Ko e Mahuʻinga—mo e Tāpuaki—ʻo e Tuʻunga Faka-ākongá
ʻAi ke mou toʻa. Moʻui faivelenga ʻaki e ongoongoleleí neongo kapau ʻoku ʻikai ʻaupito moʻui ʻaki ia ʻe he niʻihi ʻoku mou feohí.
Palesiteni Monisoni, ʻoku mau ʻofa atu kiate koe. Kuó ke foaki ho lotó mo hoʻo moʻuí ki he ui kotoa pē kuo fai atu ʻe he ʻEikí kiate koe, tautautefito ki he lakanga toputapu ʻokú ke maʻu he taimi ní. ʻOku fakamālō atu ʻa e Siasí ni kotoa koeʻuhí ko hoʻo ngāue taʻe-tūkuá pea mo hono māteakiʻi e fatongiá.
ʻOku ou pehē ki he taha kotoa, ʻi he tanganeʻia mo e fakalotolahi ʻe fie maʻu ke nau tuʻu maʻu ʻi he ngaahi ʻaho fakaʻosi ko ʻení, pea tautautefito ki he toʻu tupu ʻo e Siasí ʻo kapau ʻoku teʻeki ke ke fai ia, ʻe ʻi ai e ʻaho ʻe fie maʻu ai ke ke taukaveʻi hoʻo tuí pe mahalo ʻe aʻu ki haʻo katekina ha ngaohikovia fakataautaha koeʻuhí pē ko ha mēmipa koe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻE fie maʻu he taimi peheé ʻa e lototoʻá mo e fakaʻapaʻapá fakatouʻosi.
Hangē ko ʻení, naʻe faitohi mai kimuí ni ha faifekau fefine ʻo pehē: “Naʻá ku fakatokangaʻi mo hoku hoá ha tangata naʻe tangutu ʻi ha sea ʻi he loto koló ʻo maʻu meʻatokoni hoʻatā. ʻI heʻema ofi atú, naʻá ne hanga hake ʻo fakatokangaʻi homa pine fakafaifekaú. Naʻá ne puna ki ʻolunga mo ha mata faikehe, pea hiki hono nimá ke taaʻi au. Ne u kalofia ia, ka naʻá ne puʻaki kotoa ʻene maʻangá ʻiate au pea kamata ke kape mai ʻaki ha ngaahi lea taʻefeʻunga ʻaupito. Naʻá ma mavahe ʻo ʻikai foaki ha foʻi lea. Naʻá ku feinga ke tafi e meʻakaí mei hoku matá, ka ne u ongoʻi e tau ha falukunga pateta oʻi ʻi hoku muiʻi ʻulú. ʻOku faingataʻa he taimi ʻe niʻihi ke hoko ko ha faifekau koeʻuhí ko e hoko ha meʻa pehē, naʻá ku loto ke u foki ʻo kolaʻi ʻa e kiʻi motuʻa ko ʻiá, ʻo pehē ange, ‘KĀTAKI,’ Ka naʻe ʻikai ke u fai ia.”
ʻOku ou pehē ki he kau faifekau māteaki ko ʻení, ʻe fānau ʻofeina, kuo mou laka atu ʻi hoʻomou founga fakatōkilalo pē ʻamoutolu ki he siakale ʻo e kau fefine mo e kau tangata mātuʻaki makehe, ʻo hangē ko e lau ʻa e palōfita ʻo e Tohi ʻa Molomoná ko Sēkopé, “[kuo nau] fakakaukau lahi ki he pekia ʻa Kalaisí, mo fua hono kolosí pea kātakiʻi ʻa e manuki ʻa māmaní.”1
Ko e moʻoni naʻe tohi ʻe he tokoua ʻo Sēkope ko Nīfaí ʻo kau kia Sīsū tonu ʻo pehē: “Pea ko e māmaní, ko e meʻa ʻi heʻenau angahalá, te nau fakamāuʻi ia ko e meʻanoa pē; ko ia, te nau tauteaʻi ia, pea te Ne kātakiʻi ia; pea te nau taaʻi Ia, pea te Ne kātakiʻi ia. ʻIo, te nau ʻanuhia Ia, pea te Ne kātakiʻi ia, koeʻuhí ko ʻEne ʻaloʻofa mo ʻEne kātaki fuoloa ki he fānau ʻa e tangatá.”2
Pea hangē ko e aʻusia ʻa e Fakamoʻuí, kuo ʻi ai ha hisitōlia lōloa ʻo hono fakasītuʻaʻí mo e totongi māʻolunga ne fai ʻe he kau palōfita mo e kau ʻaposetoló, kau faifekau mo e kāingalotu ʻi he toʻu tangata kotoa pē ʻa kinautolu naʻe feinga ke fakahoko e ui ʻa e ʻOtuá ke hiki hake fāmili ʻo e tangatá ki “ha hala ʻoku lelei lahí.”3
ʻOku fehuʻi ʻe he taha naʻá ne hiki e tohi Hepeluú, “Pea ko e hā mo ʻeku lea ʻe fai [kiate kinautolu]?”
