Totoa i le Molimau ia Iesu

Saunia Elder Quentin L. Cook

O Le Korama a Aposetolo e Toasefululua

E le mafai ona i ai ni a tatou molimau o le Tama ma le Alo ae tatou fenumia’i ma lē mautonu i maa tu’ia.

O le ola e faavavau o le meaalofa silisili lea a le Atua ma e tuuina atu ia i latou e “tausia … poloaiga a le [Atua] ma tumau e oo i le iuga.”¹ I le isi itu, o le ola e faavavau faatasi ma lo tatou Tama Faalelagi e le tuuina atua i “e sa lei totoa i le molimau ia Iesu.”² E tele ni maa tu’ia i lo tatou lototoa e mafai ona taofia i tatou mai le ausiaina o le sini o le ola e faavavau.³ O maa tu’ia e mafai ona lavelave; se’i ou faamanino atu.

I le tele o tausaga talu ai sa fausia ai e lo’u tama se tamai fale i se vaega o le fanua o le faatoaga sa ola ae ai o ia. O le faataatiaga o le laufanua atoa sa ma’eu na’ua. Ina ua fausia puipui o le tama’i fale, sa ou asiasi atu i ai. Sa faateia lava a’u i le faamalama na i ai se vaaiga sa taulai sa’o atu lava i se pou moli sa le’i mamao ese mai le fale. Ia te a’u, sa matua faalavelave tele i le vaaiga ofoofogia.

O le vaaiga i fafo i le pou moli mai le faamalama

Sa ou fai atu, “Tama, aisea na e faatagaina ai i latou e tuu le pou moli i luma tonu o lau vaaiga mai le faamalama?”

O lo’u tama, o se tagata toaga ma to’a, sa alaga mai ma ni lagona, “Quentin, o le pou moli le la o le mea aupito sili lea ona matagofie ia te a’u i le faatoaga atoa lava!” Ona ia faamautu mai lea: “A ou vaai atu i le pou le la, ou te iloaina, e le pei o le taimi na ou ola a’e ai iinei, o le a ou le toe asuvai i ni paelo mai le vaipuna e ave i le fale e fai ai kuka, fufulu ai o’u lima, pe taele ai. Ou te le toe tutuina ni moli ga’o po o ni moli fagu i le po e faitautusi ai. Ou te manao ia ou vaai i le pou moli le la i le ogatotonu o le faamalama ou te matamata ai.

Sa ese foi se vaaiga a lo’u tama i le pou moli nai lo a’u. Ia te ia, o lena pou sa fai ma faatusa o se olaga ua siitiaina, ae ia te a’u o se maa tu’ia i se vaaiga ofoofogia. Sa faatauaina e lo’u tama le eletise, mōlī, ma le māmā e sili atu i lo se vaaiga matagofie. Sa vave ona ou iloaina e ui sa avea le pou ma se maa tu’ia ia te a’u, ae sa i ai sona uiga moni faafaatusa tele i lo’u tama.

O se maa tu’ia o “se faalavefau i se talitonuga po o se malamalamaaga” po o “se faafitauli i le alualu i luma.”⁴ O le tautevateva faaleagaga o le “pa’u atu lea i le agasala po o le faatautee.”⁵ O se maa tu’ia e mafai ona avea ma soo se mea e faalavefau ia i tatou mai le ausiaina o sini amiotonu.

E le mafai ona i ai ni a tatou molimau o le Tama ma le Alo ae tatou fenumia’i ma lē mautonu i maa tu’ia. E le tatau ona tatou pauu atu i lena mailei. O a tatou molimau e uiga ia i Laua e manaomia ona faatumauina le mama ma le faigofie e pei o le puipuiga faigofie a lo’u tama o le pou moli i le faatoaga na ia ola a’e ai.

O a nisi o maa tu’ia o loo faafenumia’ia ma faafaigataina a tatou molimau mama ma faigofie e uiga i le Tama ma le Alo ma taofia ai i tatou mai le totoa i lena molimau?

O Le Tasi Maa Tu’ia o Filisofia a Tagata

Ua tatou tuuto atu i ituaiga uma o le poto ma talitonu “o le mamalu o le Atua o le atamai lea.”⁶ Ae ua tatou iloa foi o le togafiti e fiafia i ai le tiapolo o le taitai ese lea o tagata mai le Atua ma mafua ai ona latou tautevateva e ala i le faamamafaina o filosofia [po o manatu] o tagata e sili atu i lo le Faaola ma Ana aoaoga.

