Aoao mai ia Alema ma Amoleka
Saunia e Peresitene Dieter F. Uchtdorf
Fesoasoani Lua i le Au Peresitene Sili
Ou te faamoemoe o i latou ua se ese mai le ala o le avea ma soo o le a vaai e ala i o latou loto ma aoao mai ia Alema ma Amoleka.
Alema le Itiiti
Faatasi ai ma le toatele o tagata le mafaagaloina i tusitusiga paia, o Alema le Itiiti. E ui o ia o le atalii o se perofeta maoae, ae sa leiloa lona ala mo se taimi ma oo ai ina avea ma se “tagata … amioleaga ma le ifo i tupua.” Mo ni mafuaaga tatou te le malamalama i ai, na ia tetee malosi i lona tama ma saili e faaumatia le Ekalesia. Ma ona o le susua tele o ana upu ma faatosinaga, sa ia matua ausia ai ia faiga.1
Ae sa suia le olaga o Alema ina ua faaali atu i ai se agelu a le Alii ia te ia ma fetalai atu i se siufofoga o faititili. Mo aso e tolu ma po e tolu, sa “falo tigaina [Alema] i le mafatia faavavau, … i tiga o se agaga lava ua faasalaina.” Ona oo lea, ua ia manatuaina se mea sa i ai i lea taimi faigata—o se upumoni e faavavau, sa aoao atu e lona tama: o le a afio mai Iesu Keriso “e togiola mo agasala a le lalolagi.” Ua leva ona teenaina e Alema ia mataupu, ae o lea la “ina ua tau ane [lona] mafaufau i lenei manatu,” sa ia tuu atu ai loa ma le lotomaualalo ma le naunautai lona faalagolago i le mana togiola a Keriso.2
Ina ua tulai a’e Alema mai lenei aafiaga, sa suia lona tagata. Mai i lena taimi, sa ia tuuto atu lona olaga i le toe faaleleia o mea na ia faaleagaina. O ia o se faataitaiga mamana o le salamo, faamagaloga, ma le tumau ma le faatuatua.
Sa filifilia mulimuli ane Alema e sui i lona tama e avea ma taitai o le Ekalesia a le Atua.
E tatau ona iloa e tagatanuu uma o le malo o sa Nifae le tala ia Alema. Semanu e faatumulia Twitters, Instagrams, ma Facebooks i ona aso i ata ma tala e uiga ia te ia. Masalo sa faaali soo o ia i luma o le pepa o le Saraemila Faalevaiaso ma sa avea ma mataupu o tusitusiga, ma polokalama faapitoa o televise. I se faapuupuuga, masalo o ia le tagata lauiloa sili ona tautaua o ona aso.
Ae ina ua vaai Alema ua faagaloina e lona nuu le Atua ma sii ae i latou lava i le faamaualuga ma finauga, sa ia filifili ai e faamavae mai le tofiga a tagata lautele ae tuuto atu “atoatoa o ia lava i le perisitua maualuga o le faatulagaga paia a le Atua,”3 i le talaiina o le salamo i tagata sa Nifae.
Muamua, sa matua faamanuiaina Alema—seia oo ina ua malaga atu i le aai o Amonaea. Sa matua iloa lelei e tagata o lena aai ua le o toe avea Alema ma o latou taitai faalemalo, ma sa itiiti lava so latou faaaloalo mo lana pule faaleperisitua. Sa latou faifai ia te ia, faatauemu ia te ia, ma tuliese o ia i fafo mai lo latou aai.
I le lotonutimomoia, sa fulitua ai Alema i le aai o Amonaea.4
Ae sa tau atu e se agelu ia te ia e toe foi.
Se’i mafaufau lava i ai: sa faatonu o ia e toe foi i le nuu sa itagiaina o ia ma sa inosiaina le Ekalesia. O se tofiga matautia ma e masalo sa lamatia ai le ola. Ae sa lei faatuai lava Alema. Sa “vave ona ia toe foi atu.”5
Sa tele ni aso na anapogi ai Alema ina ua ia ulufale atu i le aai. Sa ia ole atu i se tagata na matua le masani ai pe mafai ona ia “tuuina mai … sina meaai i se auauna faatauvaa a le Atua.”6
Amoleka
O le igoa o lenei tagata o Amoleka.
