Elder Hugo E. Martinez

Ikaduha nga Korum sa Seventy

Niadtong 1982, si Elder Hugo E. Martinez ug ang iyang asawa, si Sister Nuria Alvarez de Martinez, pareho nga nagbansay sa ilang trabaho sa pagkadoktor didto sa Mississippi, USA, dihang sa wala dahuma dunay nanuktok sa atubangan nilang pultahan.

Didto anaa ang duha ka Mormon nga mga misyonaryo nga nagbarug.

“Giabli namo ang among balay alang kanila, apan kami walay nahibaloan bahin sa Ang Simbahan ni Jesukristo sa mga Santos sa Ulahing mga Adlaw. Wala gani kami masayud bahin sa Mormon Tabernacle Choir,” miingon si Elder Martinez, nga nagpahiyum.

Sa gihapon, ang mga leksyon sa ebanghelyo nga gipakigbahin sa mga elder diha-diha dayon mitandog sa bag-ong magtiayon. Sa wala madugay gidawat nila ang pagdapit sa mga misyonaryo nga magpabunyag.

“Ug wala gayud mi magmahay.”

Niadtong Abril 5, 2014, si Elder Martinez gitawag ngadto sa Ikaduhang Korum sa Seventy, nahimong una nga General Authority nga taga-Caribbean. Masabut nga Siya “nabug-atan” sa iyang bag-ong buluhaton.

“Apan dayon ang usa ka maanindot nga pagbati sa kalinaw miabut kanako ug mipahibalo nga ang Ginoo ra ang bahala,” miingon siya.

Usa ka tuig ug usa ka bulan human sa ilang bunyag, si Hugo ug Nuria Martinez na-sealed sa Templo sa Salt Lake niadtong Oktubre 3, 1983. Mga ginikanan sila sa lima ka anak ug adunay lima ka apo nga babaye.

Si Elder Martinez natawo niadtong Enero 10, 1957, sa Mayagüez, Puerto Rico, kang Hugo E. Martinez Sandin ug Daly Morales-Alamo de Martinez. Samtang siya batan-on pa, gipili niya nga sundon ang propesyonal nga dalan sa iyang amahan ug mahimong usa ka doktor. Siya nakadawat sa iyang medical degree gikan sa Unibersidad sa Puerto Rico (1981) ug nakakompleto sa iyang propesyon sa Unibersidad sa Mississippi (1984). Gigamit niya ang iyang propesyon hangtud sa iyang pagretiro niadtong 2004.

Sa mubong panahon human sa iyang bunyag, gitawag siya nga mahimong usa ka magtutudlo sa Sunday School sa kabatan-onan. Siya sa wala madugay miserbisyo isip usa ka bishop, magtatambag sa kapangulohan sa stake, presidente sa district, ug magtatambag sa kapangulohan sa Puerto Rico San Juan Mission. Siya nangulo usab sa Guatemala Guatemala City Central Mission ug nagserbisyo isip Area Seventy sa dihang siya gitawag nga mahimong usa ka General Authority.