O Le Manaoga Faamaoni o le Loto

Saunia e Carol F. McConkie

Fesoasoani Muamua i le Au Peresitene o Tamaitai Talavou

O taimi uma o tatalo faapelepele e mafai ona avea ma se taimi paia e faaalu faatasi ma lo tatou Tama, i le suafa o le Alo, e ala i le mana o le Agaga Paia.

I tauiviga o le olaga faaletino, e le o tuua ai na o i tatou e ausia la tatou galuega, ia tau a tatou taua, ia feagai ma faigata po o ni fesili e le taliina. Sa aoao mai Iesu Keriso i se faataoto “ina ia tatalo soo e tatau ai, a e aua le faavaivai.” Sa Ia faamatalaina se faamasino sa lei faamamaluina le Atua ma sa leai ma sona popole mo isi tagata. E sau soo lava se fafine ua oti lana tane ia te ia, ma aioi i ai mo se faamasinogatonu mo ona fili. Mo se taimi, sa lei tuuina atu ai e le faamasino ia te ia se toomaga. Ae i se taunuuga o ana aioiga faamaoni ma le faifai pea, sa tonu ai loa i le faamasino, “Ona o le faasoesa mai ia te au o le fafine nei ua oti lana tane, ou te faamasino i ana mea ina ne’i faatiga mai ia te au i lona sau soo.”

Ona faamalamalama mai lea e Iesu:

“Pe le faia ea e le Atua le faamasinoga mo e na ia filifilia, o loo alalaga ia te ia i le ao ma le po … ?

“Ou te fai atu ia te outou e vave ona faamasino e ia o a latou mea.”

Ona fesili mai lea o le Alii i le fesili lenei: ““Peitai, a sau le Atalii o le tagata, pe maua ea e ia le faatuatua i le lalolagi?”¹

E taua le tatalo i le atiaeina o le faatuatua. Pe a toe afio mai le Alii, pe o le a Ia maua mai ea se nuu e iloa tatalo i le faatuatua ma o ē ua saunia e maua le faaolataga? “Aua e faaolaina i latou uma o e valaau atu i le suafa o le Alii.”² O i tatou o fanau a se Tama Faalelagi alofa, ma e mafai ona tatou olioli i se fesootaiga patino ma Ia pe a tatou tatalo atu “ma le loto faamaoni, ma le manatu moni i ai, ma le faatuatua ia Keriso”³ ona galue lea e tusa ma tali tatou te maua e ala mai i uunaiga a le Agaga Paia. Tatou te tatalo i le faatuatua, tatou te faalogo, ma tatou te usiusitai ina ia tatou aoao ia tasi ma le Tama ma le Alo.⁴

O se tatalo o le faatuatua e matala ai le ala e maua ai faamanuiaga mamalu e auina mai le lagi. Sa aoao mai le Faaola:

“Ia ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou:

“Aua ai se ole atu, e maua e ia; o le saili, e iloa e ia; o le tuitui e toina mai ia te ia.”⁵

Afai tatou te faamoemoe e maua se mea, e tatau ona tatou ole atu, saili, ma tu’itu’i. I lana sailiga mo le upumoni, sa faitau ai Iosefa Samita i le mau, “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.”⁶ I se tali i lana tatalo o le faatuatua, na matala ai le lagi. Na afifio mai le Atua le Tama ma Lona Alo, o Iesu Keriso i le mamalu ma fetalai mai ia Iosefa Samita, i le amataina o le tisipenisione o le atoaga o taimi. Mo i tatou, o le faamalologa faavavega, puipuiga mamana, malamalama faalelagi, faamagaloga o le togiola, ma le filemu taua, o nisi ia o tali e oo mai ia i tatou pe a tatou avatu “manaoga faamaoni o le loto”⁷ i le faatuatua.

Tatou te tatalo atu i lo tatou Tama i le suafa o Iesu Keriso, e ala i le mana o le Agaga Paia, o lea, e auai uma ai tagata e toatolu o le Aiga Atua i a tatou tatalo.