O Amoleka o se tagatanuu maumea ma lauiloa i Amonaea. E ui o ia o se suli o le toatele o tagata talitonu, ae ua faavaivaia foi lona lava ia faatuatua. Mulimuli ane sa ia tautino mai, “Sa valaauina au i le tele o taimi ae sa ou le faalogo; o lea sa ou iloa e uiga i nei mea, peitai sa ou le fia [talitonu]; o lea na ou alu ai pea lava i le fouvale faasaga i le Atua.”7
Ae sa saunia e le Atua ia Amoleka, ma ina ua la feiloai ma Alema, sa ia talileleia le auauna a le Alii i lona fale, lea sa nofo ai Alema mo le tele o aso.8 I lena taimi, sa tatala atu e Amoleka lona loto i le savali a Alema, ma sa oo mai ai ia te ia se suiga ofoofogia. Mai lena taimi, sa lei gata na talitonu Amoleka; ae sa avea foi o ia ma siamupini o le upumoni.
Ina ua toe alu atu Alema e aoao ia tagata Amonaea, sa i ai sana molimau lona lua i ona autafa—o Amoleka, o se tasi lava o i latou.
O mea na tutupu mulimuli ane ua avea ma se tasi o tala sili ona faanoanoa ma fiafia foi i tusitusiga paia uma. E mafai ona e faitau i ai i le Alema mataupu 8–16.
O le asō, ou te fia talosagaina outou ia mafaufau i ni fesili se lua:
Muamua: “O le a se mea e mafai ona ou aoao mai ia Alema?
Lua: “E faapefea ona ou pei o Amoleka?”
O Le A Se Mea e Mafai ona Ou Aoao Mai ia Alema?
Se’i ou amata atu e ala i le fesili atu i taitai uma ua mavae, o loo i ai nei, po o le lumanai i le Ekalesia a Iesu Keriso, “O le a se mea e mafai ona e aoao mai ia Alema?”
O Alema o se tamalii sa tulagaese le faamanuiaina ma talenia. Atonu e faigofie le mafaufau faapea sa ia lei manaomiaina se fesoasoani a se tagata. Ae ui i lea, o le a le mea sa faia e Alema ina ua ia toe foi atu i Amonaea?
Sa maua e Alema ia Amoleka ma fesili atu i ai mo se fesoasoani.
Ma sa maua ai e Alema le fesoasoani.
Po o le a lava se mafuaaga, o nisi taimi e mumusu ai tatou o taitai e saili ma fesili atu i a tatou Amoleka. Masalo tatou te manatu e sili atu lo tatou faia o le galuega e i tatou lava ia, pe tatou te mumusu ne’i faalavelave i isi, pe tatou te mafaufau foi e le o fia auai isi. E tele lava ina tatou faatuutuu e valaaulia tagata e faaaoga a latou taleni mai le Atua ma auai i le galuega tele o le faaolataga.
Mafaufau i le Faaola—sa Ia amata faatu ea Lana Ekalesia na o Ia?
Leai.
O Lana savali sa le o le “Soso ese. O le a ou faia le mea lea.” Ae o le, “O mai, mulimuli mai ia te au.”9 Sa Ia musuia, valaaulia, aoao, ona faatuatuaina lea o Ona soo “e fai mea ua outou vaai mai o ou faia.”10 I lea ala, sa le gata na atiae ai e Iesu Keriso Lana Ekalesia ae sa atiae ai foi Ana auauna.
Po o le a lava le tofiga o loo e auauna ai i le taimi nei—pe o se peresitene o se korama a tiakono, se peresitene o se siteki, po o se Peresitene o se Eria—ina ia faamanuiaina, e tatau ona e sailia au Amoleka.
Atonu o se tagata e faatauvaa pe le amanaiaina i totonu o le tou au paia. Atonu o se tagata e foliga mai e le naunau pe le mafai ona auauna atu. O a outou Amoleka atonu e talavou pe matutua, alii po o ni tamaitai, leai ni potomasani, lē lavāvā, pe le toaaga i le Lotu. Ae o le mea atonu e le o muai iloaina, o loo matelaina i latou e fia faalogo atu ia te oe i upu nei “Ua manaomia oe e le Alii. Ou te manaomia oe!”
