Haʻu, ʻo Muimui ʻIate Au—Maʻá e Lakanga Taulaʻeiki Faka-Melekisētekí mo e Fineʻofá

Ko e Hā e Meʻa ʻOku Kehé?

Kuo hanga ʻe he ʻOtuá ʻi he ngaahi ʻaho kimui ní, ʻo fakafoki mai e lakanga fakataulaʻeikí mo e ngaahi kōlomu ʻo e lakanga fakataulaʻeikí, kae pehē ki he Fineʻofá ke tokoni ʻi hono fakahoko ʻEne ngāué (vakai, Mōsese 1:39). Ko ia, ʻi heʻetau fakataha mai he Sāpate takitaha ʻi he Lakanga Taulaʻeiki Faka-Melekisētekí mo e Fineʻofá, ʻoku tau aleaʻi mo palani ai e founga te tau lavaʻi ai ʻEne ngāué. Ko e ‘uhinga ia ʻoku fie maʻu ai ke mahulu hake e ngaahi fakatahaʻangá ni mei heʻene hoko pē ko ha kalasí. Ko ha ngaahi faingamālie foki ia ke akonaki ai ʻo fekauʻaki mo e ngāue ʻo e fakamoʻuí, ako fakataha ai mei he ngaahi akonaki ʻa e kau taki ʻo e Siasí ʻo fekauʻaki mo e ngāue ko iá, pea fokotuʻutuʻu ke fakahoko ia. ʻE tokoni e ngaahi liliu ko ʻeni ki heʻetau ngaahi fakataha ʻi he Sāpaté, ke tau fakahoko ai e ngaahi taumuʻá ni.

Ko Ha Taimi-tēpile Fakamāhina

ʻE muimui e ngaahi fakataha ʻa e Lakanga Taulaʻeiki Faka-Melekisētekí mo e Fineʻofá he Sāpaté, ki he taimi-tēpile fakamāhina ko ʻení:

Uiké	Taumuʻá
Sāpate ʻUluakí	Fealēleaʻaki fakataha fekauʻaki mo e ngaahi fatongia, ngaahi faingamālie, mo e ngaahi faingataʻa fakalotofonuá pea faʻu ha palani ngāue
Sāpate Uá mo e Tolú	Ako e ngaahi pōpoaki konifelenisi lahi fakamuimuitaha kuo fili ʻe he kau palesitenisií pe kau taki ʻo e kulupú pe taimi ʻe niʻihi, mei he pīsopé pe palesiteni fakasiteikí
Sāpate Faá	Aleaʻi ha tefito makehe kuo fili ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá
Sāpate Nimá	Aleaʻi ha tefito ne fili ʻe he kau pīsopelikí

Ko Ha Sīpinga ki Heʻetau Ngaahi Fakatahaʻangá

ʻOku tau muimui ʻi heʻetau ngaahi fakatahaʻanga ʻo e Lakanga Taulaʻeiki Faka-Melekisētekí mo e Fineʻofá, ki ha sīpinga ke fakahoko ai e ngāue ʻa e ʻOtuá.

1. Vahevahe e ngaahi aʻusia ko e ola ʻo ha ngaahi ueʻi mo e fakaafe ne nau fai ʻi he ngaahi fakataha kimuʻa ʻa e lakanga fakataulaʻeikí mo e Fineʻofá (tataki ʻe ha taha ʻo e kau palesitenisií pe kulupulitá).

2. Fealēleaʻaki fakataha (Sāpate ʻuluakí, tataki ʻe ha mēmipa ʻo e kau palesitenisií pe mēmipa ʻo e kulupú) pe ako fakataha (Sāpate ua, tolu, mo e faá, tataki ʻe ha faiako kuo uiuiʻi).

3. Palani ke ngāue ko ha kulupu pe fakafoʻituitui (tataki ʻe ha mēmipa ʻo e kau palesitenisií pe kulupú).