Mga Website nga Naghisgot og Serbisyo, Hugot nga Pagtuo

Ang mga Santos sa Ulahing mga Adlaw nagserbisyo ug nagpakigbahin sa ilang tinuohan sa tibuok kalibutan. Ang mga asoy mahitungod sa maong mga kalihokan makita sa mga country newsroom website, diin kanunay gi-summarize sa newsroom.lds.org, ang opisyal nga kapanguhaan sa Simbahan alang sa mga media, impluwensyadong mga lider, ug sa publiko.

Sa dapit sa Pasipiko, ang mga Santos sa Ulahing mga Adlaw gisuplayan og tubig, pagkaon, mga chain saw, mga filter sa tubig, mga generator, ug ubang mga suplay sa emerhensya aron sa pagtabang sa mga taga-Tonga pagkahuman sa kadaut panahon sa Tropical Cyclone Ian. Sa Samoa, ang kabatan-onan sa LDS miapil sa duha ka adlaw nga interdenominational nga kalihokan uban sa espirituhanong mga pagdasig, musika, sayaw ug mga sport.

Sa Brazil, ang mga miyembro sa Simbahan nga nanagsul-ob sa Mormon Helping Hands mitabang sa mga paningkamot sa pagpanglimpyo ug pag-apud-apod sa mga suplay ngadto sa mga kasilinganan ug negosyo nga nadaut tungod sa baha, nakapahimo nga daghan ang nawad-an og panimalay. Bisan asa, ang mga miyembro mitabang sa pag-apud-apod sa dihang ang Humanitarian Services sa Simbahan midonar sa 211 ka mga wheelchair ngadto sa mga indibidwal nga may espesyal nga panginahanglan. Ang padayon nga donasyon sa Brazil karon sumada na dul-an sa 700 ka mga wheelchair.

Sa Africa, ang nasyonal ug global nga mga organisasyon nagtambayayong uban sa LDS Charities, ang humanitarian nga buhatan sa Simbahan, sa unang nasyonal nga pangampanya sa pagwagtang sa tipdas ug rubella didto sa Ghana pinaagi sa pagpangbakuna sa mga bata hangtud sa edad nga 14. Sa Nigeria ug Ghana, ang Helping Hands day nakabenepisyo sa liboan ka mga tawo sa 100 ka mga komunidad samtang ang mga Santos sa Ulahing mga Adlaw sa tanang edad nagtinabangay sa pagtukod og mga taytayan, pagpananom og kahoy, pangguna, pagpintal sa mga estraktura, ug pagpanglimpyo ug pagpanindot sa kasilinganan. Sa Zimbabwe, sobra sa 60 ka kabatan-onan nga LDS miboluntaryo sa pagdonar og dugo. Ug sa South Africa, ang Santos sa Ulahing mga Adlaw nga si Nozibele Makanda, ang inahan sa unom ka anak, napili isip mayor sa Queenstown, usa ka siyudad nga may 200,000 ka tawo.

Sa Central America, labaw sa 500 ka kabatan-onan nga LDS sa Guatemala nakigtambayayong sa lokal nga gobyerno sa pagtanom sa 1,944 nga kahoy. Sa Costa Rica, mga meetinghouse sa LDS nahimong mga punduhanan sa koleksyon sa gatas, ug 370 ka mga boluntaryo sa Simbahan mitabang sa paghatud niini ngadto sa mga merkado nga miapil sa kalihokan sa pagsangkap alang niadtong nanginahanglan.

Ug sa Canada, ang mga Santos sa Ulahing mga Adlaw nakigtambayayong sa Christian-Jewish Dialogue of Montreal (Quebec) sa pag-andam og mga video sa interbyu sa dili ang hearing sa gobyerno mahitungod sa mga hiyas. Kadtong nainterbyu namulong nga mosuporta sa pasalig sa komunidad sa pagtahud, pagsabut, pagkamauyonon ug kagawasan sa relihiyon, naghatag og gibug-aton nga ang relihiyon nagpabilin nga importante sa kinabuhi sa daghan nga mga lungsuranon sa Quebec.

Alang sa usa ka lista sa mga website sa newsroom sa internasyonal nga mga nasud sa nagkalain-laing mga pinulongan, tan-awa sa mormonnewsroom.org/newsroom-country-sites.