iTabagone kei na Veiyalayalati ni Valetabu
Ena tosoi sobu ni yabaki e gadrevi vei ira na daukaulotu tudei, e tini vakaudolu tale na itabagone era sa cakava tiko oqo na nodra veiyalayalati tabu ni valetabu.
Vaka daucakacaka ena valetabu, sa neimami na veivakalougatataki ni veisotari vata kei ira na isausauvou era lako mai ki na valetabu mera ciqoma na nodra edaumeni. Keimami sa raica ni a veivuke vei ira na semina ni vakavakarau ki na valetabu, ia a yaga cake sara na veivakayarayarataki ni itubutubu kei na iliuliu yalododonu ena nodra vukei mera vakarautaki ni mera vakayacora na veiyalayalati ni valetabu. Vaka itubutubu kei na iliuliu, sa gadrevi meda na vukei ira na itabagone mera kakua walega ni vakavakarau ki na veiqaravi vakadaukaulotu tudei, ka na cava ga ena vica na vula, ia ena caka talega kei na maroroi ni veiyalayalati ni valetabu, ka na tawamudu sara. Na imatai ni kalawa sa rawa ni tekivu ena gauna ni gone.
Vakarautaki ni Gonelalai
Sa rawa ni ra vakaraitaka na itubutubu vei ira na luvedra na bibi ni valetabu ena nodra sokalou ena valetabu kei na wasei ni nodra ivakadinadina ni cakacaka ena valetabu. Me vaka na veivanua ka sega ni rawa ni lakovi wasoma kina na valetabu, sa rawa vei ira na itubutubu mera tugana ki vei ira na luvedra na gagadre ni gole e valetabu.
A vakatavulici ira na itubutubu o Peresitedi Howard W. Hunter (1907–95): “Meda wasea vata kei ira na luveda na veika vakayalo eda vakila ena valetabu. Ka meda qai vakatavulici ira vagumatua ka vakamatau sara ena veika eda rawa ni tukuna vakamatau me baleta na inaki eso ni vale ni Turaga.”1 Sa dodonu mera kila na luveda ni valetabu sa dua na vanua eda rawata mai kina na isau ni noda masu ka vakila talega kina na loloma ni Kalou.
Na itubutubu sa rawa ni vakatavulica na luvedra mera rai vakailiu ka bula kilikilitaka na nodra ivolatara yalani na kena ivakayagataki ka tiko vei ira na madigi mera rawata ni ra sa yabaki 12. Ni sa yaco mai na gauna vei ira na itabagone oqo mera curu, eda dikeva na reki kei na dokadoka ena ivakarau ni nodra dulaka yani na ivolatara oqo ena valetabu.
Vakarautaki ni iTabagone
Sa rawa ni vukei ira na luvedra na itubutubu mera vakacolati ena vakasaqaqara ni tuva kawa ka ni gauna era sa yabaki 12 kina sa rawa ni ra kauta na yaca ni nodra matavuvale ki na valetabu. Kivei ira na itabagone ka cakava vakakina, e yalataka o Elder David A. Bednar ena Kuoramu ni iApositolo Le Tinikarua: “Na nomu loloma kei na nomu vakavinavinakataki ira na tubumu ena vakalevutaki. Na nomu ivakadinadina me baleta iVakabula kei na saumaki vua ena titobu ka dei. Ka’u sa yalataka ni ko na taqomaki mai na veivakayarayarataki kaukauwa nei vunica.”2
Eda sa raica e vuqa na ivakaraitaki ni yalayala vakaoqo ni ra vakayacori. A tukuna vei keimami wale tikoga oqo e dua na goneyalewa ni oti na nona a vakasaqara na yaca i tubuna, a lako mai o koya ki na valetabu me cakava na cakacaka me baleti koya. A tukuna o koya ena nona sa mai papitaiso ena vukuna, e vakila vakamatata o koya ni o tubuna ena tavaki koya ena bula ka tarava. Na veika e sotavi vakaoqo e vaqaqacotaka na ivakadinadina ka tugana e dua na gagadre ni via vakaitavi ki na so tale na cakacaka tabu vakalotu ena valetabu.
Vuqa vei ira na itabagone era sotava na veitemaki ni vakaisulu tawarakorako. Ni ra daramaka na itubutubu kei na iliuliu na isulu totoka, rakorako, era na vakila na itabagone ni na rawa vei ira vakakina. Sa dodonu mera kila deivaki na itabagone ni ivakarau ni nodra isulusulu kei na iwalewale ni nodra qarava na yagodra e rawa ni vakaraitaka na nodra bula vakatisaipeli.
Na itubutubu sa rawa ni vukei ira na itabagone ena nodra vakarautaki ni curuma na valetabu ena nodra vukei tiko mera kila deivaki na veiyalayalati era na cakava e kea. E okati ena veiyalayalati ni valetabu na yalayala me “maroroi vakabibi na lawa ni ivalavala dodonu kei na ivalavala savasava, meda dau loloma, gugumatua, dauvosota ka tawacala; me soli vata na taledi kei na veika vakayagataki sa vakaibalebaletaki ki na vakatetei ni dina kei na laveti cake ni [matavuvale vakatamata]; me tomani na vakacerecerei ni sasagataki dina; ka qarai na sala kece ni kena tutaki na vakavakarau levu ni sa na tuvakawawa o vuravura me ciqoma na nona Tui—na Turaga o Jisu Karisito.”3 Sa rawa ni vakadinadinataka na itubutubu ni ra na ciqoma na itabagone na veivakalougatataki qaqaco vakaiira ena nodra bula taucoko ni ra maroroya na veiyalayalati oqo, ka na vakavuna me vakaibalebale cake na veiyalayalati oqo kivei ira na itabagone ni vukei ira na itubutubu mera kila deivaki ni veivakalougatataki kei na veiyalayalati e sa rawati duadua ga mai na veisorovaki i Jisu Karisito.
Sa vuqa na sala e rawa ni da veivuke ni vakarautaki ira kina na luveda kei na itabagone mera ciqoma na veivakalougatataki ni valetabu. Na levu ga ni nodra vakavakarau, na levu ni nodra kune vakacegu ka vakila na Yalotabu ka yaco me rawata na veika ena sotavi vakayalo ni ra sa ciqoma na nodra edaumeni. E dua na veisotavi ni valetabu veilaveti ena vakavurea mera tisaipeli gugumatua i Karisito ka daukaulotu vinaka cake—dau tuvakarau me vukei ira era vakatavulici mera vakavakarau ni ciqoma na nodra cakacaka tabu vakalotu eso ena valetabu.
Droini mai vei Steve Kropp