Tatou te tatalo atu i lo tatou Tama Faalelagi ma na o Ia lava ona o Ia o le “Atua i le lagi, o lē ua lē tuaoia ma faavavau, … mai le tumau-faavavau i le tumau-faavavau, o lē na faia le lagi ma le lalolagi, ma mea uma o i ai.” I le avea ai ma o tatou Foafoa, sa Ia tuu mai ai poloaiga “e tatau ona [tatou] alolofa ma auauna atu ia te ia, le Atua soifua moni e toatasi, ma ia nao ia lava le tagata o lē e tatau ona [tatou] tapuai atu i ai.”⁸

A e tatalo atu i le Tama Faalelagi i le faatuatua, “o le a ia faamafanafanaina outou i o outou puapuaga, … [ma o le a mafai ona outou] taumamafa fiafia i lona alofa.”⁹ Sa faasoa mai e Peresitene Henry B. Eyring o tatalo a lona tama i le taimi na lē manuia ai ana tauiviga ma le kanesa sa aoaoina ai o ia i le sootaga loloto patino i le va o le Atua ma Lana fanau:

“Ina ua oo ina ogaoga le tiga, sa matou maua atu o ia i le taeao i ona tulivae i autafa o le moega. Sa matuai vaivai lava e toe foi atu i lona moega. Sa ia fai mai ia i matou sa tatalo e fesili i lona Tama Faalelagi pe aisea lava ua matua mafatia ai o ia, ae sa ia taumafai i taimi uma ia amiolelei. Sa ia fai mai sa oo mai se tali agalelei: ‘O loo manaomia e le Atua ni atalii totoa.’

“Ma o lea na ia lototele ai e oo i le iuga, sa talitonu e alofa le Atua ia te ia, sa faafofoga mai ia te ia, ma o le a ia siitia o ia i luga. Sa faamanuiaina o ia i le vave iloaina ma le le faagaloina lava, e latalata mai lava se Atua alofa e ala i le tatalo.”¹⁰

Tatou te tatalo i le suafa o Iesu Keriso ona o lo tatou faaolataga o loo ia Keriso, ma “e leai lava se isi igoa i lalo o le lagi ua foaiina mai i tagata, e mafaia ona faaolaina ai o i tatou.”¹¹ Tatou te o mai i le Tama i le suafa paia o Iesu Keriso¹² ona o Ia o lo tatou Fautua i le Tama ma e aioi atu o Ia mo tatou.¹³ Sa puapuagatia, lavatoto, ma maliu o Ia e faamamaluina ai Lona Tama, ma o Ana aioiga o le alofa mutimutivale mo i tatou e matala ai le ala mo i tatou taitoatasi e maua ai le filemu i lenei olaga ma le ola e faavavau i le lalolagi a sau. E le finagalo o Ia ia tatou toe puapuagatia pe mafatia i nisi tofotofoga nai lo tofotofoga e manaomia. E finagalo o Ia tatou te liliu atu ia te Ia ma faatagaina o Ia ia faamāmā a tatou avega, ia faamalolo o tatou loto, ma ia faamamaina o tatou agaga e ala i Lona mana faamama. Tatou te le mananao e ta’ufua Lona suafa i upu faisoo ma taulotoina. O tatalo faamaoni e tuuina atu i le suafa paia o Iesu Keriso, o se faailoaga lea o lo tatou alofa tuuto, lo tatou lotofaafetai e faavavau, ma lo tatou manao mausali e tatalo e pei ona sa Ia tatalo, ia faia e pei ona sa Ia faia, ma ia avea e faapei o Ia.

