Ang Pagtudlo diha sa Simbahan Kinahanglang Nagsunod sa Ehemplo ni Kristo

“Kita maningkamot sa pagsunod sa mga tunob sa Manluluwas sa pagtudlo,” miingon ang bag-ong kinatibuk-ang presidente sa Sunday School, Tad R. Callister, human sa kinatibuk-ang komperensya.

Nagpasabut kana sa pagpangutana og dinasig nga mga pangutana nga makatabang sa mga tawo nga makabig, siya miingon. Ang tumong mao ang “pagtabang kanila nga makasabut ug mobati sa Espiritu sa ebanghelyo diha sa ilang kinabuhi.”

Siya miingon nga siya nakadayeg sa Come, Follow Me, ang online nga kurikulum sa mga batan-onan nga naglakip sa pinakabag-o nga pakigpulong sa kinatibuk-ang komperensya ingon man sa media nga gihimo sa Simbahan. Ang partisipasyon mihulip sa mga lecture, siya miingon, ug “adunay klaro nga kausaban gikan sa pagtudlo lang sa leksyon ngadto sa paningkamot nga ipahaum kini ngadto sa mga panginahanglan sa mga estudyante sa klase.”

Siya midugang nga ang Come, Follow Me nakatabang sa pagkakabig ug dili lang sa pagpasa og impormasyon. “Sa akong hunahuna kita nagpadako og henerasyon sa mga batan-on nga mahimong pinakamaayong magtutudlo sa kalibutan, pinakamaayong mga ginikanan sa kalibutan,” siya miingon, “tungod kay sila nakasinati niini samtang batan-on pa ug dili na magpaabut nga [sila] mahimong hamtong … aron masayran unsa ang epektibong pagtudlo ug pagsabut.”

Si Jesukristo mao ang Gamhanan nga Magtutudlo, miingon si Brother Callister, ug ang atong pagtudlo diha sa simbahan kinahanglan makapaduol sa mga tawo ngadto kang Kristo. Ang paghatag og gibug-aton sa panginahanglan sa pagtudlo sa doktrina nga klaro ug tukma, siya miingon “kon kita maningkamot sa pagsunod sa Manluluwas, naghimo kita sa Iyang gipabuhat.”