Na Cava na Vuna kei na Cava e Gadrevi Meu na Vakatusa vei Noqu Bisopi?
Na nona vukei iko o bisopi mo veivutuni sa tiki bibi tiko ni nona veikacivi. Na lomamu ena tukuna vei iko ni sa gauna mo vosa kina vua.
O na rairai vakasamataka beka na vuna o tuberi kina mo vakatusa vei bisopi se peresitedi ni tabana ni ko vakayacora e dua na cala bibi. Ko na rairai kaya beka e lomamu, “E sega beka ni ka ni tamata yadua vata kei na Turaga na veivutuni? Kevaka beka au sa muduka vakadua na noqu caka cala ka vakatusa vua na Kalou, na cava na vuna meu laki tukuna kina vei noqu bisopi?”
iTaba mai vei Christina Smith
Na Cava na Vuna Me o Bisopi Kina ka Sega Tale ni Dua?
E vuqa na itabagone era yalovakacegu ni ra laki vakatusa na nodra caka cala vei ira na nodra itubutubu se iliuliu ni itabagone. E dina ga ni ra dau veitokoni mai ka veivakasalataki na itubutubu kei na iliuliu, sa vakaraitaka mai na Turaga ni o bisopi sa turaganilewa vei ira na Isireli (raica na V&V 107:72, 74). Sa nona ilesilesi me vakadeitaka na nodra bula kilikili na lewe ni nona tabanalevu. Ena veitabaki kei na bula dodonu, sa na rawa vei bisopi me ciqoma na ivakatakila mai vua na Yalo Tabu me baleti ira na lewe ni nona tabanalevu, vakakina o iko.
Sa rawa vei bisopi me vukei iko ena salatu ni veivutuni era na sega ni vakarautaka rawa o nomuni itubutubu se iliuliu tale eso. Kevaka ena bibi toka na cala, ena rawa ni vakadeitaka o koya na kena tarovi eso na nomu isolisoli e tiko ena Lotu. Me kena ivakaraitaki, me tiki ni nomu salatu ni veivutuni, ena kerei iko o koya mo kakua ni vakayagataka na sakaramede se cakacaka ena matabete me dua toka na gauna. Ena cakacaka vata kei iko ka na vakadeitaka ni ko sa bula kilikili tale ka vakalesui tale na nomu cakacaka vakalotu.
Ena vakasalataki iko o bisopi ena veika mo cakava mo kaukauwa cake ena nomu vorata rawa na veitemaki. Ena rawa ni vakayaloqaqataki iko mo vulica e dua na ulutaga vakaivunau, me vakataka na veivutuni, ka rawa mo wasea vua na veika o sa vulica. Ena rawa ni kerei iko mo laki raici koya ena veimacawa mo laki tukuna na veika o sa rawata rawa ena nomu drotani rawa tiko mai na ituvaki ni veitemaki.
Meu na Vosa Vua ena Gauna Cava?
O na rairai vakasamataka, “E rogorogo vinaka oqori, ia meu kila vakacava ni ka au cakava sa cala bibi sara ka sa gadrevi meu na vosa vei bisopi?” Me saumi vakalekaleka: “Ena tukuna vei iko na lomamu.” Ni gauna sa vakayavalati tiko kina na lomamu, vakayacora sara (raica na Alama 34:31–34).
Me baleta na veivutuni, a vakavulica o Tui Penijamini, “Sa sega ni rawa meu tukuna yani na veika kece sa rawa mo ni valavala ca kina; raica sa vuqa sara na kena sala ka vuqa na kena ivalavala, io sa rui levu ka sa sega ni wili rawa” (Mosaia 4:29). Ena vuku ni sega ni gadrevi me soli e dua na lisi ni veika e dodonu mo vakatusa vei nomu bisopi, meu wasea mada eso na ivakavuvuli ena vukei iko mo vakatulewa kina.
Na Cava na Vuna Meu Vakatutusa Kina?
Au kila ni ko sa sasagataka tiko mo talairawarawa, ia e rairai beka o a vakayacora eso na cala—ka vakakina eso na cala bibi. E vuqa na cala era cakava na tamata ena rawa ni wali ena masu ni tamata yadua kei na veivutuni vakaidina. Eso na cala, vakabibi na kena e baleta na bula tawakilikili, e gadrevi me vakatusai vei bisopi ni bera ni o ciqoma na veivosoti ni Turaga.
Ni ko vakasamataka na cala o sa cakava, o na vakila ni ko sa caka cala, sega ni vakacegu, sega ni marau, se loma bibi voli. Kevaka o vakila ni ra yaco tiko vei iko oqo, sa na gadrevi kina mo tukuna vei nomu bisopi na cala oqori.
Kakua ni tovolea mo vakaiulubaletaka se vakadonuya na nomu caka cala. O na rairai vakasamataka beka, “Sa na dua na ka vakamadua meu tukuna vei bisopi na ka au sa cakava. E vakabauta o koya niu tamata vinaka cake tiko. Ena kurabui sara keu na tukuna na ka au sa cakava. Ena sega tale ni taleitaki au.”
Au sa yalataka vei iko ni na sega ni vakacacani iko. Me vaka ni sa italai ni Turaga, ena yalololoma ka kila vakavinaka ni sa vakarorogo vei iko. Ena vukei iko ena salatu ni veivutuni. Sai koya na italai ni Turaga ni loloma veivueti mena vukei iko mo savasava ena Veisorovaki i Jisu Karisito.
E kaya kina na Turaga: “Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale na nona ivalavala ca.