O le Aposetolo o Paulo o se molimau mautinoa ia Iesu Keriso ona o se aafiaga faavavega ma le Faaola na suia ai le olaga.⁷ O le talaaga tulagaese o Paulo na saunia ai o ia e fesootai atu i tagata o aganuu e tele. Sa alofa o ia i le “faigofie ma le faamaoni” o tagata Tesalonia ma le “alofa agamalu” o tagata Filipi.⁸ Sa ia muai iloaina e faigata atu ona fesootai i le atamai ma le faaleaganuu o tagata Eleni. I Atenai i luga o Areopako, sa ia taumafai ai se talanoaga faalefilosofia ma sa teenaina. I tagata Korinito, sa tonu ai ia te ia ia tau lava o le aoao atu “o le aoaoga faavae a Keriso na faasatauroina.”⁹ I le faaaogaina o upu a le Aposetolo o Paulo:

“E lei sauni atu foi la’u upu, ma la’u tala’iga i upu mālie o le poto o tagata, a e peitai o le faasino mai e le Agaga ma le mana:

“Ina ia le i ai lo outou faatuatua i le poto o tagata, a o le mana o le Atua.”¹⁰

O nisi o tala sili ona ofoofogia o tusitusiga paia e uiga i le Faaola ma Lana misiona o loo ta’u mai i le 1 Korinito. O le mataupu—15—ua matua gauai atu i ai le lalolagi atoa e ala i faatinoga faamusika a George Frideric Handel, le Messiah.¹¹ O loo i ai aoaoga faavae loloto e uiga i le Faaola. I le vaega lona tolu o le Messiah, lea e sosoo lava ma le “Hallelujah Chorus,” o loo faaaogaina ai le tele o mau mai le 1 Korinito 15. I ni nai fuaiupu nei, o loo faamatalaina ai ma le matagofie e Paulo nisi o mea na ausiaina e le Faaola.

“[Aua] o lenei ua toe faatuina mai Keriso i e ua oti, ua avea ma faapolopolo o e ua momoe.

“Aua ua oo mai le oti talu le tagata, ua oo mai foi le toe tutu o e ua oti talu le tagata.

“Aua faapei ona oti uma ia Atamu e faapea foi ona faaolaina uma ia Keriso. …

“Le oti e, o fea o i ai lou tui? Le tuugamau e, o fea o i ai lou manumalo? …

“A e faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso.”¹²

Ua tatou iloa o se vaega na tupu ai le Liliuese ona o filisofia a tagata na faasilisili i lo aoaoga faavae autu ma taua a Keriso. Nai lo le faigofie o le savali a le Faaola, o le tele o upumoni manino ma taua sa suia pe leiloloa. O le mea moni, sa talia e le FaaKerisiano nisi o uputuu faalefilosofia FaaEleni e faamaonia ai o latou talitonuga faatasi ma a latou aganuu sa i ai. Sa tusia e le tusi talafaasolopito o Will Durant: “Sa lei faaumatiaina e le FaaKerisiano faiga faapaupau; sa ia vaetamaina mai. Sa mou atu tu ma aga FaaEleni, ae tulai mai ai se olaga fou ia i latou sa apoina ni ona vaega.”¹³ I le talafaasolopito, faapea ai ma o tatou lava aso, e teena e nisi tagata le talalelei a Iesu Keriso ona, i o latou manatu, e le o lava se lavelave faaleatamai o i ai.

I le amataga o le Toefuataiga, e toatele sa tautino e mulimuli i aoaoga a le Faaola. E tele atunuu sa manatu ia i latou lava o ni malo Kerisiano. Ae e oo foi i lena taimi sa i ai se valoaga e uiga i se taimi sili atu ona faigata mo o tatou aso.

O Heber C. Kimball o se tasi o uluai Aposetolo e Toasefululua o lenei tisipenisione ma sa Fesoasoani Muamua ia Peresitene Polika Iaga. Sa ia lapatai mai: “Ua oo mai le taimi … o le a faigata ai ona iloa foliga o se Au Paia mai foliga o se fili e faasagatau i le nuu o le Atua. O le taimi la lena e tagai ai mo le seleselega tele, aua o le a lulueseina ē amiotonu mai ē amioleaga, ma e toatele o le a pauu.” Sa ia faaiuina e faapea o loo i ai “se SUEGA o loo sau.”¹⁴

I o tatou aso, o le faatosinaga o le FaaKerisiano i le tele o atunuu, e aofia ai le Iunaite Setete, ua matua faaitiitia lava. A aunoa ma talitonuga faalelotu, o le a leai se lagona o le tali atu o le tagata lava ia i le Atua. O le mea lea, ua faigata ona faamautuina tulaga faatauaina lautele e uiga i le auala e ola ai. O filosofia e matua taofimau e tele ina feteenai ma le tasi ma le isi.

Ae paga lea, e tupu foi lenei mea i nisi tagata o le Ekalesia o e ua maluelue talitonuga ma faatosinaina e mea ua taatele i lena taimi—e tele lava ua manino e le o ni mea amiotonu.

