kaya ko Jiova sa Cecere ni sa qaravi oti na cakacaka.”²

Veika Gadrevi me Daukaulotu kina ni VUNAUTAKA NA NOQU KOSIPELI

Au vinakata me da veivosakitaka mada e lima na gagadre taumada me da Daukaulotu kina ni Vunautaka na Noqu Kosipeli.

Gagadre #1: O ira na daukaulotu ni Vunautaka na Noqu Kosipeli era kila ni ra veiqaravi tiko ena vukuna ka matataki Jisu Karisito.

Jesus Christ with His arm around the shoulder of the Apostle Peter. Christ points to a large number of fish lying on the beach as He speaks to Peter. Two other men and a ship sit on the beach in the background.

O ira na daukaulotu ni Vunautaka na Noqu Kosipeli era kilai Koya era matataka, na vu ni nodra veiqaravi, kei na veika me ra cakava. Era kacivi na daukaulotu tudei me ra veiqaravi ka vakatikori ena kena ivakarau dodonu me ra italai ka matataka na Turaga o Jisu Karisito. Eda vakadinadinataka na Yacana kei na dina kei na vakalou ni Nona cakacaka o Jisu Karisito ki na veimatanitu, veimataqali, duivosavosa, kei ira na tamata (raica na V&V 133:37).

Eda lomana na Turaga. Eda qaravi Koya. Eda muri Koya. Eda matataki Koya.

Sa dodonu me noda inaki na Nona inaki. Sa dodonu me da kauwaitaka na veika e dau kauwaitaka. Sa dodonu me noda cakacaka na Nona cakacaka. Sa dodonu me noda sala na Nona sala. Sa dodonu me yaco me lomada vakalevu tikoga na Lomana.

Me vaka ni da matataka na Dauveivueti, eda vunautaka vakamatata ka vakarawarawa na ivunau kei na ivakavuvuli bibi ni Nona kosipeli vakalesui mai. Eda sega ni dau tukuna na vakasama se na nanuma vakatamata yadua. Eda dau vunautaka ka vakadinadinataka na veidina rawarawa vakalesui mai ena nona ivakarau na Turaga ena kaukauwa ni Yalona.

O ira na daukaulotu ni Vunautaka na Noqu Kosipeli era kila ni itavi ni kena matataki na iVakabula ka wasei na Kena ivakadinadina ena sega ni oti rawa. Yalovinaka ka nanumi Koya ena veika kece o vakasamataka, ena veika kece o cakava, kei na veika kece o dau segata mo yaco mo vakakina, ka matataki Koya vakadodonu vei ira kece na luvena na Tamada Vakalomalagi o na dau veitaratara vata kaya ena gauna oqo kei na veigauna kecega.

Gagadre #2: O ira na daukaulotu ni Vunautaka na Noqu Kosipeli era bula kilikili.

E dua na gagadre taumada me da rawa ni yaco me daukaulotu ni Vunautaka na Noqu Kosipeli sai koya na bula kilikili yadua ena matana na iVakabula.

Meu tukuna mada vakamatata ena kena vinaka duadua au rawata e vica na dina rawarawa.

O keda na nona mata vakadonui na Dauveivueti ka iVakabula kei Vuravura.
Eda sa kacivi me da vunautaka na Nona kosipeli tawayalani sa vakalesui mai.
E sega ni rawa ni da vakadukadukalitaki tu ena duka eso ni vuravura ka da qai matataki Koya ena dodonu ka cakacaka ena kaukauwa ni Yacana tabu.
Eda na sega ni rawa ni vukei ira na tani me ra vakamalumalumutaka na ivau ni ivalavala ca kevaka eda coko tu mada ga o keda ena ivalavala ca (raica na V&V 88:86).
Eda na sega ni rawa ni vukei ira na tani me ra vulica me ra veivutuni kevaka eda se bera ni vulica o keda vakataki keda me da veivutuni vakadodonu ka taucoko.
Eda na rawa walega ni kacivaka ka vunautaka ena qaqa na veika eda segata tiko me da yaco me vakakina.
Eda na laki tarogi kina vua na Kalou ena vuku ni noda veigagadre dodonu kei na noda bula kilikili me da veiqaravi vaka Nona itini.

E sega ni gadrevi vei keda ena gauna oqo me sa taucoko sara na noda vinaka. Ia eda sa vakaroti me da savasava ka lako vakadodonu ena matana na Dauveivueti ni Isireli. “Mo dou savasava koi kemudou sa kauta na iyaya ni Turaga” (V&V 38:42).