“Raica oqo ga na sala dou na kila kina na tamata sa veivutuni vakaidina—ena tusanaka na nona ivalavala ca, ka biuta laivi sara vakadua.” (V&V 58:42–43).
Ni ko vakatusa ka biuta tani vakadua na nomu ivalavala ca, ena vosoti iko na Turaga. O na sega tale ni soli itukutuku Vua baleta na ivalavala ca o ya ena gauna ko na tu kina mo lewai.
Vakacava Beka keu Sega ni Vakatutusa?
Eso na gauna ena sega tale ni caka cala na tamata ia e sega ni vakatusa, ena gauna e gadrevi kina, vei nona bisopi. Me kena irevurevu, ena colata duadua tiko na tamata oqo na icolacola ni ivalavala ca oya, ka sega ni solia vua na iVakabula me kauta laivi na icolacola.
Me vakaraitaka mada e dua na kena ivakaraitaki. Ena dua na yakavi ena vica na yabaki sa oti, au a vakatarogi ira tiko na qase me vakavoutaki na nodra ivolatara ni valetabu. Sa yaco sara mai e dua na marama uabula me mai vakatarogi. A vakamau o koya e valetabu ka gugumatua sara ena Lotu ena nona bula taucoko.
Au a vakila ni rarawa sara tiko vakalevu na yalona. Ni toso na veivakatarogi, au a vakauqeti sara vakayalo. Au a kaya vua, “Sisita, au kila ni o a vakayacora e dua na cala bibi ni ko se goneyalewa kina ka o se bera ni vakatusa vua e dua na iliuliu ni matabete. E rawa beka ni o tukuna vei au?”
Sa tekivu me tagi. A kaya vei au ni dina, ia e dau madualaka me vakatusa vei bisopi. Ni sa vakatusa na veika a vakayacora, a wasea vei au na veika e gadrevi meu rawa ni vakadeitaka ni sa bula kilikili.
Na nona vakatusa na nona ivalavala ca vua e dua na iliuliu ni matabete sa mai tini kina na nona salatu ni veivutuni ka sega ni qai tekivu tale. A colata vakaveitalia tu o koya na icolacola kei na rarawa ni ivalavala ca o ya ena 30 vakacaca na yabaki.
Ena vuku ga ni sa mai vakacavara na ituvatuva ni veivutuni, sa savui laivi kina na nona caka cala. Au dau raici koya ena so na gauna ni oti mai na veivakatarogi o ya. E rarama na kena irairai, ka sa bula marau.
Au vinakata mo ni kila niu sega ni kila na yacana. Sa rawa vua na Turaga me vagalalataka na itukutuku vakaoya mai na nodra vakanananu na bisopi. Na ka ga au nanuma ni nona vakatutusa vei nona iliuliu ni matabete, e dua na marama uabula sa yaco kina me vagalalataki mai na nona caka cala a colata voli tu ena vuqa na yabaki.
Yalovinaka kakua ni cakava na cala o ya. Kevaka o vakila ni ko sa caka cala ka o sega ni vakadeitaka mo laki tusanaka vei nomu bisopi, laki raici koya. Laiva me vukei iko. Kakua ni colata tu vakaveitalia e dua na icolacola ena nomu bula taucoko, ni na yaco kina mo tiko rarawa. Ni ko sa vakatutusa vei nomu bisopi ka o sa veivutuni, ena kauta laivi na Turaga na icolacola oqori mai na yalomu (raica na Aisea 1:18).
Na Cava na Vuna Meu Veivutuni Kina?
Sa mai sauma o Jisu Karisito na isau ni ivalavala ca ni kawatamata kecega ena Nona solibula ni veisorovaki. Sa sureti iko tu o Koya mo veivutuni ka me lakotani mai vei iko na mosi kei na rarawa. “Mo veivutuni … raica ko na rarawa vakalevu—ia ko na sega ni vosota rawa na kena bibi, na kena mosi kei na kena kaukauwa.
“Raica ko i au na Kalou, au sa vosota oti na veika oqo, me ra bula kina ko ira era sa veivutuni;
“Ia kevaka era sa sega ni veivutuni, era na vakararawataki me vakataki au. …
“A ka oqo, au sa vakarota kina mo veivutuni, … mo tusanaka na nomu ivalavala ca, kevaka e sega ena tau vei iko na itotogi kau tukuna tiko” (V&V 19:15–17, 20).
Au vakadinadinataka ni Nona vakararawataki, sa sauma oti kina o Jisu Karisito na nomu ivalavala ca. Sa rawa mo vosoti ni ko sa veivutuni. Kakua ni saga mo sauma ga o iko na nomu ivalavala ca. Ena sega ni veirauti na levu ni nomu vakararawataki mo vueti kina, sa rawa duadua ga ena Veisorovaki ni sa yaco kina mo vosoti.
Mo dau vakabauti Jisu Karisito tikoga kei na Nona Veisorovaki. Au sa vakadinadinataka ena yaca i Jisu Karisito ni yaco na veivutuni, oka kina na vakatutusa vei nomu bisopi ni sa gadrevi vakakina, o na savasava kina. Me kena ikuri, ni loloma soliwale ni iVakabula—Nona kaukauwa veirawai—sa rawa mo vaqaqacotaki mo gugumatua mo vorata rawa na veitemaki ena veisiga ni mataka. O koya gona, ena vakacegu na nomu vakasama ka bula marau, ka rawata na bula tawamudu ena vuravura sa roro tiko mai.