Tatou te tatalo e ala i le mana o le Agaga Paia ona “o ia o lē e ole atu i le Agaga, e ole atu o ia e tusa ma le finagalo o le Atua.”¹⁴ A tatou tatalo i le faatuatua, e mafai ona taiala e le Agaga Paia o tatou mafaufauga ina ia ogatusa a tatou upu ma le finagalo o le Atua. “Aua le ole atu i se mea, ina ia mafai ona outou faamaumauina i o outou tuinanauga, ae ia ole atu ma le mausali le maluelueina, ina ia outou le gauai atu i se faaosoosoga, ae o le a outou auauna atu i le Atua moni ma soifua.”¹⁵

“E le gata e taua lo tatou iloa o le auala e tatalo atu ai, ae e tutusa foi ma le taua o lo tatou iloaina o le auala e maua ai le tali i a tatou tatalo, ia iloatino, ia nofouta, ia mafai ona vaai ma le manino ma malamalama ma se faamoemoega manino i le finagalo o le Atua ma [Ona] faamoemoega e faatatau ia i tatou.”¹⁶

Sa faasoa mai e Peresitene Eyring: “E i ai au tatalo na taliina mai. Sa sili ona manino nā tali ina ua faafilemuina mea sa ou manao i ai e se lagona malosi tele o le fia iloa o le finagalo o le Atua. O le taimi lena e mafai ai ona ta’uina mai e le Tama Faalelagi le tali i le mafaufau e ala i le leo filemu ma le itiiti ma mafai ona tusia i le loto.”¹⁷

Ina ua ulu atu le Faaola i le Faatoaga o Ketesemane, na matuai faanoanoa Lona agaga e oo i le oti. I Ona tiga, e na o le pau le tagata na mafai ona Ia liliu atu i ai o Lona Tama. Sa Ia aioi atu, “Afai e mafai, ia ave ese lenei ipu ia te au.” Ona Ia faaopoopo atu lea, “Ae aua le faia lo’u loto, a o lou finagalo.”¹⁸ E ui e leai se agasala, sa valaauina le Faaola ia “[mafatia] i tiga ma puapuaga ma faaosoosoga o ituaiga eseese uma,” e aofia ai ma’i ma vaivaiga o Lona nuu. “E mafatia [o Ia] e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana laveaiga.”¹⁹ Sa faatolu ona Ia tatalo, “Tama, ia faia lou finagalo.”²⁰ Sa lei aveesea le ipu. I tatalo faamaulalo ma le faatuatua, sa faamalosia ai o Ia e agai pea i luma ma faataunuu Lana misiona paia e saunia lo tatou faaolataga, ina ia tatou salamo, talitonu, usiusitai ma maua faamanuiaga o le faavavau.

O tali tatou te maua i tatalo atonu e le o mea ia tatou te mananao ai. Ae i taimi o faafitauli, e avea a tatou tatalo ma se lainaola o le alofa ma le alofa mutimutivale agamalu. I a tatou aioiga, e mafai ona faamalosia i tatou ia agai pea i luma ma faataunuu mea uma na faauuina ai i tatou e fai. I Lana Au Paia o loo ola i aso faigata, ua fetalai mai le Alii, “Ia faamafanafanaina o outou loto … ; aua ua i ai tagata uma i o’u lima; ia filemu ma iloa o A’u o le Atua.”²¹

Pe o tuuina atu faalilolilo a tatou tatalo, po o totonu o aiga, i le lotu, po o le malumalu; pe o tatou tatalo ma ni loto momomo ma ni agaga salamo e saili le faamagaloga, poto faalelagi po o le malosi e tumau ai, ae ia tatou tatalo e le aunoa ma ni loto e tumu, e sasaa atu pea i le Atua mo o tatou manuia ma le manuia o i latou o siomiaina i tatou. O manaoga faamaoni e tuuina atu i se agaga o le lotofaafetai mo le anoanoai o faamanuiaga ma le lotofaafetai mo lesona o le olaga, e totoina ai i o tatou loto le faatuatua mausali ia Keriso, se “susulu o le faamoemoe, ma se alofa i le Atua ma tagata uma.”²²

O le tatalo o se meaalofa mai le Atua. E le manaomia ona tatou lagonaina le feseta’i po o le tuuatoatasi. Ou te molimau atu o taimi uma o tatalo faapelepele e mafai ona avea ma se taimi paia e faaalu faatasi ma lo tatou Tama, i le suafa o le Alo, e ala i le mana o le Agaga Paia. I le suafa paia o Iesu Keriso, amene.