Devin G. Durrant

Tokoni Ua ʻi he Kau Palesitenisī Lahi ʻo e Lautohi Faka-Sāpaté

ʻI he taimi ne ui ai ʻa Tēvini G. Tulani ko e tokoni ua ʻi he kau palesitenisī lahi ʻo e Lautohi faka-Sāpaté, ʻe lava pē ke manatu e tokolahi ʻo e kāingalotu ʻo e Siasí ki hono ngaahi ʻaho ʻiloa ʻi heʻene kei tui e falani pasiketipolo ʻo e ʻUnivēsiti Pilikihami ʻIongí.

Ko e moʻoni kuo hoko e sipotí ko ha konga mahuʻinga ʻi he moʻui ʻa Palesiteni Tulani. Naʻá ne tuku ha vahaʻataimi ke feʻauhi ʻi he NBA mo e kau vaʻinga lelei taha ʻi he ʻIunaiteti Siteití. Ka kuó ne mahulu ange ʻi ha tokotaha sipoti lelei pē: naʻá ne hoko ko ha faifekau ʻi Metuliti ʻi Sipeiní, ko ha husepāniti, tamai, kui tangata, tokotaha faʻu tohi, tangata pisinisi, mēmipa faivelenga mo e palesiteni ʻo e Misiona Tekisisi Tālasí ʻi he taʻu ʻe ua mo e konga kuohilí.

ʻOku pehē ʻe Palesiteni Tulani ʻa ia ne fāʻeleʻi ʻi Pilikihami Siti, ʻIutā, ʻi he ʻaho 20 ʻo ʻOkatopa, 1960, naʻe hoko ʻa hono ʻapi ne tupu aí ko ha konga mahuʻinga ʻo hono teuteuʻi ia ki he fatongia takitaha ko ia ʻo e moʻuí. Naʻe hoko ʻene ongomātuʻá, ʻa Siaosi mo Melolini Tulani ko ha ongo faiako tuʻukimuʻa.

“Ko e moʻoní, naʻá na faiako ʻi heʻena leá—ka ko e moʻoni, ko e ngaahi akonaki maʻongoʻonga lahi naʻá ku maʻu ʻi ʻapí naʻá ku mamata ʻokú na moʻui ʻaki kinautolu.”

ʻOku ʻiloʻi lelei ʻe Palesiteni Tulani mo hono uaifi ko Suli Mini Tulaní, ʻa hono mahuʻinga ʻo e kau mālohi ʻi hono teuteuʻi ʻo e kau faifekau he kahaʻú.

“ʻOku akoʻi lelei e [kau faifekau ʻo e kahaʻú] ʻe heʻenau mātuʻá ʻi honau ʻapí pea ʻe heʻenau kau faiako ʻi he Siasí pea ʻi he polokalama lelei ʻo e seminelí mo e ʻinisititiutí.”

Naʻá ne toe pehē ʻoku lava ʻe he polokalama Lautohi Faka-Sāpaté ʻa e kau faiakó mo e kau ako ʻi he taʻu kehekehé “ke faiako ʻi he founga ʻa e Fakamoʻuí.”

Ne mali ʻa Palesiteni mo Sisitā Tulani ʻi he Temipale Sōlekí ʻi he ʻaho 23 ʻo ʻEpeleli 1983, pea ko e mātuʻa kinaua ki ha fānau ʻe toko ono mo e makapuna ʻe toko ono.

Kimuʻa pea ui ia ko ha palesiteni fakamisioná, naʻá ne hoko ko ha pīsope, tokoni ʻi he kau palesitenisī fakasiteikí, mēmipa ʻo e kau palesitenisī ʻo e Lautohi faka-Sāpaté, mo ha faiako ʻinisititiuti.

Naʻá ne maʻu ha mataʻitohí ʻi he ʻAko ki ʻAmeliká (American Studies) mei he ʻUnivēsiti Pilikihami ʻIongí mo hono MBA mei he ʻUnivēsiti ʻo ʻIutaá. ʻOku ʻi ai haʻane kautaha fakatau kelekele.