ʻEletā Jörg Klebingat

Kōlomu ʻUluaki ʻo e Kau Fitungofulú

Ne moʻui vilitaki ʻa ʻEletā Siaosi Kelingipati. ʻOkú ne tui ki he talangofuá, tauhi e ngaahi fekaú mo muimui ki he ueʻi ʻa e Laumālié.

Ne fāʻeleʻi ia ʻi he ʻaho 19 ʻo Tīsema, 1967, kia Kalauisi-Pita mo Tōlisi ʻEleki Kelingipati, ne tupu hake ʻa ʻEletā Kelingipati ʻi Siueipulukeni ʻi Siamane, ʻo ʻikai ke ne maʻu e ivi tākiekina ʻo e ongoongoleleí. ʻI heʻene taʻu hongofulu tupú, naʻá ne fetaulaki ai mo ha mēmipa ʻo e Siasí ʻi ha koniseti hiva peá na hoko ko ha kaungāmeʻa.

ʻOkú ne manatu ʻo pehē, “ʻI he taimi ne u ʻaʻahi ai ki hoku kaungāmeʻa foʻoú, ne u tanganeʻia ʻi hono fāmilí.” “Naʻá ku ongoʻi e Laumālié ʻi hono ʻapí peá u fie ʻalu ki he lotú.”

Naʻá ne fuofua fanongo kau ki he Tohi ʻa Molomoná ʻi he fuofua fakataha ko ia e Siasí. Naʻe foaki ange ʻe hono kaungāmeʻá ha tatau mo ʻene fakamoʻoní naʻe moʻoni ia, pea ne mavahe ʻa ʻEletā Kilingipati mei he fakatahá mo ha fakapapau ke ʻiloʻi ʻiate ia pē.

Naʻe pehē ʻe ʻEletā Kilingipati, “Ne u ʻi ha feituʻu ʻi he 1 Nīfaí ʻi he taimi ne maʻu ai ʻeku fakamoʻoni ʻoku moʻoni e tohí.” “Ne hoko ʻeku maʻu ha fakamoʻoni ki he Palōfita ko Siosefa Sāmitá ko ha momeniti mahuʻinga kiate au. ʻI heʻeku ngāue fakafaifekaú, naʻá ku kole maʻu pē ki hoku hoá pe ʻe lava ke u fakamatala ha konga ʻo ʻeku talanoá.”

Kimuʻa ʻi heʻene ngāue fakafaifekau taimi kakato ki he Misiona Kololato Tenivaá, ne ngāue ʻa ʻEletā Kilingipati ʻi he kau tau Siamané ʻi ha māhina ʻe 18. Naʻe silaʻi ia kia Sūlia Polotolaki ʻi he Temipale Sōlekí ʻi he ʻaho 21 ʻo Tīsema, 1992. ʻOku ʻi ai haʻana fānau ʻe toko tolu.

Naʻe maʻu ʻe ʻEletā Kilingipati ha mataʻitohi ʻi he ako ki he lea faka-Lūsiá mei he Kolisi Likí pea kimui ange ai ha mataʻitohi M.A. ʻi hono fokotuʻutuʻu e ʻulungāngá mei he ʻUnivēsiti Pilikihami ʻIongí. Naʻá ne ngāue ko ha faifaleʻi pule ʻi he pisinisí maʻá e Price Waterhouse mo e Arthur Andersen pea ʻi ha ngaahi fatongia maʻá e Siasí.

Kimuʻa hono uiuiʻí ne hoko ʻa ʻEletā Kilingipati ko ha fakafofonga fakasiteiki ʻo e kakai lalahi taautahá, palesiteni ʻo e kōlomu ʻo e kaumātuʻá, palesiteni ʻo e Kau Talavoú, aleaʻanga māʻolunga, palesiteni fakakolo, mo ha pīsope. ʻE ʻosi ʻene ngāue ko e palesiteni ʻo e Misiona ʻIukuleini Kieví ʻi Sune 2014. Naʻe hikinimaʻi ia ko ha mēmipa ʻo e Kōlomu ʻUluaki ʻo e Kau Fitungofulú ʻi he ʻaho 5 ʻo ʻEpeleli 2014.