Gihatagan og Gibug-aton ang Paglambo sa mga Templo, Bag-ong mga Opisyales Gipaluyohan atol sa Kinatibuk-ang Komperensya
Sa nanglabay nga unom ka bulan, “ang buhat sa Simbahan nagpadayon sa walay pagkabalda,” miingon si Presidente Thomas S. Monson sa iyang pangbukas nga pakigpulong sa Ika-184 nga Tinuig nga Kinatibuk-ang Komperensya.
Naghinumdom sa pagpahinungod sa Gilbert Arizona Temple niadtong Marso 2, 2014, naghinam-himan sa umaabut nga pagpahinungod sa Fort Lauderdale Florida Temple, ug nagpaabut nga mahuman ug mapahinungod ang daghang templo sa lain-laing bahin sa kalibutan inigka 2014 ug 2015, gihatagan og gibug-aton ni Presidente Monson nga kon ang tanang gipahibalo na nga mga templo makompleto, ang Simbahan adunay 170 ka mga templo sa tibuok kalibutan.
“Bisan tuod nga kami kasamtangang nag-focus sa among mga paningkamot sa paghuman sa gipahibalo sa una nga mga templo ug dili pa magpahibalo og bisan unsa nga templo sa umaabut,” siya miingon, “magpadayon kami sa proseso sa pagtino sa mga panginahanglan ug pagpangita og mga luna alang sa umaabut nga mga templo. Ang mga pagpahibalo pagahimoon dayon sa umaabut nga mga kinatibuk-ang komperensya. Mga katawhan kita nga tigtukod ug tigtambungan og templo.”
Atol sa komperensya, usa ka bag-ong sakop sa Kapangulohan sa Seventy, upat ka bag-ong mga General Authority, bag-o nga kinatibuk-ang kapangulohan sa Sunday School, ug 42 ka mga Area Seventy ang gipaluyohan.
Si Elder Lynn G. Robbins gitawag ngadto sa Kapangulohan sa Seventy.
Sila Elder Jörg Klebingat sa Kyiv, Ukraine, ug Elder Chi Hong (Sam) Wong sa Hong Kong, China, gipaluyohan nga moserbisyo sa Unang Korum sa Seventy. Sila Elder Larry S. Kacher sa Midway, Utah, ug Elder Hugo E. Martinez sa Arecibo, Puerto Rico, gipaluyohan isip mga sakop sa Ikaduhang Korum sa Seventy.
Si Elder Tad R. Callister, kinsa nagserbisyo sa Kapangulohan sa Seventy ug isip sakop sa Ikaduhang Korum sa Seventy, gipaluyohan isip kinatibuk-ang presidente sa Sunday School, uban ni John S. Tanner isip unang magtatambag ug Devin G. Durrant isip ikaduhang magtatambag.
Tan-awa ang kompleto nga lista sa mga gipaluyohan ug gipang-release sa mga pahina 26–27, ug pangitaa ang mga biography nila ni Elder Robbins, bag-ong natawag nga mga Seventy, ug kinatibuk-ang kapangulohan sa Sunday School sugod sa pahina 141.
Usa ka semana sa wala pa ang kinatibuk-ang komperensya, ang unang kinatibuk-ang miting sa mga babaye—para sa tanang mga babaye, batan-ong mga babaye, ug mga babaye nga otso anyos ug mas magulang pa—gipahigayon sa Conference Center. Kini nga miting mopuli sa miaging kinatibuk-ang miting sa Relief Society ug sa Young Women. Tanang mga mensahe gikan sa miting sa kababayen-an makita sa mga pahina 116–28.
Sa wala pa ang komperensya, ang general board sa Young Women giorganisar og usab, uban sa mga sister nga unang gitawag gikan sa Peru; South Africa; Japan; Brazil; ug Brooklyn, New York, USA isip dugang niadtong anaa sa Siyudad sa Salt Lake. Basaha ang mga biography ug tan-awa ang mga litrato sa lds.org/callings/young-women.
“Ang Manluluwas midala dinhi sa yuta og usa ka mensahe sa gugma ug pakigdait sa tanang mga lalaki ug mga babaye,” miingon si Presidente Monson sa pagtapos sa kinatibuk-ang komperensya. “Unta atong ipadayon ang pagsunod sa Iyang ehemplo.” Iyang gisiguro sa mga miyembro sa Simbahan ug sa uban nga naminaw nga ang “Langitnong Amahan mahunahunaon kanato. Siya mogiya ug mopanalangin kanato samtang kita mopakita sa atong pagtuo ug pagsalig Kaniya.”