E tusa ai ma le valoaga a Heber C. Kimball, sa saunoa ai foi Elder Neal A. Maxwell i le 1982: “O le tele o le luluina o le a tupu ona o fesasia’iga i amioga amiotonu ia e le o salamo ai. O nisi o le a faavaivai nai lo le tumau e oo i le iuga. O nisi o le a faaseseina e tagata ua liliuese. E faapena foi, o isi o le a faatausuai, ona o le a i ai maa tu’ia e fitoitonu i tisipenisione taitasi!”¹⁵

O Le Isi Maa Tu’ia o le Musu e Vaai i le Agasala i Lona Tulaga Moni

O se tasi o vaaiga tulagaese ma faapopoleina o o tatou aso, o le toatele o tagata e faia amioga agasala ae mumusu e manatu i ai o se agasala. E leai ma so latou faanoanoa po o se naunautaiga e faailoa a latou amioga o ni mea sese moni. E oo lava foi i isi e i ai se talitonuga i le Tama ma le Alo e talitonu sese e faapea o se Tama i le Lagi alofa e le tatau ona tuuina ni taunuuga mo amioga e feteenai ma Ana poloaiga.

O le talitonuga tonu lava lenei sa i ai ia Korianetona, le atalii o Alema le Itiiti i le Tusi a Mamona. Sa ia faia ni amioga le mama matuia ma sa fautuaina ai e Alema. Ua faamanuiaina i tatou i le tusiaina ai e le perofeta maoae o Alema, o le sa aafia patino i “se lua loloto sili ona pogisa [ma le] malamalama ofoofogia,”¹⁶ ia faatonuga na ia tuuina mai. I le mataupu 39 o le Alema, tatou te faitau ai i le auala sa ia fautuaina ai lenei atalii e ala i le faagasologa o le salamo ona ia faamalamalama atu lea o le auala na afio mai ai Keriso e aveese le agasala. Sa ia faamanino atu le manaomia o le salamo ia Korianetona ona “e leai se mea le mama e mafai ona mautofi i le malo o le Atua.”¹⁷

I le Alema 42 o loo i ai nisi o aoaoga faavae sili ona ofoofogia e uiga i le Togiola i tusitusiga paia. Sa fesoasoani Alema ia Korianetona ia malamalama e le o se lē “faamasinotonu le tofia o le tagata agasala i se tulaga o le pagatia.”¹⁸ Ae sa ia ta’ua e amata atu ia Atamu, sa saunia ai e se Atua alofa mutimutivale se “taimi e salamo ai” ona a aunoa ma le salamo, “ua le taulau le fuafuaga tele o le olataga.”¹⁹ Sa faamautu foi i ai e Alema le fuafuaga a le Atua o se “fuafuaga o le fiafia.”²⁰

Ua sili ona aoga o aoaoga a Alema: “Aua faauta, e faaaoga e le faamasinotonu ona manaoga uma; ma e maua foi e le alofa mutimutivale mea uma e a ia lava; ma o lea, e leai se tasi ae ua nao e lava ua salamo moni e faaolaina.”²¹ O le malamalama moni i ai, e matua taua tele ai faamanuiaga mamalu o le salamo ma le usiusitai i aoaoga a le Faaola. O se mea talafeagai le manino, e pei ona sa faia e Alema ia Korianetona, e uiga i taunuuga o filifiliga agasala ma le leai o se salamo. Ua tele ona tautino mai, “Pe vave pe tuai mai ae e ao lava ona fetaiai tagata uma ma taunuuga o a latou filifiliga.”²²

O faamanuiaga ofoofogia ma faaselesitila o le Togiola a le Faaola e faapea, o amioga agasala o le a soloia ese e le salamo. Ina ua mavae le salamo o Korianetona, sa faaiu atu e Alema e faapea, “Ia e tuu nei mea ia le toe faalavelave ia te oe, ae ia nao au agasala ia e popole i ai, le popole lena e aumai ai oe i lalo i le salamo.”²³

O Le Tagai i Talaatu o le Faailoga o se Maa Tu’ia

Sa faasino atu le perofeta o Iakopo i Tagata Iutaia anamua o “se nuu ua maaa” o e na inoino i upu manino, sa “latou fasioti perofeta, ma saili mo mea sa le mafai ona latou malamalama i ai. O le mea lea, ona o lo latou tauaso, o se tauaso na oo mai i le latou vaai i tala atu o le faailoga, o lea o le a latou pauu ai.”²⁴

