Elder Jörg Klebingat

Unang Korum sa Seventy

Si Elder Jörg Klebingat nagkinabuhi nga makanunayon. Nagtuo siya sa pagkamasulundon, pagsunod sa mga sugo ug aghat sa Espiritu.

Natawo niadtong Disyembre 19, 1967, ngadto ni Klaus-Peter ug Doris Elke Klebingat, si Elder Klebingat nagtubo sa Zweibrücken, Germany, nga walay impluwensya sa ebanghelyo. Isip usa ka tin-edyer, siya nakahimamat og usa ka miyembro sa Simbahan sa usa ka konsyerto sa musika, ug ang duha nahimong mga higala.

“Sa dihang mibisita ko sa akong bag-ong higala, nakadayeg ko sa iyang pamilya,” siya mihinumdom. “Akong gibati ang Espiritu sa iyang panimalay ug gusto nga motambong sa simbahan.”

Niadto nga unang miting sa Simbahan nga siya nakadungog sa Basahon ni Mormon. Ang iyang higala mihatag kaniya og kopya uban sa iyang pagpamatuod nga kini tinuod, ug si Elder Klebingat mibiya sa mga miting nga determinado nga masayud mismo sa iyang kaugalingon.

“Nagbasa ko sa may 1 Nephi sa dihang nadawat nako akong pagsaksi nga ang basahon tinuod,” miingon si Elder Klebingat. “Ang pag-angkon og pagsaksi ni Propeta Joseph Smith usa usab ka makahuluganon nga panghitabo alang kanako. Sa akong misyon, ako kanunay mohangyo sa akong kauban kon ako ang makasugilon niana nga bahin sa istorya.”

Sa wala pa ang iyang full-time nga misyon sa Colorado Denver mission, si Elder Klebingat miserbisyo sa army sa Germany sulod sa 18 ka bulan. Siya nabugkos ngadto ni Julia Poltorak didto sa Salt Lake Temple niadtong Disyembre 21, 1992. Sila adunay tulo ka mga anak.

Si Elder Klebingat nakaangkon og degree sa Russian language studies gikan sa Ricks College ug sa wala madugay usa ka master’s degree sa organizational behavior gikan sa Brigham Young University. Nakatrabaho siya isip usa ka business management consultant sa Price Waterhouse ug Arthur Andersen ug sa pipila ka mga kapasidad alang sa Simbahan.

Sa wala pa niini nga tawag, si Elder Klebingat nagserbisyo isip usa ka young single adult representative sa stake, presidente sa elders quorum, presidente sa Young Men, high councilor, presidente sa branch, ug bishop. Mahuman siya sa pagserbisyo isip presidente sa Ukraine Kyiv Mission sa Hunyo 2014. Siya gipaluyohan isip usa ka sakop sa Unang Korum sa Seventy niadtong Abril 5, 2014.