O Faamanuiaga o le Tapuai
Saunia e Bishop Dean M. Davies
Fesoasoani Muamua i le Au Epikopo Pulefaamalumalu
E taua le tapuai ma e totonugalemu i o tatou olaga faaleagaga. O se mea e tatau ona tatou faananau atu i ai, sailia, ma taumafai ia oo i ai.
O Lana Asiasiga
O se tasi o aafiaga aupito sili ona ofoofogia ma pele ua faamaumauina i tusitusiga paia o le tala lea i le asiasiaga a le Faaola i tagata i Amerika ina ua mavae Lona maliu ma le Toetu. Sa mafatia tagata i se faafanoga sili ona maoae na mafua ai “ona suia o foliga o le eleele atoa.”1 O faamaumauga o na mea na tutupu na faamatala ai faapea ina ua mavae le mala matautia na fetagisi tagata uma e le aunoa,2 ma i le lotolotoi o lo latou faanoanoa tele, sa latou galala mo se faamalologa, filemu, ma le laveaiga.
Ina ua afio ifo le Faaola mai le lagi, sa faapauu faalua tagata i lalo o Ona vae. O le taimi muamua na tupu ai ina ua Ia folafola mai, ma le pule paia:
“Faauta, o Au o Iesu Keriso, o le na molimau i ai perofeta o le a sau i le lalolagi.
“Ma faauta, o Au o le malamalama ma le ola o le lalolagi.”3
Ona ia valaauliaina lea o i latou sa i ai ia “tutulai ma o mai ia te au, ina ia outou tuu mai o outou lima i lou itu, ma ina ia outou tagotago foi i tulaga o fao i ou lima ma ou vae, ina ia outou iloa ai o Au o le Atua o Isaraelu, ma le Atua o le lalolagi uma, ma sa fasiotia mo agasala a le lalolagi. …
“Ma ina ua uma ona latou o atu uma ma molimau o i latou lava, sa latou alalaga faatasi, ua fai mai:
“Osana! Ia faamanuiaina lava le suafa o le Atua Silisili Ese!”4
Ma le taimi lona lua, “sa latou faapauu i lalo i vae o Iesu.” Ae o le taimi lea ma se faamoemoega, aua ua tatou aoao na latou “tapuai atu ia te ia.”5
Aso Nei
I le amataga o lenei tausaga sa ou i ai i se valaauga e asiasi atu i se siteki i le Iunaite Setete i sisifo. O se Aso Sa masani, sauniga masani, ma tagata masani o le Ekalesia. Sa ou vaavaai atu ao ulufale tagata i le falelotu ma agai atu ma le migao i nofoa o avanoa. O talanoaga musumusu mulimuli na lagonaina ni siuleo i le potu taalaelae atoa. Na taumafai tina ma tama—i nisi taimi sa le manuia—e faafilemu tamaiti ulavavale. Masani.
Ae i le taimi lena, ao lei amataina le sauniga, na oo mai upu musuia a le Agaga i lo’u mafaufau.
O nei tagata e lei o mai e na o le faataunuu se tiute pe faalogo i failauga.
Sa latou o mai mo se mafuaaga loloto ma sili ona taua.
Sa latou o mai e tapuai.
Ao faagasolo le sauniga, sa ou matauina nisi o tagata i le aofia. Sa i ai ia i latou ni foliga e toetoe lava a paia, o se uiga o le migao ma le filemu. Sa i ai se mea e uiga ia i latou na mafanafana ai lo’u loto. O le aafiaga sa latou mauaina i lena Aso Sa o se mea sili ona uiga ese.
Sa latou tapuai.
Sa latou tofo i le lagi.
Na ou vaai ai i o latou mata.
Ma sa ou fiafia ma tapuai ma i latou. Ma ao ou faia lena mea, sa talanoa mai le Agaga i lo’u loto. Ma i lena aso, sa ou iloaina ai se mea e uiga ia te au, e uiga i le Atua ma e uiga i le matafaioi o le tapuai moni i o tatou olaga.
Tapuai i o Tatou Olaga i Aso Taitasi
E tulaga ese lava le Au Paia o Aso e Gata Ai pe a auauna atu i valaauga o le Ekalesia. Ae o nisi taimi atonu tatou te faia ai a tatou galuega ma tulaga masani, e pei e na o le faatinoina o se galuega. O nisi taimi o la tatou auai i sauniga ma le auaunaga i le malo e ono leai se tulaga paia o le tapuai. Ma a aunoa ma lena mea, o loo tatou misia se feiloaiga le mafaatusalia faaleagaga ma le Atua—o se tasi ua tatou agavaa ai i le avea ma se fanau a se Tama Faalelagi alofa.
