ʻOku Totonu Ke Muimui Ki he Sīpinga ʻa Kalaisí ʻi he Faiako he Siasí
Hili e konifelenisi lahí, ne pehē ʻe Teti R. Kalisitā ko e palesiteni lahi foʻou ʻo e Lautohi Faka-Sāpaté, “ʻOku mau feinga ke molomolo-muivaʻe ki he founga faiako ʻa e Fakamoʻuí .
Naʻá ne pehē, ʻoku ʻuhinga ia ki hono fai ha ngaahi fehuʻi fakalaumālie ʻe tokoniʻi e kakaí ke nau ului. Ko e taumuʻá “ke tokoni ke mahino kiate kinautolu pea nau ongoʻi e Laumālie ʻo e ongoongoleleí ʻi heʻenau moʻuí.”
Naʻá ne pehē ʻokú ne saiʻia he Haʻu, ʻo Muimui ʻIate Au, ʻa e nāunau fakalēsoni ʻi he ʻInitanetí maʻá e toʻu tupú ʻoku kau ai e lea fakamuimuitaha mei he konifelenisi lahí pea pehē ki he mītia ne faʻu ʻe he Siasí. Kuo fetongi ʻe he kau maí ʻa e fakamatalá, peá ne pehē “ʻoku ʻi ai ha liliu pau mei hono akoʻi pē ʻo ha lēsoni ki hono feingaʻi ke fakafeʻungaʻi ia ki he fie maʻu e kau ako he kalasí.”
Naʻá ne toe pehē ʻoku tokoni e Haʻu, ʻo Muimui ʻIate Au ke fakaului kae ʻikai ko hono ʻoatu pē ha fakamatala. “ʻOku ou tui te tau ohi hake ha toʻu tangata ʻo e toʻu tupú ko ha kau faiako mo e mātuʻa lelei taha ʻi he māmaní he ʻoku nau maʻu e aʻusia ko ʻení ʻi heʻenau ʻi he toʻu tupú pea ʻikai tatali kae ʻoua [kuo nau] hoko ko ha kakai lalahi … ke ʻiloʻi hono ʻaonga ʻo e faiako leleí mo hono maʻu e mahinó.”
Naʻe pehē ʻe Misa Kalisitā ko Sīsū Kalaisi ʻa e Faiako Tuʻukimuʻá, pea ʻoku totonu ke ʻomi ʻe heʻetau faiako ʻi he Siasí ʻa e kakaí kia Kalaisi. ʻI hono fakamamafaʻi ʻa e fie maʻu ke akoʻi mahino mo pau ʻa e tokāteliné, naʻá ne pehē ko e “taimi pē ʻoku tau feinga ai ke muimui ki he Fakamoʻuí, ʻoku tau ʻi he tuʻunga lelei.”