Na veivutuni e ivakavuvuli ni inuinui kei na veivakabulai—ka sega ni baleta na veivakayalolailaitaki kei na yaluma. E dina sara na veivutuni e veivakayalomalumalumutaki—ia e sega ni veivakarerei. Na veivutuni e veivakaocai ka veivakacegui, veivakaosoosotaki ka logaloga vinaka. Na veivutuni e dua na isolisoli sega ni saumi rawa ka rawati mai na Veisorovaki i Koya eda dau lomana, qarava, ka muria.

Kevaka sara mada ga o sa cakava eso na ivalavala ca bibi, ena vuku ni Veisorovaki i Jisu Karisito kei na veivutuni dina sara, o sa vakasavasavataki se rawa ni o vakasavasavataki tale kina ka kilikili.

Era tu na itabagone e gadrevi tu vei ira me taucoko na nodra veivutuni. Oqo na kena gauna. Yalovinaka, yalovinaka, yalovinaka kakua ni lokuyarataka na siga ni nomu veivutuni.

Era tu na itabagone era sa veivutuni ka tomana tikoga na nodra veivutuni ka ra vakataroga tiko se ra sa cakava na veika kece sara e gadrevi me ra ciqomi kina mai vua na Turaga (raica na V&V 97:8). Yalovinaka ka nanuma, e gadrevi iko na Turaga mo savasava ka sega ni taucoko sara nomu vinaka. Na cakacaka tale ni Yalo Tabu ena nomu bula sai koya na ivakaraitaki tudei duadua ni Nona veivosoti na Turaga baleta “ni sa sega ni dau tiko na [Yalo ni Turaga] ena vale dukadukali” (Ilamani 4:24). Ka kila na ivakaro ni “vosota na tamata kecega” (V&V 64:10) e oka kina nomu vosoti iko vakataki iko.

O ira na daukaulotu ni Vunautaka na Noqu Kosipeli era tisaipeli i Jisu Karisito dau rokova na nodra veiyalayalati ka talairawarawa ki na ivakaro. Yalovinaka dau nanumi Koya tikoga, savasava ka kilikili mo matataki Koya.

Gagadre #3: O ira na daukaulotu ni Vunautaka na Noqu Kosipeli era dau kumuna cake na vosa ni bula tawamudu.

Au sureti kemuni mo ni “nanuma matua tiko na noqu ivakavuvuli” (V&V 84:85). Na kena nanumi matua tiko na ivakavuvuli ni bula tawamudu e sega ni o koya na kena vulici se rawa ni cavuqaqataki ga, me vaka ni bibi cake sara na “tugana ki lomamudou na vosa i Karisito” (2 Nifai 31:20; raica talega 2 Nifai 32:3) mai na kena vakatovolei se vakataratarai wale tu ga. Na tugana e tukuna vei au me vakanamata kina na vakasama ka cakacakataki, vakadikevi ka tilomi, vakananumi vakatitobu ka masulaki, bulataki ka vulici, karoni ka taleitaki, qai rekitaki ka vakamareqeti.

Nanuma iratou lesu mada na luvei Mosaia—e va na daukaulotu vakasakiti ka yacadratou o Amoni, Eroni, Omana, kei Iminai—“io sa kaukauwa sara na nodratou vakabauta na ivakavuvuli dina; eratou sa tamata yalomatua ka dau wilika vagumatua na ivolatabu” (Alama 17:2).

Eratou sa dau tugana vakaidina na daukaulotu yaloqaqa oqo na vosa ni bula tawamudu. Eratou sega ni dau vakaweleweletaka se cakava tu ga me isaunitaro na vulici yadua kei na vulici vakaitokani ni ivolanikalou. E curuma vakatitobu na yalodra na kilaka kei na vuku, ka vakadeitaki ki yalodra na dina ni ivunau kei na ivakavuvuli ni kosipeli ena kaukauwa ni Yalo Tabu.

Me vaka ni daru Nona mata na iVakabula, sa nodaru kina o iko kei au na itavi sega ni oti rawa me daru cakacaka vagumatua ka teivaka e yalodaru kei na nodaru vakasama na ivunau kei na ivakavuvuli bibi taumada ni kosipeli vakalesui mai, vakauasivi mai na iVola i Momani. Ni da vakayacora, sa yalataki tu na veivakalougatataki ni na “vakavulici [keda] ena ka kecega” (Joni 14:26) na Yalo Tabu ka solia vei keda na kaukauwa ni da veivakavulici ka vakadinadina. Ena cakacaka ga vata kei keda vakakina mai vei keda na Yalo kevaka eda solia Vua e dua na ka me cakacaka kina. Ena sega ni rawa Vua me vukei keda me da nanuma e dua na ka eda se bera ni vulica (raica na Alama 31:5).

