Elder Larry S. Kacher

Ikaduha nga Korum sa Seventy

Human sa daghang mga pag-aghat panahon sa iyang pagka-young adult, si Elder Larry S. Kacher misugod sa pag-ila sa mas dako nga gahum nga naggiya kaniya sa iyang kinabuhi. Sa edad nga 19, ang pagkasensitibo ngadto sa Espiritu migiya kaniya sa ebanghelyo ni Jesukristo—usa ka kausaban nga nakahimo sa tanang kalainan.

Siya natawo niadtong Pebrero 12, 1952, ikaduha gikan sa kinamagulangan sa lima ka mga bata nga natawo nila ni Albert ug Elaine Kacher; nagdako siya sa Bloomington, Minnesota, USA.

Human sa high school miadto siya sa Uropa aron mag-ski, ug human sa sobra unom ka bulan didto iyang gibati nga kinahanglan niya nga mouli. Sa nakauli na, iyang gibati nga daw kinahanglan niya nga moadto og laing lugar apan wala masayud kon asa. Usa ka higala sa pagkabata nagplano nga mobalhin ngadto sa Utah, ug si Elder Kacher mihukom sa pagbalhin uban kaniya. Samtang didto sa Utah, si Elder Kacher mi-enrol sa Brigham Young University, nakakat-on kabahin sa Simbahan, ug nabunyagan.

“Samtang ang mga misyonaryo mitudlo kanamo, mibati ko nga kadto tinuod,” siya miingon. “Samtang ako nag-ampo, akong gibati nga ang Simbahan tinuod.”

Siya mihukom nga moserbisyo og misyon ug gitawag ngadto sa Tahiti Papeete Mission niadtong 1973. Pag-uli, siya mibalik og eskwela sa BYU, diin iyang nahimamat si Pauline Miller. Sila naminyo sa Templo sa Manti Utah niadtong Oktubre 29, 1976, ug mga ginikanan sa unom ka anak ug mga apohan sa 11 ka mga apo.

Si Elder Kacher nakaangkon og bachelor’s degree sa psychology ug master’s degree sa organizational behavior—kini parehong gikan sa BYU. Ang iyang trabaho naglakip sa pagkonsulta sa dagko nga mga kompanya sa nasud ug sa tibuok kalibutan.

Sa wala pa siya mapaluyohi niadtong Abril 5, 2014, isip sakop sa Ikaduhang Korum sa Seventy, si Elder Kacher nagserbisyo isip presidente sa branch, presidente sa elders quorum, bishop, ug magtatambag sa presidente sa stake. Siya nangulo sa Switzerland Geneva Mission gikan 2000 hangtud 2003. Pipila ka tuig human sa iyang pagbalik gikan sa Switzerland, ang iyang trabaho midala kaniya ngadto sa Abu Dhabi, United Arab Emirates, diin siya gitawag sa pagserbisyo isip pinakaunang Area Seventy sa Middle East.