Ang Proyekto sa Limpyo nga Tubig Nakatabang og Minilyon sa Africa

Sobra na sa duha ka dekada, ang Simbahan nalambigit sa mga proyekto sa limpyo nga tubig sa sobra sa 100 ka mga nasud. Diha lang sa Africa, kini nga mga proyekto nakapanalangin sa kinabuhi sa sobra sa upat ka milyon ka mga tawo pinaagi sa paghatag og mga atabay, mga sistema sa pagpundo ug paghatud sa tubig, ug pagpalimpyo sa tubig.

Usa niini nga proyekto gipahigayon sa Idugo Isla, duol sa baybayon sa Mozambique. Kadaghanan sa mga 15,000 ka tawo kinsa nagpuyo sa isla nagtrabaho sa mga umahan sa pamilya, mangisda sa naglibut nga mga tubig sa Indian Ocean, o nagtrabaho sa mga evaporation pond sa pagkuha og asin gikan sa tubig sa dagat. Ang isla walay nagdagayday nga tubig, kuryente, mga dalan, o mga sakyanan. Maabut ang isla pinaagi sa hinimo sa kamot nga mga sakayan o gikulit nga mga baroto.

Sulod na sa pipila ka siglo, ang bugtong tinubdan sa tubig nga mainom sa Idugo mao ang mabaw nga mga atabay nga gikalot pinaagi sa kamot. Ang mga atabay kanunay mapuno sa mga binanlas ug mga hugaw. Naghatag kini og lapukon, lisud makuha nga tubig. Panahon sa ting-ulan, ang tubig mahugawan, nga maoy hinungdan sa kolera, kalibanga, ug uban pang mga sakit.

Sa dihang nakadungog ang humanitarian nga mga misyonaryo sa Simbahan mahitungod sa kahimtang sa Idugo, sila nakighimamat sa mga lider sa komunidad didto. Nagtinabangay sila sa paghimo og plano nga ang Church Humanitarian Services mohatag og mga materyal, mga himan ug mga instruksyon sa paghimo og 10 ka mga atabay nga gihanigan og semento nga adunay puthaw nga tabon, matag usa magamit sa sa 1,000 ka mga tawo. Ang mga misyonaryo mohatag og pagbansay sa hygiene ug sanitasyon, ug ang mga lumulupyo magkugi aron sa pagtukod ug sa pagmentinar sa mga atabay.

Gikan sa usa ka dapit diin sila nanukad sa mainland, upat ka mga dump truck sa graba, 300 ka mga bag nga semento, duha ka karga sa balas, kabilya, ug hinimo daan nga hulmahan sa semento gidala ngadto sa mga isla. Ang mga suplay dayon gidala tabok sa isla pinaagi sa pagpas-an o gamit ang kariton. Pipila ka mga miyembro sa Simbahan gikan sa Quelimane, Mozambique, mipuyo didto sa isla sulod sa tulo ka bulan aron motabang sa pagtudlo ug sa pagtukod.

Ang mga atabay gidesinyo nga adunay kaagian ang tubig sa ulan, nga makawagtang sa pagkahugaw. Sa pipila ka mga komunidad, ang mga lumulupyo mihimo og mga koral nga kahoy ug bika nga mga agianan palibut sa mga atabay, naggamit sa mga bika nga ila mismong nakat-unan sa paghimo gikan sa mga materyal nga gidonar sa Simbahan.

Sa opisyal nga mga seremonya, ang pagpanag-iya sa mga atabay gitugyan ngadto sa mga tawo sa matag balangay. Pipila ka mga lumulupyo kinsa nakatrabaho sa mga atabay mipahayag og pasalamat nga ang ilang nakat-unan nga bag-ong kahanas—paghimo og mga bika, pagtrabaho gamit ang semento ug lig-unon kini gamit sa asero, ug sa paggamit sa mga himan—makatabang kanila nga makakita og dugang nga mga trabaho. Ang uban mipahayag og pasalamat alang sa oportunidad sa pagkat-on og mga kahanas sa pagpangulo.

Human sa sunod ting-ulan, walay nataho nga mga sakit tungod sa tubig diha sa mga balangay nga dunay atabay.

Sumala sa World Health Organization, kapin sa usa ka bilyon ka tawo sa tibuok kalibutan walay makuhaan og limpyo nga tubig. Salamat sa proyekto sa limpyo nga tubig sa Simbahan, kana nga gidaghanon naminusan pinaagi sa usa ka proseso nga naglakip sa mga miyembro sa komunidad sa pagplano ug pag-implementar sa mga proyekto, paghatag og trabaho aron matukod ang gikinahanglan nga mga pasilidad, pagdawat og pagbansay, ug pagmentinar sa nakompleto nga mga kapanguhaan.

Agig dugang sa mga proyekto sa limpyo nga tubig sa tibuok Africa, ang Simbahan nagpasiugda og proyekto sa limpyo nga tubig sa Asia, Central America, Eastern Europe, India, Indonesia, mga Isla sa Pasipiko, South America, Southeast Asia, ug uban pang mga dapit sa tibuok kalibutan.