“[ʻA kinautolu] naʻe … tāpuni ʻa e ngutu ʻo e fanga laioné,
“Fuʻifuʻi ʻa e kakaha ʻo e afí, pea hao ʻi he mata ʻo e heletaá, … loto toʻa ʻi he taú, pea nau tulia ʻa e matataú ke hola …
“[Mamata ki honau kau] maté kuo fokotuʻu moʻui [kae] fakamamahiʻi ʻa e niʻihi, …
“Pea … [mo e] ʻahiʻahi ʻo e ngaahi manuki mo e kauʻimaea, … ʻo e ngaahi haʻi mo e nofo fale fakapōpula:
“Naʻe tolongaki ʻaki ʻa e maka, … naʻe kilisi ʻo fahiua ʻa kinautolu, naʻe ʻahiʻahiʻi, naʻe tāmateʻi ʻaki ʻa e heletā: … naʻa nau ʻalu fano ʻi he kiliʻi sipi mo e kiliʻi kosi; kuo masiva, kuo mamahi, kuo ngaohi koviʻi;
“[ʻA kinautolu naʻe ʻikai taau mo māmani ke maʻú]: … naʻa nau ʻalu-fano ʻi he ngaahi toafá, mo e ngaahi moʻungá, pea ʻi he ngaahi ʻana mo e luo ʻo e kelekelé.”4
Naʻe tangi moʻoni ʻa e kau ʻāngelo ʻo e langí ʻi heʻenau lekooti ʻa e totongi mahuʻinga ʻo e tuʻunga fakaākongá ʻi ha māmani ʻoku faʻa angatuʻu ki he ngaahi fekau ʻa e ʻOtuá. Naʻe tutulu ʻa e Fakamoʻuí koeʻuhí ko kinautolu kuo taʻu ʻe laungeau honau fakafisingaʻi mo fakapōngi ʻi Heʻene ngāué. Pea ko ʻeni kuo fakafisingaʻi mo ʻamanaki ke fakapoongi.
Naʻe kalanga ʻa Sīsū, “ʻE Selusalema, Selusalema, ʻa koe ʻokú ke tāmateʻi ʻa e kau palōfitá, mo ke tolongaki ʻaki ʻa e maká ʻa kinautolu ʻoku fekau atu kiate koe, kuo liunga fiha ʻeku fie tānaki fakataha hoʻo fānaú, ʻo hangē ko e tānaki fakataha ʻe he motuʻa moá ʻene fānaú ʻi hono lalo kapakaú, ka naʻe ʻikai te mou loto ki ai!
“Vakai, kuo siʻaki homou falé kiate kimoutolu ke lala ʻaupito.”5
Pea ʻoku ʻi heni ha pōpoaki ki he talavou mo e finemui kotoa pē ʻi he Siasí ni. Mahalo te mou fifili pe ʻoku ʻi ai hano ʻaonga ke taukaveʻi lototoʻa e tuʻunga faka-angamaʻa ʻi he ako māʻolungá pe ko e ō ʻo ngāue fakafaifekau kae iku manukiʻi ai ʻa e tui ʻokú ke fakamahuʻingaʻi tahá pe fakafepakiʻi ha meʻa lahi ʻi ha sōsaieti ʻokú ne faʻa manukiʻi ʻi he taimi ʻe niʻihi ha moʻui līʻoa fakalotu. ʻIo, ʻoku ʻaonga, koeʻuhí he ko e tafaʻaki ʻe tahá ko e tuku hotau “ʻapi” kuo tuku kiate kitautolu kuo “liʻekina”—liʻekina fakafoʻituitui, liʻekina fakafāmili, liʻekina fakakaungāʻapi, mo ha ngaahi puleʻanga kuo liʻekina.