O ira na daukaulotu ni Vunautaka na Noqu Kosipeli era dau tugana tikoga na vosa ni bula tawamudu, era dau vakanuinui ki na ivalavala dodonu ena vosa, ka sa tu vei ira na mana ni vosa. Yalovinaka dau nanumi Koya tikoga, dau kilikili tikoga mo matataki Koya, qai tugana ka vakanuinui ki na ivalavala dodonu ena vosa.

Gagadre #4: O ira na daukaulotu ni Vunautaka na Noqu Kosipeli era kila ni Yalo Tabu sai koya na qasenivuli levu ka dina.

Na Yalo Tabu sai koya na ikatolu Vakalou, sai Koya na ivakadinadina ni ka dina kecega ka qasenivuli levu duadua ka dina. Na lesoni eda vakavulica kei na ivakadinadina eda wasea era na vakarautaka e dua ka vakadidike tiko me cakacaka ka vuli vakataki koya.

Ni da daukaulotu, e dua na noda itavi bibi duadua me da sureti ira era vakadidike tu me ra vakayagataka na nodra digidigi ka ivalavala me vaka na Nona ivakavuvuli na iVakabula. Cakava ka maroroya tiko na veiyalayala vakayalo, me vaka na kena masulaki e dua na ivakadinadina ni dina, vulica ka masulaka na iVola i Momani, lakova na veisoqoni ni Lotu, ka muria na ivakaro, e gadrevi kina vua e vakadidike tiko me vakabauta, cakacaka, ka veisau.

Veitalia na vinaka ni nodaru veiqaravi, ena sega ni rawa vei iko kei au me daru vakatotolotaka se vakasaurarataka na dina ki yalodra na vakadidike tiko. Na noda igu kaukauwa duadua ena rawa ga ni kauta mai na itukutuku ni dina ki yalodra (raica na 2 Nifai 33:1). Me kena ilutua, ena gadrevi vua e vakadidike me cakacaka ena buladodonu ka me sureta kina na dina ki yalona vakataki koya. Ena sala duadua ga oqo era na tara cake kina na dauvakasaqaqara yalodina kei ira na curuvou na kaukauwa vakayalo me ra raica vakataki ira na nodra isaunitaro.

Me vaka ni noda itavi me da vukei ira na vakadidike tiko me ra vuli ena vakabauta kei na kaukauwa ni Yalo Tabu, na cakacaka oqo e sega vakadua ni baleti au ka sega talega ni baleti iko. Eda na gadreva me da cakava na veika kece ena noda kaukauwa me da rawata kina vakavinaka na noda itavi vakadaukaulotu oti ga me da “vagalala sara” me rawa ni cakava na Yalo Tabu na nona itavi kei na cakacaka tabu. Ia, ni dua na ka au cakava o au se o iko ni daru matataka tiko na iVakabula ka daru nakita me daru dokai kina—ena itukutuku daru tukuna, ena iwalewale daru vakayagataka, se ena nodaru ivukivuki se kedaru irairai—sa ivakarau ni bete vakailasu ka na vakasugusugu ena mana ni nona veivakavulici na Yalo Tabu.

“Io sa vunau tiko li ena kaukauwa ni Yalo Tabu na vu ni ka dina, se ena kaukauwa tale eso? Ia kevaka sa vunau ena kaukauwa tani tale eso, ia sa sega ni mai vua na Kalou” (V&V 50:17–18).

Yalovinaka dau nanumi Koya tikoga, bula kilikili mo matataki Koya, tugana na Nona vosa, ka vakatara vua na qasenivuli levu ka dina, na Yalo Tabu, me vakadinadinataka na dina kecega.

Gagadre #5: O ira na daukaulotu ni Vunautaka na Noqu Kosipeli era kila ni veivakavulici e levu cake sara mai na vosa kei na tukutuku walega.

Two elder missionaries visiting with a man in his home.

Ni dabe tiko na iVakabula ena Ulunivanua ni Veiolive, a vunautaka kina: “Dou kakua mada ni lomaocaoca se cava mo dou kaya, dou kakua talega ni vakanananu ki liu: ia na ka kecega ena soli vei kemudou ena tikinisiga ko ya, sai koya ga mo dou vosataka: ni sa sega ni vosa koi kemudou, sa vosa ga na Yalo Tabu” (Marika 13:11).

A vakaroti ira na daukaulotu ena veigauna taumada ni itabagauna oqo na iVakabula me ra “lako yani ka na vakatakilai vei kemudrau na ka mo drau tukuna” (V&V 33:8, 10) ka “tabalaka cake na domomudrau vei ira na tamata oqo; drau tukuna yani na ka au sa vakatakila e lomamudrau, ia drau na sega ni vakamaduataki e matadra na lewevuqa; raica ena soli vei kemudrau ena gauna ko ya, io ena tikinisiga ko ya na ka mo drau vosataka” (V&V 100:5–6).

