ʻEletā Chi Hong (Sam) Wong
Kōlomu ʻUluaki ʻo e Kau Fitungofulú
ʻI heʻene hoko ko ha tokotaha papi ului foʻoú mo ha tokotaha ako ʻi he ʻUnivēsiti Pilikihami ʻIongi-Hauaiʻí, ne hulu atu e meʻa ne maʻu ʻe ʻEletā Sī Hongi (Samu) Uongí ʻi he akó—naʻá ne maʻu ha ʻilo pau ʻoku ʻi ai ha ʻOtua ʻokú Ne ʻafioʻi e “fakaikiiki ʻo ʻetau moʻuí.”
Naʻe fāʻeleʻi ia ʻi he ʻaho 25 ʻo Mē, 1962, ʻi Hongo Kongo, Siaina, kia Ngani Kani mo Feti Uongi, ne tupu hake ʻa ʻEletā Uongí ʻi ha fānau ʻe toko fitu ʻi ha nofoʻanga totongi siʻisiʻi.
Naʻá ne fetaulaki he ngāué mo Kalo Liu, pea naʻá ne fakafeʻiloaki ia ki he ongoongoleleí. Naʻe papitaiso e fiefanongo kei talavoú ni ʻi he ʻaho 14 ʻo Fēpuelí, 1982.
Hili ha taʻu ʻe taha mei ai, naʻá ne mali mo Kalo ʻi he ʻaho 9 ʻo Siulai 1983. Naʻá na hiki ki Laʻie, Hauaiʻi, USA, ke ne lava ʻo ʻalu ki he akó. Koeʻuhí naʻá ne ʻi ai ʻi ha visa ako, ne ngāue pē ʻa ʻEletā Uongi ʻi ha houa ʻe 20 he uike. Naʻa ne fakamatala ki he meʻa ne fie maʻu ke tauhi hono fāmilí ʻo pehē, “Naʻe pau ke mau ngāueʻi ʻemau tuí mo lotu.”
Naʻá ne ngāue mālohi ke maʻu ha sikolasipi, pea naʻá ne toʻo e ngaahi kalasi lahi taha ne fakangofua ʻe he ʻunivēsití. ʻOkú ne manatu ʻo pehe, “Naʻe ʻikai faingofua.” “ʻI heʻemau maʻu e aʻusia ko iá naʻa mau ʻiloʻi ʻe lava ke mau falala maʻu pē ki he mālohi ʻo e langí.”
Naʻe silaʻi e ongomātuʻa Uongí ʻi he Temipale Laʻie Hauaiʻí ʻi he ʻaho 9 ʻo ʻAokosi, 1984, pea naʻe fāʻeleʻi ʻa ʻena fuofua pēpē; pea ne faifai pea ʻi ai ha toe fānau ʻe toko tolu ʻi he fāmilí. Naʻe pehē ʻe ʻEletā Uongi, “Ko ha ngaahi taʻu makehe, mo toputapu moʻoni ia.”
Naʻe maʻu e mataʻitohi BA ʻo ʻEletā Uongí ʻi he saienisí ʻi he tauhitohí mo ha mataʻitohi hono ua ʻi he saienisi ʻo e komipiutá; peá ne ongoʻi e fie maʻu “ke toe foki ki Hongo Kongo ke ngāue.”
Naʻá ne maʻu kimui ha MBA mei he ʻUnivēsiti ʻAtā ʻo Hongo Kongó. Ne fokotuʻu ʻe Eletā Uongi ha pisinisi mo ha kautaha fai faleʻi pea ngāue ʻi ha kautaha naʻa nau siviʻi e nāunaú ʻo ne kamata ngāue ai ko ha tokotaha tauhitohi pule pea naʻá ne mavahe mei he kautahá ʻokú ne hoko ko e tokoni talēkita pulé.
Kimuʻa ʻi hono hikinimaʻi ia ʻi he ʻaho 5 ʻo ʻEpeleli 2014, ko ha mēmipa ʻo e Kōlomu ʻUluaki ʻo e Kau Fitungofulú, naʻá ne hoko ko ha pīsope, palesiteni fakasiteiki, mo ha Fitungofulu Fakaʻēlia.