O le tapuai e taua ma e totonugalemu i o tatou olaga faaleagaga, e mamao ese lava mai le avea ma se mea tupu faafuasei ma fiafia. O se mea e tatau ona tatou faananau atu i ai, sailia, ma taumafai ia oo i ai.
O Le A Le Tapuai?
A tatou tapuai atu i le Atua, tatou te faalatalata atu ia te Ia ma le alofa migao, lotomaualalo, ma le faaaloalogia. Tatou te faailoa atu ma talia o Ia o lo tatou Tupu paia, le Foafoa o le atulaulau, o lo tatou Tama pele alofa ma faavavau.
Tatou te faaaloalo ma faamamalu ia te Ia.
Tatou te tuuina atu i tatou lava ia te Ia.
Tatou te sii ae o tatou loto i le tatalo faatauanau, faapelepele i Ana afioga, olioli i Lona alofa tunoa, ma tautino atu ia mulimuli ia te Ia ma le tuuto faamaoni.
O le tapuai i le Atua o se elemene taua i le olaga o se soo o Iesu Keriso lea afai tatou te toilalo e talia o Ia i o tatou loto, o le a tatou sailia ma le le manuia o Ia ia tatou fonotaga, lotu, ma malumalu.
O soo moni e tosina atu ia “tapuai atu ia te ia o le na faia le lagi, ma le lalolagi, ma le sami, ma puna o vai—ma valaau atu i le suafa o le Alii i le ao ma le po.”6
E tele mea e mafai ona tatou aoao e uiga i le tapuai moni e ala i le iloiloina o isi—tagata o e atonu e le tele se eseesega mai ia i tatou—na fetaiai, amio ai, ma tapuai i le afioaga o le paia.
Ofoofogia, Lotofaafetai, ma le Faamoemoe
I le vaega muamua o le seneturi 19, na toeitiiti lava a lafoai atoa e le lalolagi Kerisiano le manatua lea o loo fetalai mai pea le Atua i tagata. Ae i le tautotogo o le 1820, na suia faavavau lena mea ina ua ulu atu se tama faatauvaa faifaatoaga i le togavao ma tootuli ai e tatalo. Mai lena lava aso, ua faatumulia le lalolagi i le tafe mai o faaaliga ofoofogia, ma faaee atu ai i ona tagata le malamalama taua e faatatau i le natura ma le faamoemoega o le Atua ma Lana fegalegaleaiga ma tagata.
Na faamatalaina e Oliva Kaotui na aso o ni “aso e le mafai ona faagaloina. … E o le olioli e! E o le ofoofogia e! E o le maofa e!”7
O upu a Oliva na faaalia ai elemene muamua lea e o faatasi ma le tapuai moni o le paia—o se lagona o le mamalu ma le maofa ma le faafetai loloto.
O aso taitasi, ae aemaise lava le aso Sapati, tatou te maua ai le avanoa ofoofogia e lagona ai le matagofie ma le maofa o le lagi ma tuu atu a tatou viiga i le Atua mo Lona agalelei faamanuiaina ma le alofa mutimutivale lofituina.
O le a taitaia i tatou e lenei mea i le faamoemoe. O elemene muamua nei o le tapuai.
Malamalama, Poto, ma le Faatuatua
O le aso faamanuiaina o le Penetekoso, na ulu atu ai le Agaga Paia i loto ma mafaufau o soo o Keriso, faatumulia i latou i le malamalama ma le poto.
Pe ana le oo i lena aso sa i ai taimi sa latou le mautonu ai i mea e tatau ona latou faia. Na avea Ierusalema ma nofoaga lamatia mo se soo o le Faaola, ma masalo sa latou tuufesili po o le a le mea o le a avea ai i latou.
Ae ina ua faatumulia o latou loto e le Agaga Paia, na mou ese atu le masalosalo ma le musua. E ala atu i le aafiaga le mafaatusalia o le tapuai moni, sa maua e le Au Paia a le Atua se malamalama faalelagi, poto, ma se molimau malosi. Ma taitai atu ai i le faatuatua.
Mai lena taimi, na galulue le au Aposetolo ma le Au Paia ma se vaaiga naunautai. Sa latou talai atu ma le lototoa ia Keriso Iesu i le lalolagi atoa.
A tatou tapuai atu i le agaga, tatou te valaaulia le malamalama ma le upumoni i totonu o tatou loto, lea e faamalosia lo tatou faatuatua. E moomia foi nei elemene i le tapuai moni.
Avea ma Soo ma le Alofa Mama
I le Tusi a Mamona ua tatou aoao ai faapea mai le taimi na laveaiina ai Alema le Itiiti mai puapuagatia o taunuuga o lona lava fouvale, e lei toe tutusa o ia. Sa ia “malaga atu i le laueleele atoa … ma i totonu o tagata uma … , taumafai ma le vilivilitai e toe faalelei manua uma sa [ia] faia i le ekalesia.”8
O lana tapuai faifai pea i le Atua Silisili Ese na avea ma tulaga o le avea ma soo malosi.
