Bag-o nga Salida Makamugna og Oportunidad nga Mahimamat ang mga Mormon

Usahay inyo bang nakaplagan ang inyong kaugalingon nga nanghinaut nga adunay yano nga paagi sa pagpahibalo sa uban nga ang mga Santos sa Ulahing mga Adlaw normal lang nga mga tawo kinsa nakakaplag og katuyoan ug direksyon samtang ilang gi-focus ilang kinabuhi kang Jesukristo? Mao kini ang documentary nga salida nga sa dili madugay ipagawas sa Simbahan aron makatabang ninyo.

Ang Himamata ang mga Mormon nagsugod sa panglantaw sa mga miyembro sa Simbahan kabahin sa sayop nga panglantaw sa uban. Dayon kini mopakita sa unom ka pamilya, kada usa nagpakigbahin sa ilang personal nga mga kasinatian ug naghulagway kon sa unsang paagi ang ebanghelyo nakatabang sa ilang kinabuhi. Kadtong gipakita naglakip sa:

Bishop. Si Jermaine Sullivan ug iyang asawa, si Kembe, gikan sa Atlanta, Georgia, USA, naningkamot nga mahiusa ang nagkalain-laing komunidad samtang nagpadako sa ilang tulo ka batan-ong mga lalaki.

Coach. Si Ken Niumatalolo, ang head coach sa U.S. Naval Academy football team sa Annapolis, Maryland, USA, ug iyang asawa, si Barbara, uban sa suporta sa ilang mga anak ug mga kawani, padayon nga gibalaan ang adlaw sa Igpapahulay.

Candy Bomber. Si Gail Halvorsen, 93 anyos nga beterano sa Ikaduhang Gubat sa Kalibutan, ug iyang asawa si Lorraine, 90 anyos, gikan sa Amado, Arizona, USA, nagpahinumdom sa mga bata sa bili sa pagserbisyo. Piloto ra gihapon, si Brother Halvorsen nagpahulog og kendi gikan sa eroplano sama sa iyang gibuhat atol sa Berlin Airlift human sa gubat.

Fighter. Si Carolina Marin, usa ka kickboxer gikan sa San José, Costa Rica, ug iyang tigbansay ug bana, si Milton, nagbalanse sa ilang mga tahas isip kapikas ug ginikanan sa ilang batan-ong mga anak uban sa ilang kahinam sa kompetisyon.

Humanitarian. Sila Bishnu ug Mangala Adhikari, sa Kathmandu, Nepal, nagtahud sa mga gituohan ug panulundon sa ilang yutang natawhan. Si Brother Adhikari usa ka engineer kinsa nagtukod og mga dalan, mga eskwelahan, ug mga sistema sa pagkuha og limpyo nga tubig nga nakapanalangin sa daghang gagmay nga mga komunidad.

Missionary Mom. Sila si Craig ug Dawn Armstrong ug ilang anak nga lalaki si Anthony, gikan sa Siyudad sa Salt Lake, Utah, USA, nagsaysay kon sa unsang paagi si Sister Armstrong nahimong single mother nga walay pinuy-anan sa dihang iyang nahimamat ang mga misyonaryo. Ang ebanghelyo nga ilang gipakigbahin kaniya nakapausab gyud sa iyang kinabuhi. Sa wala madugay siya naminyo ni Craig, ug ang istorya natapos sa dihang si Anthony miserbisyo og full-time misyon sa South Africa aron ipakigbahin ang ebanghelyo nga nakapanalanginan og maayo sa iyang inahan.

Ang Himamata ang mga Mormon ipasalida sa Joseph Smith Memorial Building sa Siyudad sa Salt Lake, Utah, USA, ug sa ubang mga dapit nga tinuon pa.