Ko ia, kuo tau maʻu ai ʻa e kavenga ʻa kinautolu ne ui ke ʻoatu ʻa e pōpoaki faka-mīsaiá. Makehe mei he akoʻí, fakalotolahiʻí, mo e fakaʻaiʻai atu ʻo e kakaí (ko e konga fakafiefia ia ʻo e tuʻunga fakaʻākongá), ʻi he taimi kotoa peé, ʻoku toe ui ʻa e kau talafekau tatau ko ʻení ke nau hohaʻa, fakatokanga, pea ko e taimi ʻe niʻihi ke tangi pē (ko e konga fakamamahi ia ʻo e tuʻunga fakaākongá). ʻOku nau ʻiloʻi lelei ko e hala ʻoku fakatau ki he fonua ʻo e talaʻofá “ʻoku mahutafea ʻi he huʻa huhú mo e honí”6 ʻoku lele ia ʻi he tafaʻaki ʻo e Moʻunga Sainai ʻoku fonu ai ʻa e “meʻa ke fakahoko” mo “ʻikai fakahokó.”7
Kae pangó he ko e kau talafekau kuo nau fakahā fakalangi e ngaahi fekau ʻa e ʻOtuá ʻoku ʻikai manakoa ange kinautolu he ʻahó ni ʻi he kuonga muʻá, ʻo hangē ko ia ʻe lava ke fakamoʻoniʻi ʻe he ongo faifekau fefine naʻe ʻanuhia mo tolo ʻaki e patetá. Ko e foʻi lea fehiʻá ko ha foʻi lea taʻefeʻunga, ka ʻoku ʻi ai ha niʻihi he ʻahó ni te nau lea fakataha mo e tokotaha kovi ko ʻĒhapí, “ʻOku ou fehiʻa [he palōfita ko Mikaiá]; he ʻoku ʻikai siʻi fakahā ʻe ia ha lelei kiate au, ka ko e [kikiteʻi ʻo e] kovi maʻu ai pē.”8 Ko e faʻahinga fehiʻa pehē ki he faitotonu ʻa ha palōfitá naʻe mole ai e moʻui ʻa ʻApinetaí. Hangē ko ʻene lea ki he Tuʻi ko Noá: “Ko e meʻa ʻi heʻeku tala kiate kimoutolu ʻa e moʻoní, ko ia ʻoku mou ʻita ai kiate aú. … Koeʻuhí ko ʻeku lea ʻaki e folofola ʻa e ʻOtuá ʻoku mou fakamāuʻi ai ʻoku ou faha”9 pe, te tau toe tānaki atu, tukuʻuta, fakaaoao ʻa tangata, filifili-mānako, taʻe-ʻofa, ʻatamai taʻe-maaʻusia, fakakuonga muʻa, mo toulekeleka.