I le taele o o latou loto, e toatele o loo fia auauna atu i lo latou Atua. Latou te fia avea ma se meafaigaluega i Ona aao. Latou te fia sasau atu a latou selesaito ma tauivi ma lo latou malosi e saunia le lalolagi mo le toe afio mai o lo tatou Faaola. Latou te fia atiae Lana Ekalesia. Ae e fai si o latou musua e amata. E tele lava ina latou faatalitali se’i talosagaina.
Ou te valaaulia outou ia mafaufau ia i latou i o outou paranesi ma uarota, i a outou misiona ma siteki, o e o loo manaomia ona faalogo i se valaau ia faatino. O loo galulue faatasi le Alii ma i latou—i le sauniaina o i latou, i le faamalūlūina o o latou loto. Saili i latou e ala i lagona o lou loto.
Aapa atu ia i latou. Aoao i latou. Uunaia i latou. Fesili ia i latou.
Faasoa atu ia i latou upu a le agelu ia Amoleka—o faamanuiaga a le Alii o le a mau i luga o i latou ma o latou aiga.11 Atonu e faateia oe i le iloaina o se auauna toa a le Alii semanu e ono natia pea lava.
“E Faapefea Ona Ou Pei o Amoleka?”
E ui o nisi o i tatou e tatau ona saili mo se Amoleka, ae mo isi atonu o le fesili e faapea “E faapefea ona ou pei o Amoleka?”
Masalo i le gasologa o tausaga, ua faasolo ina faaitiitia lou tuuto i lou avea ma soo. Masalo ua faasolo vaivai le malosi o lau molimau. Masalo ua e faataumamaoina oe lava mai le tino o Keriso. Masalo ua i ai se mea ua e tiga ai ma ita ai. E pei o nisi o le Ekalesia anamua o Efeso, atonu ua outou tuua lo outou “uluai alofa”12—o upumoni musuia ma faavavau o le talalelei a Iesu Keriso.
Masalo, e pei o Amoleka, e te iloaina i lou loto e faapea ua “valaauina [oe e le Alii] i le tele o taimi” ae “sa [e] le fia faalogo.”
Ae ui i lea, o loo silasila atu le Alii ia te oe i le mea na Ia silasila ai ia Amoleka—o le gafatia o se auauna lototoa i se galuega taua e fai faatasi ai ma se molimau e faasoa atu. O loo i ai auaunaga e leai se tasi e mafai ona faia i se ala lava e tasi. Ua faatuatuaina oe e le Alii i Lana perisitua paia, lea e taofia le gafatia paia e faamanuia ai ma siitia isi. Faalogo ma lou loto ma mulimuli i uunaiga a le Agaga.
O Le Malaga a se Tasi Tagata
Sa ou ootia lava i le malaga a se tasi uso na fesili ifo ia te ia lava, “A valaau mai le Alii, mata o le a ou lagonaina?” O le a ou ta’ua le uso lelei lea ia Tavita.
Sa liliu mai Tavita i le Ekalesia pe ā ma le 30 tausaga talu ai. Sa ia auauna atu i se misiona ona ia auai lea i se a’oga faaloia. A o a’oga o ia ma faigaluega e tausi si ona aiga talavou, sa ia tau ai i se faamatalaga e uiga i le Ekalesia na ia le mautonu ai. O le faateleina lava o lona faitau i nei ituaiga o tusiga le lelei, o le faateleina foi lena o lona le mautonu. Na i’u lava ina īa talosagaina ia aveeseina lona igoa mai pepa faamaumau o le Ekalesia.
Mai lena taimi, e pei foi o Alema i ona aso fouvale, sa faaalu ai e Tavita le tele o taimi e finau ai ma tagata o le Ekalesia, ma faia ni talanoaga i luga o le initoneti i se faamoemoega i talu’iina o latou talitonuga.
Sa lelei tele o ia i lea mea.
O se tasi o tagata na la finau lea o le a ou ta’ua o Iakopo. Sa agalelei Iakopo i taimi uma ma faaaloalo ia Tavita, ae sa mausali foi o ia i lona puipuiga o le Ekalesia.
I le aluga o tausaga, sa atiae e Tavita ma Iakopo le feāvata’i ma se faigauo. O le mea sa lei iloa e Tavita sa amata ona tatalo Iakopo mo Tavita ma sa ia faia ma le faatuatua tele mo le silia ma le sefulu tausaga. Sa ia ave le igoa o lana uo mo tatalo i totonu o malumalu a le Alii ma faamoemoe o le a faamalūlūina le loto o Tavita.
