Auaunaga a Perofeta ma Aposetolo

O loo faaauau pea ona auauna atu perofeta ma aposetolo i le lalolagi atoa (tagai i le MF&F 107:23). O se aotelega puupuu lenei o nisi o a latou gaoioiga talu mai le konafesi aoao ua mavae:

Sa ofoina atu e Peresitene Dieter F. Uchtdorf, Fesoasoani Lua i le Au Peresitene Sili, i se asiasiga ia Me 2016, se faamoemoe i tagata o le ekalesia i aai na faamanualiaina talu ai nei e ala i osofaiga a le au faatupu vevesi i Egelani, Farani, ma Peleseuma. Sa ia asiasi atu i tagata sulufai, ma malaga atu i le nofoaga o le Malumalu o Pale Farani (lea ua lata ona faamaeaina), ma auai i le fatuina o le uluai siteki i le Ripapelika Siekisilovakia. Ia Iulai, sa ia malaga atu i Italia, ma tauaaoina atu se siaki mo le $3 miliona i tupe a le Ekalesia e fesoasoani ai mo le toomaga o tagata sulufai, ma asiasi atu i tolauapiga a tagata sulufai i Eleni. Ia Setema sa ia asiasi atu i tagata o le ekalesia i Romania, Molotova, Solovakia, Nouei, ma Siamani, lea na ia toe faapaiaina ai le Malumalu o Freiberg Siamani. Na ia saunoa mai o le talalelei e aumaia le faamoemoe i tagata po o fea lava latou te i ai ma o le faatasi ai ma tagata o le ekalesia “o loo i ai se lagona moni o le avea ai ma uso ma tuafafine i le Ekalesia.”

O Elder M. Russell Ballard o le Korama a Aposetolo e Toasefululua sa pulefaamalumalu i le konafesi a le Siteki o Moscow Rusia ia Iuni, ao faatasi ai isi siteki i Saratova ma St. Petersburg, Rusia. Sa ia feiloai foi ma tagata o le ekalesia i Lativia, Esitonia, ma Iukureini.

I Egelani ia Iuni, na saunoa atu ai Elder Dallin H. Oaks o le Korama a Aposetolo e Toasefululua i tagata o le palemene a Peretania faapea o le saolotoga o tapuaiga e faatagaina ai ekalesia e faia mea lelei i le lalolagi atoa. “Tatou te mananao i faamanuiaga o le saolotoga faalelotu ia maua e tagata uma o loo nonofo i lenei paneta, ma ua tatou mamao ese lava mai i lena mea i le taimi nei,” na ia saunoa ai.

I se konafesi e uiga i sauaga faalelotu ma malaga faamalosia o i latou sa faia i le Windsor Castle i Egelani ia Setema, na saunoa mai ai Elder Jeffrey R. Holland o le Korama a Aposetolo e Toasefululua e tele mea e aoao mai le aafiaga o paionia anamua a le AAG lea e mafai ona fesoasoani i tagata sulufai faaona po nei ia tulai ai i luga o latou tulaga. “Pe a talafeagai ai, e tatau ona tatou faafaigofieina ma faaauauina ia faasinomaga tulaga ese o tagata sulufai ma faamamafa atu tala mai lo latou tuanai,” o lana saunoaga lea.

I Sepania, e aofia ai le Canary Islands, ma i Potukale, na valaaulia ai e Elder David A. Bednar o le Korama a Aposetolo e Toasefululua tagata o le ekalesia, faifeautalai, ma taitai ina ia uunaia i latou o e ua le toaaga mai e toe foi mai ma ia toaaga i le Ekalesia.

Ina ua aloaiaina e Viatename le Ekalesia ia Iuni, na feiloai Elder Quentin L. Cook ma Elder Gary E. Stevenson, o le Korama a Aposetolo e Toasefululua, ma taitai o le malo ma talanoaina le talafaasolopito ma le atinaega o le Ekalesia. Na latou soalaupuleina foi le auala e fesoasoani ai le Ekalesia i galuega lautele ma agaalofa ma fesoasoani i e matitiva ma e le tagolima. Na latou pulefaamalumalu foi i fonotaga i Guam, Maikolenisia, ma Iapani.

Ia Iuni foi, na faamanuiaina ai Peresipeni, Ausetalia, ma le Atu Kuki i le asiasiga a Elder Neil L. Andersen o le Korama a Aposetolo e Toasefululua. Sa asia foi e Elder Andersen le motu o Rarotoga ma avea ma uluai Aposetolo ua tuvae i le motu o Mangaia.

I Kolomupia, Peru, ma Ekuatoa ia Iuni, na toe faatulagaina ai e Elder Ronald A. Rasband o le Korama a Aposetolo e Toasefululua ana fuafuaga faataatitia e asiasi atu ia i latou o loo tau faaleleia mai se mafuie tele. Sa ia faasoa atu se savali o le alofa mai ia Peresitene Thomas S. Monson ma faamautinoa atu i tagata na mafatia i le mafuie, sa lei faagaloina i latou.

I Kuatemala ia Aokuso, na matau ai e Elder Quentin L. Cook se tulai ae tumau i le galuega o le sailiga o talafaasolopito o aiga ma le malumalu ma saunoa ai o se faailoga o le faatuatua o tagata.

Ina ua faafeiloaia le tupu ma le masiofo o Toga i le Nofoaga Autu o Aganuu Polenisia a le Ekalesia i Hawaii, ISA, ia Iuni, na tuuina mai e Elder Dale G. Renlund o le Korama a Aposetolo e Toasefululua ni saunoaga tomua i le taua o sootaga faaleaiga.

I Louisiana, ISA, na asia ai e Peresitene Russell M. Nelson, Peresitene o le Korama a Aposetolo e Toasefululua, ma Elder M. Russell Ballard tagata na aafia i lologa ao fesoasoani atu ai ia volenitia a Mamona Lima Fesoasoani e faamama ia fale na faaleagaina ia Aokuso ma Setema. Sa matauina e Elder Ballard le sili atu ma le 11,000 tagata volenitia na malaga mai setete e 13.

Ma, ia Setema i le taimi o se faigalotu i le lalolagi atoa mo talavou matutua lea na tuusao mai i Uosigitone, D.C., ISA, na saunoa ai Elder Cook, “Tatou te le matatau e oo lava i se lalolagi faigata ma le atuatuvale.” Sa ia fautuaina le autalavou matutua e faatutu ni sini amiotonu ma faia ni fuafuaga e ausiaina i latou ma aua nei manatu faatauvaa i o latou lava taleni ma gafatia. Sa ia uunaia foi i latou e iloilo lo latou faaaogaina o ala o faasalalauga faaleagafesootai. “Tatou te faalogo soo e uiga i le faamaoni i ala o faasalalauga faaleagafesootai,” sa ia saunoa ai, ae “o le faamaoni e faapei o Keriso o se sini e sili atu ona taua nai lo le faamaoni.”

E mafai ona maua faamatalaga fou i le galuega a nei taitai o le Ekalesia i o latou lava itulau o le Facebook ma le prophets.lds.org.