ʻOku hangē pē ko e tangilāulau ʻa e ʻEikí tonu ki he palōfita ko ʻĪsaiá:
“[Ko e] fānaú [ni] … ʻoku ʻikai fie fanongo ki he fono ʻa [e ʻEikí]:
“ʻOku nau pehē ki he kau kikité, ʻOua naʻa mamata; pea ki he kau palōfitá, ʻOua ʻe fakahā kiate kimautolu ʻa e ngaahi meʻa totonú, lea ʻaki kiate kimautolu ʻa e ngaahi meʻa mālie, kikite ʻaki ʻa e ngaahi kākā:
“Tuʻu ke ʻataá mei he halá, afe mei he halá, tuku ke mole ʻi hotau ʻaó ʻa e Toko Taha Māʻoniʻoni ʻo ʻIsileí.”10
Ko e meʻa fakamamahí, ʻe hoku kaungāmeʻa kei talavou, ko e anga ia hotau kuongá kapau ʻoku fie maʻu ʻe he kakaí ha ngaahi ʻotua, ʻoku nau loto ke nau hoko ko ha ʻotua ʻoku ʻikai ke nau fie maʻu ha meʻa lahi, ko ha ngaahi ʻotua fakafiefiemālie pea ʻikai ngata pē ʻi he ʻikai ke nau fai ha meʻá ka ʻoku ʻikai ke ngāue, ko ha ʻotua ʻoku nau fakahekehekeʻi kitautolu, ʻai ke tau kakata, pea toki talamai ke tau hoko atu ʻo fiefia.11
Hangē ia ko hano fakatupu ʻe he tangatá ʻa e ʻOtuá ʻi hono tataú! Ko e taimi ʻe niʻihi—pea ko e fakaoli tahá ʻeni—ʻoku fakaʻaongaʻi ʻe he kakai ko ʻení ʻa e huafa ʻo Sīsuú ko ha taha ʻo e faʻahinga ʻOtua “fakafiemālie” ko ʻení. Ko e moʻoni ia? Ko Ia naʻá ne folofola ʻoku ʻikai ngata pē ʻi he ʻikai totonu ke tau maumauʻi ʻa e ngaahi fekaú, ka ʻoku ʻikai totonu ke tau teitei fakakaukau ke maumauʻi kinautolu. Pea kapau ʻoku tau fakakaukau ke maumauʻi kinautolu, ta kuo tau ʻosi maumauʻi kinautolu ʻi hotau lotó. ʻOku ongo nai ʻeni hangē ha tokāteline “fakafiemālié,” fakafiemālie ki he ongó mo manakoa ʻi he fakafiefiaʻanga ʻo e koló?
Kae fēfē ʻakinautolu ʻoku nau manako ke mamata mo ala atu ki he angahalá mei he mamaʻó? Naʻe folofola fakahangatonu ʻa Sīsū, kapau ʻoku fakahalaki koe ho matá, kapeʻi ia. Kapau ʻe fakahalaʻi koe ʻe ho nima toʻomataʻú, tutuʻu ia. 12 “Naʻe ʻikai te u haʻu ke ʻomi ʻa e melinó, ka ko e heletaá.”13 Naʻá ne fakatokanga kiate kinautolu ne nau fakakaukau naʻá ne lea ʻaki pē ha ngaahi meʻa muna ʻoku fakafiemālié. ʻOku ʻikai ha ofo, ʻa e kole ʻa e ngaahi kaungā-koló mei he malanga ki he malanga “ke ne ʻalu ʻi honau fonuá.”14 ʻOku ʻikai ha ofo, neongo e hokohoko ʻa e ngaahi maná, ka naʻe ʻikai tala mei he ʻOtuá Hono mālohí ka ko e tēvoló.15 ʻOku mahino he ʻikai ʻomi maʻu pē ʻe he foʻi fehuʻi manakoa ko ia “Ko e hā ʻe fai ʻe Sīsuú?” ha tali ʻoku manakoa.
Naʻe folofola ʻa Sīsū ʻi he fakaʻosinga ʻo ʻEne ngāue ʻi he matelié, “Ke mou feʻofaʻaki kiate kimoutolu, ʻo hangē ko ʻeku ʻofa kiate kimoutolú.”16 Koeʻuhí ke fakapapauʻi pe naʻe mahino kiate kinautolu ʻa e faʻahinga ʻofa ko iá, naʻá Ne folofola, “Kapau ʻoku mou ʻofa kiate au, fai ʻeku ngaahi fekaú,”17 pea “ko ia … te ne liʻaki ha fekau siʻi ʻi he ngaahi fekau ní, pea akonaki pehē ki he kakaí, ʻe ui ia … ko e siʻi hifo ʻi he puleʻanga ʻo e langí.” 18 Ko e fie maʻu lahi taha ʻi he palanite ko ʻení ko e ʻofa faka-Kalaisí, he naʻe pau maʻu pē ke ʻalu fakataha mo ia ʻa e angatonú. Ko ia, kapau leva ko e ʻofá ko ha foʻi lea ke tokanga ki ai, hangē ko ia kuo paú, pea ta ko e folofola ʻa Ia ʻoku hoʻata ai ʻa e ʻofá, kuo pau ke tau siʻaki ʻa e maumau fonó mo ha toe kiʻi fakaʻilonga pē ʻo hano taukaveʻí. Naʻe mahino ʻaupito kia Sīsū ʻa e meʻa ʻoku hangē ʻoku ngalo ʻi ha tokolahi ʻi hotau anga fakaonopōní: ʻoku ʻi ai ha faikehekehe mahuʻinga ʻi he fekau ke fakamolemoleʻi ʻa e angahalá (ʻa ia ʻokú Ne maʻu ha ivi taʻe-fakangatangata ke faí) mo e fakatokanga ke ʻoua ʻe fakangofuá (ʻa ia ne teʻeki ke ne fakahoko tuʻo taha).
