Na Sala Cava meu Dua kina na Daukaulotu Qaqa?
E vakaitikotiko o koya e vola mai Maine e Amerika.
Veitalia na kaukauwa ni neirau cakacaka kei noqu itokani, era besetaka kecega na neirau itukutuku. Na cava e rawa ni keirau cakava me keirau daukaulotu qaqa kina?
Sa oti vakalailai e dua na yabaki na noqu kaulotu tiko au qai sotava e dua na gauna dredre. Keirau donumaka sara tikoga e dua na gauna dragali—se qai oti mai e dua na vulaibatabata ka vavaca yani na vulaitubutubu. Veitalia na kaukauwa ni neirau cakacaka kei noqu itokani, o ira kecega keirau vosa kina era besetaka sara ga vakadodonu na neirau itukutuku. Ni keirau sotavi ira na vo ni daukaulotu, keirau qai kila ni toso vinaka sara tikoga na nodra cakacaka. Au sega ni vakasamataka rawa na vuna keirau sega ni rawata tiko kina e dua na ka. Sa balavu toka na noqu kaulotu tiko kau sa rawa ni vosataka vakavinaka na vosa, keirau veitokani vinaka, keirau sa tauyavutaka na veivakabauti vei ira na lewenilotu, ka keirau tovolea me keirau dau muria na veivakauqeti ni Yalo ka talairawarawa vakamatailalai ki na lawa ni kaulotu.
Ia veitalia na veika keirau cakava, keirau besetaki ena veivanua kecega. Ni oti e vica vata na macawa ena kena yaco tiko vaqo, au qai vakatara me rawai au na ivakarau ni vakasama velavela sa tiko mai vei au. Ena dua na gauna ni neirau tuvatuvalaki au sa kailavaka yani, “Na cava na betena? E sega ni dua ena via rogoci kedaru.” Qai kaya mai na noqu itokani, ni vinaka cake na ivakarau ni nona rai mai vei au, “Daru biuta nodaru takete me daru vakaraitaka na nodaru vakabauta. Keirau taumuria na neirau takete me keirau wilika na neirau veivakalougatataki.”
Niu vakasamataka vakatitobu na veika e raica rawa, au qai kila ni cala na ivakarau au vakayagataka tiko me vakatulewataki kina na noqu rawa ka vakadaukaulotu. E vakarautaki ena Vunautaka na Noqu Kosipeli: iDusidusi ki na Veiqaravi ni Daukaulotu e dua na lisi ni nodra itovo na daukaulotu qaqa,1 au qai kila ni itovo kece oqori e tiko ena loma ni nodra vakatulewa na daukaulotu. Au sega ni rawa ni vakatulewataka na nodra ciqoma se sega na tamata ena noqu tabana ni kaulotu na itukutuku ni kosipeli, ia e rawa niu vakatulewataka na mataqali daukaulotu vakacava au digitaka meu vakakina. E vakaraitaka vei au na noqu itokani ni noqu vakabauti Jisu Karisito vakalevu cake kei na noqu vakavinavinakataka na Nona veivakalougatataki ena rawa kina meu raica na sala eso au sa qaqa tiko kina ena noqu kaulotu.
Na Vakabauta e Vakabasikata na Cakamana
E veivakayalomalumalumutaki na noqu kila ni lailai tiko na noqu vakabauta. Au vaqara na vanua eso e rawa meu vaqaqacotaka kina noqu vakabauta ka kunea ni gauna e sega ni donu kina na ituvatuva, au a vakatara meu yalolailai. E kaya na Vunautaka na Noqu Kosipeli: “Na yalolailai ena malumalumu kina na nomu vakabauta. Kevaka o toroya sobu na veika o namaka, sa na lailai na kemu yaga, ena malumalumu na nomu gagadre, ka dredre vakalevu cake vei iko mo muria na Yalo.”2 Au qai kila niu a vakatara na veika dredre keirau sotava me vakamalumalumutaka na noqu vakabauta.
Au tekivu ena noqu masulaka me veisau na yaloqu ka me levu cake na vakabauta. Au a vakararavi talega ena yalayala ena Momani 9:21: “Raica au sa kaya vei kemudou ko koya sa vakabauta na Karisito ka sega tale ni vakatitiqa ena solia vua na ka sa kerea vei Tamada ena yaca i Karisito; ia sa soli tu na vosa ni yalayala oqo vei ira na veitabatamata kecega.” Na yalaya oqo e vakavuna na noqu masulaka vagumatua na veivakalougatataki kei na cakamana keirau nanuma kei noqu itokani ni keirau gadreva, ka dau kena ikuri tikoga, “Me caka ga na lomamuni.” Na veiqaqa ni masu oqo e vukei au meu ciqoma na veisau ni ituvatuva kei na dredre eso ena vakabauta levu cake, ka kila tiko ni dau sauma na Tamada Vakalomalagi na masu ni vakabauta—ena gauna sara mada ga e yaco mai kina na kena isau ena sala eso eda sega ni namaka. Sa yaco meu rawata vakalevu cake meu raica na sala e dusimaki keirau tiko kina na Turaga ena neirau veisiga.
Niu cakacakataka tiko na kena vaqaqacotaki na noqu vakabauta, au raica rawa kina na ituvaki dodonu ni iyatuvosa mai na Vunautaka na Noqu Kosipeli ni dina: kevaka o laveta cake na veika o namaka, ena levu cake na kemu yaga, ena tubu na nomu gagadre, ka na rawa mo muria vakavinaka cake na Yalo. Me kena ikuri, au sa yalonanamaki vakalevu cake me baleta na cakacaka ni kaulotu kei na noqu veiqaravi vakadaukaulotu ni rawa meu raica ka vakavinavinakataka na cakamana e dau yaco e veisiga.