Na ivolanikalou oqo e vakabibitaka e dua na ivakarau dredre toka ka dodonu vakavinaka me baleta na vunautaki kei na nodra vukei na vakadidike tiko me ra vulica na dina. O ira na daukaulotu ni Vunautaka na Noqu Kosipeli era kila ni da sega ni dau vakavuvulitaka na lesoni; eda vakavulica na tamata. Eda sega ni dau cavuqaqataka walega se tukuna na itukutuku vulici me baleta na iulutaga vakosipeli. Eda sureti ira na dauvakasaqara na dina me ra vakila na veisau kaukauwa ni yalo. Eda kila ni vosa kei na tukutuku walega e sega ni veivakavulici.

Na vunautaki ni kosipeli ena Nona ivakarau na Turaga e okati kina na vakadidike kei na vakarorogo kei na raica na kena duidui ni bera na vosa. E bibi sara toka na kedratou veitaravi na va na iwalewale veiwekani oqo. Yalovinaka me kilai tiko ni na liu mada na vakadidike kei na vakarorogo matua ni bera ni qai kilai ia me na liu na vakadidike, vakarorogo, kei na kila ni bera ni qai caka na vosa. Ni vakayagataki na ivakarau oqo ena rawa kina vei ira na daukaulotu me ra raica, kila ka veivakavulici ki na nodra gagadre na vakadidike tiko.

Ni da vakadidike, vakarorogo, ka kila, sa rawa kina ni soli vei keda “na ka me tukuni me ganiti ira na tamata yadua” (V&V 84:85)—na dina me vakabibitaki kei na isaunitaro me na soli me na sotava nona gagadre e dua e vakadidike tiko. Mai na vakadidike, vakarorogo, kei na kila duadua ga ena rawa kina ni da tuberi mai na Yalotabu me da kaya ka cakava na veika ena veivuke vakalevu duadua vei ira eda veiqaravi ena vukudra.

Na vakadidike e dua na vakavakarau bibi me da ciqoma na isolisoli vakayalo ni kila na duidui. Na kila na duidui sai koya na noda rai ena mata vakayalo ka vakila e yaloda—raica ka vakila na cala ni vakasama, na nona vinaka e dua tale na tamata, se na ivakavuvuli e tarava me vukei kina e dua e vakadidike tiko. Na kila na duidui sai koya na noda vakarorogo ena daliga vakayalo ka vakila e yaloda—rogoca ka vakila na veika e sega ni cavuti ena dua na malanivosa se taro, na dina ni dua na ivakadinadina se ivunau, se na veivakadeitaki kei na sautu ena yaco mai ena kaukauwa ni Yalo Tabu.

O ira na daukaulotu ni Vunautaka na Noqu Kosipeli era dau cakacaka ena vakabauta ka tuberi mai na Yalo Tabu me ra vukei ira na vakadidike tiko ena nodra vulica na dina. Yalovinaka ka dau nanumi Koya tikoga; kilikili mo matataki Koya; tugana na Nona vosa; vakatara me vakadinadinataka na Yalo Tabu na dina kecega; ka vakadikeva, rogoca, ka kila na duidui ena nomu vakadinadinataki Jisu Karisito vei ira na dauvakasaqara na dina ena yalodina.

E rawa mo ni cakava oqori!

Two elder missionaries walking along a dirt road.

E rawa ni o wilika na noqu itukutuku ka vakabauta ni rawa vei ira kece na vo ni itabagone me ra cakava na veika au vakamacalataka tiko. Ia o na vakataroga tiko beka kevaka e rawa ni o cakava. Yalovinaka vakarorogo. E rawa mo ni cakava oqori!

Kevaka me vakatau ena gagadre ni yaloqu, au na taura e vica na gauna vata kei kemuni yadudua. Au na lululu kei kemuni, toroi iko voleka mai, raica na matamu, ka kaya, “E rawa ni o cakava oqo! Na Turaga o matataka ka veiqaravi tiko ena vukuna e kila ni rawa ni o cakava oqo. Au kila ni rawa ni o cakava oqo. Ka me vaka niu nona italai, au yalataka vei iko ni na vukei iko o Koya. Yalovinaka dau nanuma tikoga ena Nona veivuke kei na Nona igu, ena rawa kina ni o cakava oqo!”

Au lomani kemuni ka masuta ena nomuni segata mo ni yaco me vaka na nomuni gagadre, o ni na kila ka cakava ena vakabauta na domona kei na nona veituberi na Turaga. Ena gauna oqori o ni na yaco vakaidina kina mo ni nona mata qaqa ka mana sara na Turaga o Jisu Karisito.

iTaba mai na Publishing Services Department; KO SA LOMANI AU VAKALEVU CAKE MAI VEI IRA OQO? MAI VEI DAVID LINDSLEY