Tad R. Callister

Palesiteni Lahi ‘o e Lautohi Faka-Sāpaté

ʻI he ngaahi taʻu lahi kimuʻa hono uiuiʻi ko e palesiteni lahi ʻo e Lautohi faka-Sāpaté, ne fakahoko ʻe he Lautohi Faka-Sāpaté ha fatongia mahuʻinga ʻi he moʻui ʻa Teti R. Kalisitā.

Lolotonga e hoko ʻa Misa Kalisitā ko e palesiteni ʻo e Lautohi faka-Sāpaté ʻi ha uooti ʻi he ʻUnivēsiti Pilikihami ʻIongí, naʻá ne maheni ai mo hono uaifi ko Katalina L. Sapoliti, peá na mali ʻi he ʻaho 20 ʻo Tīsema, 1968, ʻi he Temipale Losi ʻEniselisí.

Ko e mātuʻa kinaua ki ha fānau fefine ʻe toko ua mo ha fānau tangata ʻe toko fā; ʻoku ʻi ai foki haʻana makapuná 24. ʻOku pehē ʻe Misa Kalisitā, “ʻOku lahi e ngaahi meʻa lelei ʻoku hoko ʻi hoʻo hoko ko e palesiteni Lautohi Faka-Sāpaté.”

Ne fāʻeleʻi ʻi he ʻaho 17 ʻo Tīsema 1945, ʻi he Keleniteila, Kalefōnia kia Liti ʻEtingitoni mo Nōline Kalisitā, pea ʻokú ne pehē—ʻo hangē ko Nīfaí—ne fāʻeleʻi ia “ʻi he ongo mātuʻa lelei.”

ʻOku pehē ʻe Misa Kalisitā, “Ne hoko ʻeku tamaí ko ʻeku pīsope ʻi heʻeku tupu hake. “Naʻá ne faʻa toʻotoʻo ha fanga kiʻi kaati pea naʻá ne ako maʻuloto e ngaahi foʻi lea mo e potufolofola mo Seikisipia.”

Naʻe tulifua ʻa Misa Kalisitā ki ha ngāue maʻuʻanga moʻui ʻi he laó ʻo hangē ko ʻene tamaí. Hili ʻene ʻosi ʻi he tauhitohí mei he ʻUnivēsiti Pilikihami ʻIongí, naʻá ne ʻalu ki he ʻapiako laó ʻi he ʻUnivēsiti ʻo Kalefōnia, Losi ʻEniselisí, pea maʻu ha mataʻitohi M.A. ʻi he lao tukuhau vāhengá (tax law) mei he ʻUnivēsiti ʻo Niu ʻIoké. Naʻá ne ngāue ko ha loea ʻi he kautaha lao Kalisitā & Kalisitaá.

ʻI he taimi naʻe uiuiʻi ai iá, ne toki tukuange ai ʻa Misa Kalisitā mei hono uiuiʻi ʻi he Kau Palesitenisī ʻo e Kau Fitungofulú, pea ʻi he Kōlomu hono Ua ʻo e Kau Fitungofulú, ʻa ia ne ngāue ai talu mei he 2008.

Kimuʻa aí, naʻá ne hoko ko ha palesiteni ʻo e Misiona Kānata Tolonitō Hahaké, Fitungofulu Fakaʻēlia, fakafofonga fakavahelahi, palesiteni fakasiteiki, pīsope, palesiteni misiona fakasiteiki, palesiteni ʻo e kōlomu ʻo e kaumātuʻá pea ko ha faifekau ʻi heʻene kei talavoú ʻi he Misiona ʻo e Ngaahi Siteiti Fakahahake ʻo e ʻAtalanitikí.

ʻI heʻene fakamatala ki he ngaahi liliu ʻe hoko ʻi he nāunau fakalēsoni e Lautohi Faka-Sāpaté ʻa e kakai lalahí, “Ko e moʻoni ʻoku mahuʻinga e nāunau fakalēsoní, ka ʻoku ʻikai mahuʻinga ange ia ʻi he founga faiako ʻa e kakaí. Ko e meʻa mahuʻinga tahá ke tau faiako ʻi he founga ʻa e Fakamoʻuí, ke tau faiako ʻaki e Laumālié ʻoku tau akoʻi ʻi he founga ʻa e Fakamoʻuí, ke tau faiako ʻaki e Laumālié, pea tau akoʻi ke fakaului.”