O le tapuai moni e faaliliuina i tatou i ni soo faamaoni ma naunautai a lo tatou Matai alofa ma le Faaola, o Iesu Keriso. E suia i tatou ma avea atili faapei o Ia.
Tatou te malamalama atili ma popole. Faamagalo atili. Alofa atili.
Tatou te iloa lelei lava e le mafai ona tatou faapea ifo tatou te alolofa i le Atua ao le taimi lava e tasi o feita, tuliesea, po o le le amanaiaina o isi o loo siomiaina i tatou.9
O le tapuai moni e taitai atu ai i se talitonuga le maluelue ina ia savali i le ala o le avea ai ma soo. Ma mautinoa lava le oo atu i le alofa mama. E moomia foi nei elemene i le tapuai.
Ulu Atu i Lona Faitotoa ma le Loto Faafetai
Pe a ou tomanatu i mea na amata o se taeao masani o le Aso Sa, i lena faletapuai masani, siteki masani, o loo faagaeetia pea a’u e oo mai i lenei aso i lena aafiaga ofoofogia faaleagaga lea o le a faamanuia ai pea lo’u olaga.
Sa ou iloaina e tusa lava pe tatou te pulea ma le atamai o tatou taimi, valaauga, ma tofiga—e tusa lava pe ua tatou faailogaina uma pusa i la tatou lisi o le tagata, aiga, po o le taitai “atoatoa”—afai tatou te toilalo i le tapuai atu i lo tatou Laveai alofa mutimutivale, Tupu faalelagi, ma le Atua mamalu, ua tatou misia le tele o le olioli ma le filemu o le talalelei.
A tatou tapuai atu i le Atua, tatou te faaalia ma talia o Ia, i le migao lava e tasi e pei o tagata anamua o Amerika. Tatou te faalatalata atu ia Ia ma lagona e le mafaamatalaina o le matagofie ma le maofa. Tatou te ofo ma le agaga faafetai i le agalelei o le Atua. Ma o lea, ua tatou maua ai le faamoemoe.
Tatou te mafaufau loloto i afioga a le Atua, ma e faatumulia o tatou agaga i le malamalama ma le upumoni. Tatou te malamalama i vaaiga faaleagaga lea e na o le malamalama o le Agaga Paia e mafai ona iloa ai.10 Ma o lea, ua tatou maua ai le faatuatua.
Ao tatou tapuai atu, o le a faaleleia o tatou agaga ma e tatou te tuuto atu ina ia savavali i alavae o lo tatou Faaola pele, o Iesu Keriso. Ma mai lenei taunuuga, tatou te maua ai le alofa mama.
Pe a tatou tapuai atu, o le a tuu atu o tatou loto i viiga i lo tatou Atua faamamaluina i le taeao, aoauli, ma le po.
Tatou te faapaia ma faamamaluina o Ia e le aunoa—i o tatou faletapuai, aiga, malumalu, ma ia tatou galuega uma.
A tatou tapuai atu, tatou te tatalaina o tatou loto i le mana faamalolo o le Togiola a Iesu Keriso.
O le a avea o tatou olaga ma faailoga ma faaaliga o la tatou tapuaiga.
O’u uso e ma tuafafine, o aafiaga faaleagaga e itiiti lava se faiā i mea o loo tutupu i tou autafa ae tele se aafiaga i mea o loo tutupu i totonu o tatou loto. O lau molimau o le tapuai moni o le a liua ai sauniga masani a le Ekalesia i ni taumafataga ofoofogia faaleagaga. O le a faatamaoaigaina ai o tatou olaga, faalautele lo tatou malamalama, ma faamalosia a tatou molimau. Aua a uai atu o tatou loto i le Atua, e pei o le au fai Salamo anamua, tatou te “ulu atu i ona faitotoa ma le viiga ma ona loto ma le pese: [tatou te] vivii atu ia te ia, ia outou faamanu atu i lona suafa.
“Aua e lelei le Alii; e faavavau lava lona alofa; e oo atu lava lona faamaoni i lea tupulaga ma lea tupulaga.”11
O le tapuai faamaoni ma le faatauanau, tatou te fuga ai ma tuputupu ae i le faamoemoe, faatuatua, ma le alofa mama. Ma e ala i lena faagasologa, ua tatou faapotopoto ai le malamalama faalelagi i o tatou agaga lea e faatumuina o tatou olaga i le uiga paia, filemu tumau, ma le olioli e faavavau.
O le faamanuiaga lena o le tapuai i o tatou olaga. Ou te molimau atu ai ma le lotomaualalo i le suafa paia o Iesu Keriso, amene.