E ui o loo tele ni faataitaiga o le vaai i tala atu o le faailoga,²⁵ ae o se tasi iloga i o tatou aso o le manatu faasausili. O le manatu faasausili faaletalalelei o le faasili lea e se tasi o soo se mataupu faavae o le talalelei i luga o isi mataupu faavae taua e tutusa lelei ma finauina faapea e sili atu pe feteenai foi ma aoaoga a taitai o le Ekalesia. O se tasi faataitaiga pe a fautua e se tagata ni faaopopoga, suiga po o ni faamamafa autu i se vaega se tasi o le Upu o le Poto. O le isi o ni tapenaga taugata mo le “iuga o le lalolagi.” I faataitaiga uma ia e lua, ua uunaia ai isi e taliaina ni faaliliuga tumaoti. “Afai tatou te liliuina se tulafono faalesoifua maloloina po o se isi mataupu faavae i se ituaiga o faanaunautaiga faalelotu, o lona uiga ua tatou vaai i tala atu o le faailoga.”²⁶

I le fetalai ai e uiga i le taua o aoaoga faavae, sa folafola mai ai e le Alii, “Ai se na te tala’i atu se mea e tele atu pe itiiti mai i lo lenei, o ia lava lea ua le o se a a’u.”²⁷ A tatou faateleina soo se mataupu faavae i se ala e faaitiitia ai lo tatou tuuto atu i isi mataupu faavae e tutusa le taua pe faia foi se mea e feteenai ai pe faasili atu foi i aoaoga a taitai o le Ekalesia, ua tatou vaai i tala atu o le faailoga.

Ma le isi, o nisi tagata o le ekalesia ua faasili atu ni galuega, o le tele lava o mea lelei, i se tulaga e sili atu i lo aoaoga faavae autu o le talalelei. Ua latou suitulaga lo latou tuuto atu i le galuega e fai ma a latou faamuamua ae tuualalo lo latou tuuto atu i le Faaola ma Ana aoaoga i se tulaga lona lua. Afai tatou te faamuamua soo se mea i luga atu o lo tatou tuuto i le Faaola, afai o a tatou amioga ua iloa ai ua na o Ia o se isi faiaoga ae le o le Alo paia o le Atua, o lona uiga ua tatou vaai i tala atu o le faailoga. O Iesu Keriso o le faailoga!

O le vaega 76 o le Mataupu Faavae ma Feagaiga ua faamanino mai ai e faapea o le “totoa i le molimau ia Iesu”²⁸ o le suega faigofie ma taua lea i le va o i latou o e o le a mauaina faamanuiaga o le malo selesitila ma i latou e o i le malo terasitila e maualalo ifo. Ina ia totoa, e manaomia ona tatou taulai atu i le mana o Iesu Keriso ma Lana taulaga togiola e faatoilalo ai le oti ma, e ala i le salamo, e faamama ai i tatou mai agasala, ma e manaomia ona tatou mulimuli i le mataupu faavae a Keriso.²⁹ Tatou te manaomia foi le malamalama ma le poto e uiga i le soifuaga ma aoaoga a le Faaola e taiala ai i tatou i luga o le ala o feagaiga, e aofia ai sauniga paia o le malumalu. E tatau ona tatou mausali ia Keriso, taumamafa i Ana afioga, ma tumau e oo i le iuga.³⁰

Faaiuga

Afai e ao ona tatou totoa i a tatou molimau ia Iesu, e tatau ona tatou aloese mai maa tu’ia o loo saisaitia ma taofia ai i tatou mai le alualu i luma o le toatele o isi alii ma tamaitai mamalu. Ia tatou filifili ia i ai i taimi uma i Lana galuega. A o saili atu i le poto, e manaomia ona tatou aloese mai filosofia a tagata ia e faaitiitia ai lo tatou tuuto atu i le Faaola. E tatau ona tatou vaai i le agasala i lona tulaga moni lava ma talia le Togiola a le Faaola e ala i le salamo. E manaomia ona tatou aloese mai le vaai i tala atu o le faailoga ma taulai atu ia Iesu Keriso, lo tatou Faaola ma le Togiola, ma mulimuli i Lana mataupu faavae.

Sa vaai lo’u tama i le pou o se auala e maua ai le eletise, malamalama, ma le tele o le vai mo kuka ma le faamamaina. Sa avea o se maa lagolago na faaleleia ai lona olaga.

Na fautua mai se tasi tusitala e faapea e mafai ona faia maa tu’ia e avea ma “maa lagolago ina ia avea ma tagata malualii ma oo atu ai i le lagi .”³¹

Mo i tatou, o le totoa i a tatou molimau ia Iesu o se maa lagolago lea agai atu i le agavaa mo le alofatunoa o le Faaola ma le malo selesitila. O Iesu Keriso ua na o le pau lea o le suafa i lalo o le lagi e mafai ona faaolaina ai tatou.³² Ou te tuu atu la’u molimau mautinoa i Lona paia ma Lana matafaioi faalelagi i le fuafuaga a le Tama. I le suafa o Iesu Keriso, amene.