Ang Simbahan Naggamit sa mga Baruganan sa Welfare aron Makabarug og Balik ang Pilipinas

Mga bulan human sa pag-igo sa Bagyong Yolanda sa Pilipinas niadtong Nobyembre 2013, miguba sa dul-an sa 1.2 ka milyon ka mga panimalay ug mipatay og sobra 6,200 ka mga tawo, ang Simbahan nagpadayon sa paghatag og kahupayan, miusab sa mga paningkamot gikan sa pagtubag sa katalagman ngadto sa paghatag og malungtaron nga kahupayan. Usa ka malampuson kaayo nga paningkamot naglakip sa mga boluntaryo nga nakat-on sa pagtukod og mga balay alang niadtong wala gihapoy kapuy-an.

Ang mosunod nga mga sakop sa komunidad nga naapektuhan sa bagyo nalakip niadtong kadaghanan nga mipahayag og pasalamat sa tabang nga ilang nadawat gikan sa Simbahan, bisan tuod sila dili mga Santos sa Ulahing mga Adlaw:

• Usa ka babaye kinsa midangop ngadto sa usa ka chapel sa Mormon atol sa bagyo nakahibalo pagkahuman nga ang iyang balay naguba sa dihang natumbahan kini sa mga lubi. Siya ug ang iyang pamilya walay kapanguhaan sa pagpaayo niini, apan mga boluntaryo mitabang kaniya sa pagtukod og bag-ong balay, ug karon siya nagtabang sa laing pamilya sa paghimo og balay. “Nakat-on ko sa pagtrabaho kauban niadtong kinsa nanginahanglan usab, aron dungan kami nga makabarug human sa [bagyo],” siya miingon.

• Usa ka tawo nga nawad-an sa iyang trabaho sa dihang naguba ang negosyo diin siya nagtrabaho karon nagkat-on sa pagtukod og mga pinuy-anan alang sa iyang pamilya ug sa uban. “Nasayud mi nga kinahanglan kami nga magtinabangay aron dali mahuman ang trabaho,” miingon siya, midugang nga siya mapasalamaton alang sa mga tabang gikan sa Simbahan.

Si Presiding Bishop Gary E. Stevenson miingon nga, uban sa pag-atiman sa kabus ug timawa, “nakita usab nato nga ang mga baruganan sa pagpaningkamot sa kaugalingon gigamit karon, ug kini talagsaon gayud.” Siya miingon, “Usa sa mga butang nga among gipaningkamutan nga buhaton mao ang paghatag og mga materyal samtang [ang mga nakadawat] maoy motrabaho. Bisan kinsa nga modawat og kapuy-an nagtrabaho usab aron sa pagtukod niana nga kapuy-an sa ilang mga kaugalingon.”

Ang lokal nga mga lider sa Simbahan ug mga representante sa humanitarian nga grupo nakigmiting sa lokal nga mga lider sa komunidad sa paghatag og bokasyonal nga pagbansay ug sertipikasyon ngadto sa mga tawo kinsa nakakat-on sa mga kahanas sa pagpamanday. Ang mga kapanguhaan sa Makanunayong Pundo sa Edukasyon gigamit aron sa pagdala sa 20 ka banggiitan nga mga karpentero aron sa pagtabang sa pagbansay, ug 2,000 na sa 3,000 ka gitumong nga mga balay ang nahuman.

Ang lokal nga mga gipangbansay nagpakita sa ilang nakat-unan pinaagi sa pagtukod og 10 ka mga pinuy-anan aron makadawat og sertipikasyon sa gobyerno ug usa ka toolbox gikan sa Simbahan, nga makatabang nila sa pagpangita og trabaho. Dako kaayo ang panginahanglan alang sa mga trabahante sa konstruksyon nga ang Catholic Relief Services miuyon nga moempleyo og gatusan ka mga karpentero nga gibansay sa LDS nga Simbahan.

Si Bishop Stevenson miingon nga 500 ka mga miyembro sa Simbahan mitambong og usa ka miting diin ang eklesiastikanhong mga lider mihulagway sa pagbansay sa trabaho ug sertipikasyon, “ug samtang gihulagway kini ngadto kanila, sila namakpak ug nakahilak, nasayud nga sila makakita og paagi … sa pagsangkap alang sa ilang mga pamilya.”

Ang Simbahan nakig-alayon usab sa pipila ka charitable nga mga organisasyon ingon man usab sa gobyerno sa Pilipinas sa padayon nga paningkamot aron sa paghatud og pagkaon, tubig, mga suplay sa medikal, hygiene kit, generator, mga gamit sa panimalay, pangluto, pangisda ug mga liso nga pangtanom.

Ang Simbahan nakakat-on nga ang labing epektibo nga paagi sa pagtubag sa katalagman mao ang pagtrabaho diha sa lokal nga paagi, pagpalit sa gikinahanglang suplay sa naapektohan nga mga nasud, nga labing duol sa katalagman kutob sa mahimo. Dili lamang kini mosiguro nga ang butang angay alang sa dapit, apan kini usab makatabang nga maulian ang naapektuhan nga lokal nga ekonomiya.

Ang mga miyembro sa tibuok kalibutan giawhag sa pag-ampo alang niadtong anaa sa mga dapit sa katalagman nga layo sa ilang gipuy-an, ug ikonsiderar ang pagdugang sa ilang mga donasyon sa halad sa puasa o modonar ngadto sa humanitarian fund sa Simbahan.