Kaungāmeʻa, tautautefito ki hoku kaungāmeʻa kei talavoú, ʻai ke mou loto lahi. ʻE lava ʻe he ʻofa faka-Kalaisi ʻoku tafe mei he māʻoniʻoni moʻoní ʻo lililu ʻa e māmaní. ʻOku ou fakamoʻoni ko e ongoongolelei moʻoni mo moʻui ʻo Sīsū Kalaisí ʻoku ʻi māmani pea ko e kāingalotu kimoutolu ʻo Hono Siasi moʻoni mo moʻuí, ʻoku feinga ke vahevahe ia. ʻOku ou fakamoʻoni ki he ongoongolelei ko iá mo e Siasi ko iá, ʻaki ha fakamoʻoni pau ki he ngaahi kī ʻo e lakanga fakataulaʻeikí kuo fakafoki maí ʻa ia ʻokú ne fakaava ʻa e mālohi mo e ʻaonga ʻo e ngaahi ouau fakamoʻuí. ʻOku ou fakapapauʻi lahi ange kuo ʻosi fakafoki mai ʻa e ngaahi kī ko iá pea kuo toe lava ke maʻu e ngaahi ouau ko iá kuo toe maʻu ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻo hangē ko ʻeku heʻeku fakapapauʻi ʻoku ou tuʻu heni ʻi homou ʻaó ʻi he tuʻunga malangá ni pea ʻoku mou meʻa mai hena ʻi he konifelenisí ni.
ʻAi ke mou toʻa. Moʻui faivelenga ʻaki e ongoongoleleí neongo ʻoku ʻikai pehē ʻa e niʻihi ʻoku mou feohí. Taukaveʻi hoʻomou tuí ʻaki ʻa e fakaʻapaʻapa mo e anga ʻofa, ka ke mou taukaveʻi kinautolu. ʻOku fakahinohinoʻi kimoutolu ʻe ha hisitōlia ʻo ha ngaahi leʻo fakalaumālie ki he hala ʻo e tuʻunga fakaākonga faka-Kalisitiané, kau ai ʻa kinautolu te mou fanongo ki ai ʻi he konifelenisi ko ʻení mo e leʻo ʻo Palesiteni Tōmasi S. Monisoni ne mou toki fanongoá. Ko ha hala lausiʻi mo fāsiʻi ia ʻoku ʻikai toe faʻaliua, ka ʻe lava ke fonongaʻia ʻi he fiefia pea lavaʻi lelei, “ʻi he … tui mālohi kia Kalaisi, … mo ha ʻamanaki lelei ʻoku mālohi haohaoa, mo ha ʻofa ki he ʻOtuá mo e kakai fulipē.”19 Ka ʻi hoʻo hoko atu lototoʻa ʻi he hala peheé, te ke maʻu ha tui taʻe-ueʻia, te ke malu mei he ngaahi matangi koví, pea naʻa mo e kafukafu ʻi he ʻahiohió, mo ke ongoʻi ʻa e ivi ʻo hotau Huhuʻí ʻoku hangē ko e maká, ʻa ia kapau te ke langa ai ʻa e tuʻunga fakaākonga mateaki, he ʻikai lava ke ke hinga.20 ʻI he huafa ʻo Sīsū Kalaisí, ʻēmeni.