Toe Fakaava e Senitā Takimamata ʻi he Temipale Mekisikou Sití

ʻI he māhina hili hono toe fakaavá, ne ʻaʻahi ai ha kau ʻaʻahi ʻe toko 30,000 ki he Senitā Takimamata ʻo e Temipale Mekisikou Sití, ʻa ia ne fakaleleiʻi mo fakalahi ʻi ha taʻu ʻe ua. ʻOku ʻi he lea faka-Sipeiní ʻa e ngaahi fakaʻaliʻalí kotoa pea kau ai e mītia totonu ne faʻufaʻu pē maʻá e kau Mekisikoú pē. Ko e fakalelei foki ko ʻení ko e ʻuluaki fuofua senitā takimamata foki ʻeni ke fakakau ai ha feituʻu ke fai ai ha fakaʻaliʻali ki hono akoʻi ʻo e ngaahi tefitoʻi moʻoni ʻo e ongoongoleleí ki he fānaú.

Ko e senitā takimamata ko ʻení ko e fika tolu lahi taha ia ʻi ha fale pehē ʻe 17, ko e lahi taha ʻo kinautolú ʻoku nau ofi ki ha temipale pe ha feituʻu fakahisitōlia ʻo e Siasí. ʻOku lolotonga langa ha senitā takimamata ʻo ofi ki he ngaahi temipale kuo langa ʻi Loma, ʻĪtali, mo e ngaahi senitā ʻi ʻIngilani, Nuʻu Sila, Hauaiʻi, pea ʻi he ngaahi siteiti ʻe hiva ʻo e U.S. ʻOku fakataumuʻa e ngaahi senitaá ke talitali lelei e Kāingalotu mālohi pe māmālohí pea pehē ki he niʻihi ʻo e ngaahi tui fakalotu kehé, ʻo ʻikai ngata pē ʻi hono ʻai ke ʻilo e kakaí ki he Siasí ka ke tokoniʻi foki ke mahino kiate kinautolu ʻa ʻene tuí mo e ueʻi fakalaumālie ha holi ke ako lahi ange ki he Fakamoʻuí pea mo hono toe Fakafoki mai ʻo e ongoongoleleí. ʻOku nau toe ʻomi foki ha ngaahi pōpoaki ke fakamālohia e fāmilí.

ʻOku hoko ʻa Mekisikou ko ha fakamaʻunga ʻi he Siasí, ʻoku ʻi ai ha kāingalotu ʻe toko 1.2 miliona tupu, ngaahi siteiki ʻe 200 tupu mo ha temipale ʻe 12.