I le aluga o tausaga, sa suia lemu lava Tavita. Sa amata ona ia toe manatua ma le faamemelo ia aafiaga faaleagaga sa ia oo i ai muamua, ma sa ia manatuaina le fiafia sa ia lagonaina a o avea o ia ma se tagata o le Ekalesia.
E pei foi o Alema, sa lei galo atoa ia Tavita ia upumoni o le talalelei na ia opomauina muamua. Ma e pei foi o Amoleka, sa lagona e Tavita le aapa atu o le Alii ia te ia. Ae o le taimi lea ua avea Tavita ma se paaga i se ofisa loia—o se galuega taualoa. Sa ia atiaeina se tulaga sa lauiloa ai i le faitioina o le Ekalesia, ma sa faamaualuga tele na le talosaga ai ina ia toe faaulufaleina.
Ae ui i lea, sa faaauau pea ona ia lagonaina le toso a le Leoleo Mamoe.
Sa ia talitonu atoa i le mau, “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.”13 Sa ia tatalo, “Le Atua e, ou te toe fia avea ma tagata o le Au Paia o Aso e Gata Ai, ae e i ai a’u fesili e manaomia ni tali.
Sa amata ona ia faalogo i musumusuga a le Agaga ma tali musuia a uo, e sili atu i lo se isi lava taimi muamua. Sa faasolosolo lava ona liua ona masalosaloga i le faatuatua, seia i’u ina ia iloaina, ua mafai ona ia toe lagonaina se molimau ia Iesu Keriso ma Lana Ekalesia toefuataiina.
I lena taimi, sa ia iloa ai o le a mafai ona ia faatoilaloina lona faamaualuga ma faia soo se mea e tatau ai ina ia toe taliaina o ia i totonu o le Ekalesia.
Mulimuli ane, sa toe ulu atu Tavita i vai o le papatisoga ona amata lea ona toe faitau aso e toe fuatai ai ona faamanuiaga.
Ou te fiafia lava e lipoti atu i le taumafanafana na sei mavae atu nei, na toefuatai ai faamanuiaga o Tavita. Ua toe toaga atoa nei o ia i le Lotu ma auauna atu o se faiaoga o Aoaoga Faavae o le Talalelei i lana uarota. Ua ia faaaogaina avanoa uma e talanoa atu ai i isi e uiga i lona liua, le faamaloloina o mea na ia faaleagaina, ma molimau atu e uiga i le talalelei ma le Ekalesia a Iesu Keriso.
Faaiuga
Ou uso e ma tuafafine, ia tatou saili atu, ia maua, uunaia, ma faalagolago atu i le au Amoleka i totonu o a tatou uarota ma siteki. E toatele Amoleka o loo i ai i le Ekalesia i aso nei.
Masalo e te iloaina se tasi. Masalo o oe le isi.
Atonu o loo musumusu atu le Alii ia te oe, uunaia oe ia toefoi mai i lou uluai alofa, foai mai au taleni, faaaoga ma le agavaa le perisitua, ma auauna faatasi ma ou uso i le Au Paia i le faalatalata atili atu ia Iesu Keriso ma le fausiaina o le malo o le Atua iinei i le lalolagi.
E silafia e lo tatou Faaola pele le mea o loo e i ai. Na te silafia lou loto. E finagalo o Ia e laveai ia te oe. O le a Ia aapa atu ia te oe. Tau lava o le tatala atu o lou loto ia te Ia. Ou te faamoemoe, o i latou ua se ese mai le ala o le avea ma soo—e tusa lava po o ni nai mea iti—o le a mafaufau loloto i le agalelei ma le alofa tunoa o le Atua, ia lagonaina i o latou loto, ia aoao mai ia Alema ma Amoleka, ma faalogo i le fetalaiga a le Faaola e suia ai olaga: “Sau, mulimuli mai ia te au.”
Ou te uunaia outou ia faalogo i lena valaau, aua e mautinoa a e faalogo, o le a e mauaina le seleselega o le lagi. O faamanuiaga a le Alii o le a mau i ou luga ma lou aiga.14
Ou te molimau atu ai i lenei mea ma tuu atu lau faamanuiaga i le avea ai ma se Aposetolo a le Alii, i le suafa o Iesu Keriso, amene.