ʻEletā Patrick Kearon

Kau Palesitenisī ʻo e Kau Fitungofulú

Lolotonga e hoko ʻa ʻEletā Patrick Kearon ko e Palesiteni ʻo e ʻĒlia ʻIulopé, naʻá ne mātā tonu ai e fononga ʻa ha kau kumi hūfanga ʻe toko ua miliona meí he Hahake Lotoloto kuo fakaʻauha ʻe he taú, ki ʻIulope ke nau siʻi malu ai. Naʻá ne pehē, “He ʻikai pē toe tatau ʻeku moʻuí, hili eku sio ki honau fofongá mo fanongo ki heʻenau talanoa kau ki he fakalilifu kuo nau hola mei aí pea mo ʻenau fononga faingataʻa ke kumi hūfangá. “Ko ha meʻa fakalaumālie ke mātā e foaki ʻofa kuo fai ʻe he kāingalotu ʻo e Siasí he funga māmaní ke tokoniʻi e niʻihi fakafoʻituitui mo e ngaahi fāmili ko ʻeni kuo lahi siʻenau molé.”

Naʻe ui ʻa ʻEletā Kealoni, ʻa ia naʻe hikinimaʻi ko ha Fitungofulu Taki Maʻolunga ʻi he ʻaho 3 ʻo ʻEpeleli 2010, ki he kau Palesitenisī ʻo e Kau Fitungofulú ʻi he ʻaho 1 ʻo ʻAokosi, 2017.

Naʻe fāʻeleʻi ʻa ʻEletā Kealoni ʻi Carlisle, Cumberland ʻi England ʻi Siulai ʻo e 1961 kia Paddy mo Patricia Kearon. Lolotonga e ngāue ʻa ʻene tangataʻeikí ʻi he Laulā Puna ʻa Pilitāniá, ne ako ʻa ʻEletā Kealoni ia ʻi he Hahake Lotolotó pea mo e United Kingdom.

Lolotonga ʻene fekumi ki he Siasí, naʻá ne maʻu ai ha potufolofola ʻi he Tohi ʻa Molomoná ʻoku pehē, “ʻOku ʻi ai ʻa e faʻahinga ʻo e tangatá koeʻuhí ke nau maʻu ʻa e fiefiá” (2 Nīfai 2:25). ʻOku pehē ʻe ʻEletā Kealoni, “Ne puke ʻe he potufolofolá ni ʻeku tokangá. Ne u sio ki he hanga ko ia ʻe he faleʻi ʻa e Fakamoʻuí ke fiefiá, ʻo fakatupulekina ʻa e moʻui ʻa kinautolu ne u fetaulaki mo iá.” Naʻá ne kau ki he Siasí ʻi he Efiafi kimuʻa he Kilisimasi ʻo e 1987.

Naʻá ne fetaulaki mo Jennifer Carole Hulme, lolotonga ʻene ako ʻi ʻIngilani mo e ʻUnivēsiti Pilikihami ʻIongí. Naʻá na mali ʻi he Temipale Oakland California ʻi he 1991, peá na nofo ʻIngilani ʻo aʻu ki hono uiuiʻi ia ʻi he 2010. Ko ha ongomātuʻa kinaua ki ha fānau ʻe toko fā.

Kuó ne moʻui mo ngāue ʻi he United Kingdom, Saute ʻAlepea mo e ʻIunaiteti Siteití ʻi ha ngaahi kautaha kehekehe, kau ai hono tokangaʻi e moʻui leleí, meʻakaí, fefonongaʻakí, meʻalelé, pea naʻá ne fakalele foki mo ha kautaha faifaleʻi ki he founga fetuʻutakí. Kuo kau ʻi heʻene ngāue ki he puleʻangá mo e tukui koló, ʻa ʻene ngāue ʻi ha ngaahi poate ʻo ha ngaahi kautaha tokoni ʻofa, ʻapiako, kautaha tokoni ki ha ngaahi pisinisí, mo ha ʻūnivesiti.

Kuo ngāue ʻa ʻEletā Kealoni ʻi ha ngaahi uiuiʻi lahi ʻi he Siasí, kau ai ʻene hoko ko ha tokoni kalake ʻo e uōtí, palesiteni ʻo e Kau Talavoú ʻi he uōtí, tokoni pīsope, palesiteni fakakolo, palesiteni fakasiteiki mo ha Fitungofulu Fakaʻēlia.