Na Vakavinavinaka ena Valuta na Vuvu
Sa tekivu vakaraitaka vei au na Turaga ni dau cakacaka mana ena vukuda e veisiga yadua—ia au a sega ni raica rawa me yacova na gauna au sa segata kina meu dau vakavinavinaka ena yalodina. Na vakaraitaki ni vakavinavinaka e sega walega ni dua na itovo vinaka se ivalavala taleitaki. Niu vakaraitaka na noqu vakavinavinaka vua na Turaga kei ira na tani, au a vakaukauwataki. Au raica niu marau ena vuku ni nodra qaqa na daukaulotu tale eso ka sega ni vuvu (raica na Alama 29:14, 16). Sa rawa vakalevu cake meu raica ga na veika e tu vei au kei na veika e donu ka sega na veika e sega ni tu vei au kei na veika e cala.
Au sa vulica ni vakavinavinaka na iwali ni noda vakatautauvatataki keda vei ira tale eso. Na veigauna oya au dau nanuma kina niu sega ni daukaulotu qaqa e yaco mai baleta niu dau tukuna tiko vei au, “Au sega ni vinaka tiko me vakataki ira,” se, “Era vinaka cake ena ka oqo mai vei au.” Au vulica talega ni nona ivakarau na Turaga me solia vei keda na ivakaraitaki dodonu me da vakatotomuria, ia na nona ivadi o Setani me temaki keda me da vakatauvatani keda kei ira eso me kilai kina na keda yaga se noda qaqa. Ia e vakamatata ena vuku ni tikina oqo na Vunautaka na Noqu Kosipeli: “Kakua ni veidutaitaki iko kei ira na daukaulotu tale eso ka vakatautauvatataka na vua ni nomu sasaga kei na nodra.”3 Na kena ilutua, sa qai vukei au na vakavinavinaka meu gole tani mai na qaciqacia ka vakananuma vei au ni liutaka tiko na Turaga na Nona cakacaka. E sega ni gadrevi meu vuvutaka ni levu cake na veika era rawata na noqu itokani daukaulotu.4
Na iVakarau Dina ni Rawa Ka
Ni bera ni yaco mai vei au na veisau ni ivakarau ni rai oqo, au dau vakanamata tu ki na dua ga na ivakarau ni veivakalougatataki kau guilecava kina meu dolava tikoga na mataqu ki na sala tale eso sa sauma tiko kina na Turaga na neirau masu ka vakalougatataka tiko na neirau cakacaka ni kaulotu. Sa qai yaco me vakalougatataka mai na Turaga na cakacaka ni kaulotu ena neirau vanua ni veiqaravi ena veisala totoka ka sega ni namaki. Keirau kunei ira na tamata era sa vakarau me ra ciqoma na neirau itukutuku, ia au sa vulica ena gauna oqori meu kakua ni vakarautaka na noqu qaqa mai na nodra digidigi na tani.
A wasea o Peresitedi Gordon B. Hinckley (1910–2008) na nona ivakasala e dua na peresitedi ni daukaulotu me baleta na cakacaka ni kaulotu: “Solia na nomu vinaka duadua, na nomu vinaka duadua sara. Cabora na nomu masu ka cakacaka vakaukauwa ka laiva na tatamusuki vua na Turaga.”5 Vunautaka na Noqu Kosipeli e vakavuvulitaka e dua na ivakavuvuli tautauvata me baleti ira na daukaulotu qaqa: “Solia nomu vinaka duadua mo vakalesuya mai na yalo vei Karisito, ka segata vagumatua mo vuli ka tubu me vinaka cake.”6
Niu tu vakarau meu veivutuni, niu tu vakarau meu tukuna vakaidina vua na Turaga niu sa solia tiko na noqu vinaka duadua, sa rawa niu vakadeitaka niu sa dua na daukaulotu qaqa—veitalia kevaka era ciqoma na tamata na neirau itukutuku. Ena vuqa sara na sala sa rawa ni vakatulewataki kina na qaqa ni noqu kaulotu mai na noqu sa tu vakarau meu veivutuni kei na noqu gagadre meu cakacaka tikoga.
E volai tu ena noqu ivolaniveisiga e vuqa na cakacaka mana mai na gauna oqo ni noqu kaulotu. Niu segata meu yalodina vakalevu cake ka dau vakavinavinaka, sa vinaka cake na ivakarau ni noqu rai, au dau levea na yalolailai, kau vakila vakalevu cake na Yalo ena cakacaka. Au raica ni dina na veika e vakavuvulitaki ena Vunautaka na Noqu Kosipeli: “Ni o sa solia na nomu vinaka duadua o na sotava tiko beka ga na mosi ni yalo, ia o na sega ni rarawataki iko. E rawa ni o vakadeitaka ni sa marau na Turaga ena nomu vakila na cakacaka ni Yalo ki lomamu.”7 Ia niu vakila ni sa marautaki au na Turaga, sa rawa niu vosota na veivakatovolei kecega.
Ena vuqa sara na sala, na ivakarau ni qaqa ena noqu kaulotu e rawa ni tauri mai na noqu sa tu vakarau meu veivutuni kei na noqu guta meu cakacaka tikoga.
iVakaraitaki vakaiyaloyalo nei Del Benson